HAKHOKHMA Post Post New Entry

Erev Kehilat Benei Menashe K.Arba thlirletna

Posted by hakhokhma on May 24, 2012 at 9:55 AM

   Yom Revii (23/5/2012) zan khan Kiriat Arba Moatsa chuan Benei Menashe te tan 'Erev Kehila' a buatsaih a, hetah hian Kiriat Arba leh Ramat mamre khua atangin Benei Menashe mipui thahnem tak an kal khawm a, tin, Moatsa lam hruaitute leh MP Otniel Shneler leh Kiriat Arba khaw Rabbi Harav Dov Lior שליט"א te pawhin an rawn tawiawm a ni.

 


   He hun hi hmun dang leh hun dang ang a kan lo hriat thin dan 'Erev Kehila' hman thin ang lo deuhva hman a ni a, he hun hi Kiriat Arba huam chhunga Benei Menashe mupui te tana hna thawhna te leh 'Peilut' hrang hrang lo tih tawh te thlirletna leh sawi hona hun atan leh, engtia kal zel tur nge tih lam thu sawi nan te leh Moatsa lam hruai tute zawhna zawhna hun atan te hman a ni. Tichuan, a tirah Arvit tawngtaina neih a ni a, chumi lai chuan nu ho ten 'Matseget' hmangin Benei Menashe thlalak hrang hrangte an lo thlir hova, tichuan, Arvit neih zawh veleh hian hun hmanna hi neih tan a ni a, a tirah Kiriat Arba Benei Menashe Rakaz Pu Yoni Nakhum chuan hawnna thusawi a nei a, chumi hnuah Upa lam ho ten Music thiam tak maia tum chungin hla sakna an nei leh a, chumi hnuah Kiriat Arba khaw Rav Hamara Deatra Harav Dov Lior שליט"א chuan malsawmna thusawi a nei leh a, tin hemi zawh hian Benei Menashe Rakaz thawhpui 'Tsevet Higui' ho te chuan a mal malin an hna lo thawhte reportna an nei a, a hmasa berin Pi Reut Thomte chuan mizo tawngin Education lama kan naupangte tana hma a lo lak tawhna hrang hrang te chu report a nei a, tin, chumi hnuah Pi Rivka Lunkhel pawhin Kuki tawngin Education lama naupang te tana a hna lo thawh te hrangh hrang chu report a rawn pe ve leh bawk a, chutiangin, Pi Esther Gin pawhin Manipur tawng leh Mizo tawngin tar leh upa te leh naupang te tana hna an lo thawhna 'Peilut' hrang hrang an lo tih tawh te chu report thiam tak maiin a rawn pe ve leh bawk a ni.

 


   Tin, hetia 'Tsevet Higui' hoten report an pek zawh hian, Harav Gurion Sela chuan Kiriat Arba Benei Menashe Mizo welfare hoten hma an lo lakna hrang hrang te chu 'Matseget' hmangin report a rawn pe ve leh bawk a, chumi hnuah, Rakaz Pu Yoni Nakhum pawh chuan hun reilote chhung a nihna Rakaz Kehila anih hun chhunga a hma lo lakna hrang hrang te chu 'Matseget' hmang bawk chuan report a rawn nei ve leh bawk a ni.

 


    Hetia Report hrang hrang ngaihthlak hnu hian Kiriat Arba Rosh Hamoatsa Malakhi Levinger chuan thusawina a nei ve leh bawk a, thu a sawi zawh ve leh hian MP Otniel Shneler pawh chuan thusawina a nei ve leh bawk a ni. Pu Otniel Shneler hian a sawi dan chuan Kneset ah theihtawp chhuah chunga Benei Menashe te Aliya na tur hian hmalak a tum thu te a sawi a, tin, kan hma lawk a kut lo awm tur 'Shavuot' zawh veleh hian a mah ngei chu Mizoram leh Manipur ah a hmuna Benei Menashe la awm te han tlawh tura a zin dawn tur thu pawh a sawi a ni.

 


    Tin, hemi zan hian HAKHOKHMA lam pawhin he inhmuhkawmna hi LIVE in a pe chhuak bawk a, tichuan, mipui te hmuh leh ngaihthlak chak em em 'Shlav Hasheelot' Zawhna leh chhanna hun chu hman chhunzawm nghal a ni a, tichuan, zawhna te hi a frang hlawmin a lo ngaithla tute tan pawh mur uaih uaihna thil engemaw zat an zawt hlawm a, amaherawhchu, Rosh Moatsa chuan zai dawh tak chungin mipui te zawhna hi chiang kelh kawlhin a chhang zel bawk a ni. Tin, hemi zana Hebrew a thusawi reng reng te hi 'Tsevet Higui' zing ami Pu Yoni Rokhum chuan mizo tawngin a let zel bawk a ni. Zawhna hi Pi Reut Thomte chuan rawn zawt hmasa berin, "Tun atanga Alyia lo awm leh zel turah hian kan ngaih em em kan nu leh kan pa te hi Alyia rawn tiin lo pem ve ta se, Kiriat Arba ah hian an rawn awmve thei ang em? i lo dawng sawng thei ang em?" tiin, a zawt a, he zawhna hi a hma lama thil lo awm tawh, tuna Alyia ti tura hma la tu Shavei Israel ten Mizoram leh Manipura kan unau lo pem ve tur te hnena bon sign tira an Alyia atanga kum 5 chhung chu Kiriat Arba ah lut thei lo tur anga hming an sign tirna thu vel a tanga rawn zawh a ni. He zawhna hi Rosh Moatsa Malakhi Levinger chuan chhangin, "Alyia lo awm tur te leh a duh apiang Kiriat Arba a lo cheng duh te chu hlim tak leh lawm tak chungin kan pawm thei a, he thu hi chiang takin ka sawi nawn leh ang, Kiriat Arba a lo cheng duh apiang te chu lawm tak chung ka lo pawm ang, thu hnaia lehkha chungchangah khan pawi ka ti khawp mai a, kha lehkha kha kan hminga thil tih a ni lo a, kan hriatpui bawk hek lova, kha thu kha ka hriat rualin, MP Shneler chu ka phone nghal a, ani chuan Michael Freund (Chairman Shavei Israel) chu a zawt nghal a, tichuan kha lehkha kha tu emaw nangmahni Kehila chhung amiin ama thuin a lo siam a, 'Kiriat Arba ah lut thei lo tur ang khan', mahse, kha thil khan engmah thu takleh thu rinawm beh chhan a nei lo a, tin, Kiriat Arba a lut thei lo leh kan lo dawng sawng duh lo anga thu thantir hi thil dik lo leh thil tih awm lo a ni, Kiriat Arba ah hian a lo lut duh apiang chu kan dawng sawng theiin, a lo lut turte tan pawh behchhan leh tha taka dawm chhona hna thawk tur hian kan inhuam reng a ni.


    He zawhna a chhan hnu hian Pi Rivka Lunkhel chu rawn ding ve lehin zawhna a rawn zawt ve leh bawk a, "He thu hi a dik em? Kiriat Arba ah hian Benei Menashe te kan dawng duh tawh lo, rawn luh tir tawh suh u tiin 'Misrad Hapnim' (Interior Ministry) ah leh Rabanut (Chief Rabinate) ah lehkha i thawn an ti a, hei hi a dik em?" tiin, Rosh Moatsa chuan rawn chhang velehin, "Rivka i zawhna ah chuan ka lawm khawp mai, chutiang Lehkha awzawng ka thawn lova, Harav Gurion-a pawh Chief Rabbi Harav Amar-a ka biak tumin a awm ve a, tin mi dang dang te pawh, Rav Amar-a hnenah chuan Benei Menashe te hi kan lo dawng sawng thei rengin a duh apiang kan khuaah hian kan lo lawm lut thei ani tih thu ka sawi a, tu rawn luhna mah kan dang lo, in Kehila te hi Ayia an rawn tihna hi kan thil duh em em a ni a, mahse, chutih rual chuan Tanpuina an dawn tel ngei hi kan duhsak pui bawk a, tun thleng hian mahnia in leh lo lei thei lo te an la awm tih kan hria a, heng te hi 'Siua' tanpuina an dawn loh avang a ni tih kan hria a, chung hote tan chuan tanpuina hi an dawn ngei hi kan duh a, heng zawng zawng te hi Sorkar atangin kan dil sak reng cheu a, pemthar dang ten tanpuina an dawng tih kan hriaa, chuvangin, nangni tan pawh hian chung an dawn ang chu in dawn ve ngei hi kan duh a, chutiang ang chuan Israela in rawn pem ruala tanpuina chu in dawn theihna turin hma kan la reng zawk a ni. In leina lamah te, Education lamah te, Klita lam ah te leh thil chi hrang hrangah te, tin, ka sawi belh duh chu, kei leh Avi-a (Menahel Hakhinukh) hian Sorkar Office hrangh rangah dilna kan thehlut reng a, Alyia hi thil pawimawh tak anih rualin heta lo awm tawh te tanpui zuina hi chutiang ang chiah chuan thil pawimawh em em a ni tiin, kan hrilh reng bawk a ni, hemi chungchang ah hian keimahni chauh hi hetiang thu hi Sorkara thlen tu awmchhun kan ni tih hi ka sawi lang duh bawk a, tin, Alyia tihna kawnga mi tangkai em em, hna tha taka thawk tu 'Shavei Israel' te an awm a, amaherawhchu, heta lo awm sa tawh te chhawmdawlna chungchang, an fa naupang te te te, an chhungkua ah te chhawmdawlna hna hi thil pawimawh em em ani tih hi kan hmu a ni. Hei hi kan thusawi chiang em em chu a ni, Alyia chu tih sak rawh u, mahse heti laia lo awm sa tawh te hi ngaihtuah zui bawk rawh u tih hi.


     Hemi zawh hian Pi Rivka Lungkhel bawk chu rawn ding lehin zawhna dang a rawn zawt leh a, "Rosh Moatsa i nih hnu kum hnih chhung hian engvangin nge Benei Menashe te hi i ngaihtuah em em, kan tan hian engati nge 'Hashkaa' (hun tam tak senga hnathawhna) i neih ngachhan? enge i tan hnemhnanna awm kan lakah hian?" tiin, he zawhna chu Rosh Moatsa chuan rawn chhang leh bawkin, "Lawmthu ka sawi nawh leh e, heti zawng hian ka sawi ang, kum thum chhung hian kei leh Avi-a hian Benei Menashe kehila te chungchang thu hi kan ngaihtuah a, kan duty chu Mipuite tana rawngbawlna a ni a, chutiang ang chuan, Kiriat Arba mipui zawng zawng te tana kawng engkima thatna hi kan duh a ni a, khawtlang mipui zawng zawngte chungchang thu hi kan buaipui reng a, Thalai hote, upa ho te, Olim khadashim ho te, leh mi dang dang te, kan nihna hi kan rawn luah hma chhung kha chuan kan hma lama mite khan Kiriat Arba chhunga bauina leh harsatna chungchang thu chauh buaipuiin an enkawl thin a, vawiin ah chuan mi tha leh thil tha ti te pawh kan buaipui a ni, kan ngaihdan chuan thil tha ti te leh tallent tha neite pawh chhawmdawla buaipui zui hi kan thil tih a ni a, vawiin ah hian lemziak lamah te leh Arts lam hrim hrim leh music lama thiamna nei te tan Khug te kan siam sak a, chungah te chuan in Kehila hi kan thulut ve reng bawk a, chutiangin, harsatna nei te chuah tanpui lovin, thiamna neiten dinhmun sang zawk an kai chhoh theihna turin kan buaipui bawk a ni. Kiriat Arba ah hian kum 15 chhungin Gan Yeladim leh School te engmah sak belh a awm lova, keini chuan tun kum thar lo awm tur thleng hian Gan pariat lai leh School class 20 lai kan sak belh dawn a ni. Kan hmuh dan chuan he khaw lian tak hi a parvul zel a, a lo thanchhoh zel hi kan tihtur ah kan ngai a, he khua hi kan pute Avrahama te, Itskhak-a te, Yakov-a te khua anih mai bakah Lal David-a khawpui anih ang hian he khua hi tih lena, Israel hnam zawngzawng te tana tih zau leh tih ropui zel hi a phu tih kan hria a ni. Tun kan dinhmunnihna kan chelh hnu hian infiamna Field hrang hrang Football ground te, Bascket Ball ground te leh Lam zirna hmun te, 'Haikhal Hatarbut' (Hall) te kan sak belh tawh bawk a, heng kan thil tih te hi kan khua tihnghehna tur leh tih changtlun chhoh zel natur atan a kan tih a ni, chuvangin Pi Rivka-i zawhna chhanna atan chuan Benei Menashe te chungchang thu kan ngaihtuahna hi kan hna thenkhat te zinga mi mai chauh a ni a, in Kehila te hian he khua hi in IN atana in hmuh theihna tur leh in thlamuanna hmun atan leh in fate tha taka in enkawl chhoh kan duh vangin, kan theihpatawp kan chhuahpui cheu a ni. Hetia Rosh Moatsa hian a chhan zawh hian, Pi Rivka Lunkhel chu lo ding lehin, "Engvangin nge he zawhna hi ka zawh nachhan che kan tih chuan, kum 17 kalta chhung khan Benei Menashe te chungchang thuah hian hmalak puina engmah kan hmu ngai lova, i nihna Rosh Moatsa i nih hun kum 2/3 chhung hian kan Kehila hi nasa takin a thang taa hei hi thil mak ah ka ngai lo thei lo a ni," tiin, a rawn sawi ve leh a, tichuan, Rosh Hamoatsa chuan, "Heng zawng zawng te hi keimah ni lovin, in Rakaz Yoni-a thil tih hi a nia , chuvangin, a puala kut ben hi kan phu ani," tiin, a rawnchhunzawm nghal zat a, tichuan, mipui ten uar takin kut an beng hluah hluah a ni. Hemi zawh hian Pu Peer Tlau chuan zawhna a rawn zawt ve leh a, "Thil pakhat mak ka tih em em chu, eng vangin nge, kan upa ho ten 'Lishkat Avoda' (work office) ah te an va kal hian an lo ngaihsak that duh loh em em?" tiin, Rosh Moatsa chuan chhangin, "Yoni chu thu chu i hria em? ka lo hre reng reng lo a nih chu, engle khaw le, 'Lishkat Avoda' chu Moatsa hnuaia awm a ni lova, engpawh nise, Yoni (Rakaz) hian chu thu chu lo ngaih ven se a tha ang." Tin, Pu Peer-a bawk chuan rawn zawt lehin, "Eng vangin nge kan tar leh upa ten 'Bituakh Leumi' a an kal khuan a thawk tunu khuan a lo ngaihsak that duh loh nachhan? a hnampui Russian ho an kal chuan thil awlsam te tein a lo tih sak zung zung thin a, mahse, kan hnam upa hote an kal chuan, a lo buaipui tha duh ngai lo, hei hi eng vang nge?" tiin, Rosh Moatsa chuan chhang nghalin, "Engpawh nise, Yoni-a (Rakaz) hian in tawng pahnih thiam tu emaw in hnam zing ami ruat se, darkar bitukin hlawh neiin, chu chuan chutianga buaina nei te chu 'Lishkat Avoda' ah emaw, 'Bituakh Leumi' ah chuan hruai thin tur cheuin mi dah rawh se." ati a, mipui te chuan kut an beng dur dur a ni.


    Hemi hnu hian Pi Tamar Ostrow chuan zawhna a rawn zawt ve leh bawk a, "Tun hnaiah Caravan luahman hi a rawn to chho a, hei hi Caravan a cheng te sawi danin Malakhi avangin Caravan luahman hi a to an ti a, hei hi a dik em?" tiin, Rosh Moatsa chuan a rawn chhang veleh nghal a, "A hmasa berin, Caravan hi Moatsa hnuaia awm a ni lova, hei hi 'Hakhevra lepituakh Kiriat Arba' kuta awm a ni a, engpawh nise, 500/600 vel bak a ni lova, hemi chungchang hi an mahni Khevra ho ten thutlukna an siam na atanga rawn tihsan hi a ni a, tin, Nofei Mamre hmuna Caravan ho saw a luah man chu 1500 Shekel a ni a, tin, Caravan in ho chungchang hi thil buaithlak tak a ni a, nangmahni Kehila ami ngei ngeiin min hrilh pakhat chu kan Caravan bang a tlu tih te a ni a, tin Caravan pakhat pawh a kang tawh bawk a, tunah ian Caravan chungchang buaina hi chingfel turin kan ngaihtuah reng a, Kharsina khuaa Caravan ho hi an hlui tawh em em a, chuvangin, a enkawl tu Khevra te hian an kuta awm hi an duh tawh lova, chutiangin, Moatsa pawhin kan duh lova, chuvangin, a hmuna cheng te tan engtin nge Dira lamah kan sawn chhuah dan tur hi kan ngaihtuah reng a, Caravan hi kum 5 kum 6 daih tura ruahman a ni a, mahse, tuna Kharsina khuaa Caravan ho te hi chu kum 20 chuang mah an ni tawh hlawm a, chuvangin, kum 2013 tawp thleng hian Caravan chhunga cheng te tan 'Pitaron' (chinfelna) tur kan ngaihtuah a ni, tumah, pawhchhuah luih kan tum lova, chuvangin, in tha zawk an hmuh theihna turin hma kan lak pui dawn a ni, hemi chungchang thu hi Yoni Nakhum leh Tsvi Edri-a te kuta awm a ni a, chuvangin, an chungchang thu chinfelna hi rang taka thil tih anih ngei hi kan beisei a ni.


    Pi Tamari chuan "Anih leh Caravan chu rawn dah belh ta mai ula,"tiin a sawi leh a, Rosh Moatsa chuan, chungchu thil tih theih nise chuan a tha hle a, mahse, Smolanim (Left Wing) ho hian chutiang kan tihna tur chu dodalin kan tih theih lohna turin hma an la reng a ni, chuvangin, a buaina chinfelna tur leh zawhna in neih reng reng chuan Yoni-a hnenah hian in kal thin dawn nia. Yoni-a chu Moatsa lam aiawhin a awm a, Tvi Edri chu a Khevra lam aiawh a ni a, chuvangin, tumah pawnah an riah phah dawn a ni lova, an tana tha zawk in leh lo ngheta hlankai dan tur kan buaipui zawk a ni. Chutiangin, MP Oniel Shneler-a hnenah pawh khan ngenna ka siam tawh bawk a, Sorkar lam atang hian hetianga in leh lo la nei lo tuna Caravana cheng te tan hian a chinfel hna min thawhpui turin ka ngen tawh bawk a ni. Chuvangin, tuemaw Caravan lo chim palh ta se, a mawhphur tu tur chu keimahni hi kan nih avangin, kan him tlanna tur kawng tunah hian kan ngaihtuah reng mek zel a ni. Tin, tuna Nofei Mamre hmuna Caravan awm te saw, kum 1 chhungin kan la chhuak vek dawn a ni, saw ti lai hmunah sawn in nghet kan sa zawk dawn a ni," tiin a sawi a, mipui te chuan 'Kol Hakavod' tiin kut an beng hluah hluah a ni.


   He thu a sawi zawh hian, mipui te hnen atang chuan tu emaw hian anih chung in thar ah chuan Olim Khadashim te an cheng thei ang em? tiin zawhna a rawn awm a, Rosh Moatsa chuan, " thei teh reng mai mi zawng zawng huap tur atana sak ani ang" ati a, tichuan, nu ho zing atang chuan "Benei Menashe Ohev Caravan" (Benei Menashe te hian Caravan hi kan ngaina a ni) a rawn ti a, mipui te an nui hluah hluah a ni.


      Hemi zawh hian Pu Sharon Palian chuan zawhna a rawn siam ve leh a, "Yoni Nakhum-a hian Revakha ah te 'Khasdei Avot' ah te Benei Menashe tana hna thawna leh hmalakna a awm dawn reng rengin in hruaitu chu Shmuel Chenkual anih chuan kan thawh ho pui thei lo ang che u, ati e a ti a sia, mahse, kha tunah khan Yoni-a chuan a hna thawhna hrang hrang a rawn tar lang tho si a, engati nge kan Chairman ber hna thawk theiloa a sawi hnuah ama puala hna alo thawh nachhan, engati nge, ama sawi dan angin, Benei Menashe mipui te tan hna a thawh theih loh an tih sia chuan, amah Yoni Nakhuma pawh chuan hna thawh tur a nei lo tihna a ni a, engvangin nge a ban mai loh?" tiin, a rawn zawt a, Yoni Nakhum-a chuan chhangin, "Tunah hian Shmuel Chenkual pawh a rawn kal lova, chuvangin, heta chhan chiah pawh ka ngai lova, engpawh nise, hemi thu chungchang hi in hriat fiah duh chuan nang (Sharon Palian) pawh, Shmuel Chenkual pawh ka office ah lo kal ula, in thu hriat chian duh tin reng chu ka lo hrilh ang che u. tiin a chhang a ni.


     Tin, Yoni Nakhum chuan thu sawi belh leh bawkin, "Zanin ah hian in rawn zawh ka rin em em, mahse tun thlengin tuman in rawn zawt si lova, keiman kan rawn sawichhuak mai ang, thu thang 'Moatsa chuan Benei Menashe tan Sanction a dawng a, chu chu thil dang atan an hmang' tiin thu vak vel a awm a, hei hi thil dik lo a ni a, tu pawh a duh apiang ten Benei Menashe Sanction atana kan pawisa dawn kan hman chhuahna list Moatsa ah hian kawl that vek a ni a, chung te chu in duh chuan in rawn en thlithlai thei vek a, chuvangin, hetianga dawt muhlum lenkual vel tir hi thil tha a ni lovin, in tan a hna thawk tu ka nih ang hian, hetianga min lo sawina ah hian na ka ti em em a ni." A ti bawk a ni.


   Hetia zawhna vel hun hman zawh hian Rosh Moatsa chuan a haw dawn pahin, "Tun kan hma lawk ah khian Benei Menashe te Kiriat Arba ami te leh khaw hrang hrang a mi , a duh a piang te tan 'Kever Yosef' (Josefa thlan) tlawh a Tiul neih tur a ni dawn a, tin, Kotel hnuai vel fanna hun pawh neih vat a ni ang". tiin, mipui te hnenah a hriattir bawk a ni.

 


Categories: Kehila, Community, Politics, News

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments