HAKHOKHMA Post Post New Entry

Israel rama Chapchar Kut hman chungchang hi

Posted by hakhokhma on May 9, 2012 at 7:50 PM

    Israel ramah hian Mizoram leh Manipur atanga pem Benei Menashe chhungkaw engemaw zat kan awm ve taa, P-thian zarah kan lo thahnem veta in ngaihdan leh duh dan mihring danin a hrang ve nuaih tawh mai a, Juda te chuan hmanlai hun atang tawhin hetianga ngaihdan hran a awm thuhlaah hian Rabbi lian (Posek Halakha) kan tih mai, Juda dan leh dun a kip a kawia hre chiang chinte hnenah chung an buaina chu thlenin, Rabbi lian sawi ang chuan an kal mai thin a ni.


    Benei Menashe te hian Rabbi te pawh kan nei ve nual tawh mai a, an rualpui an thian ten he lei hausakna uma sum leh pai an zawn laiin, khang zawng zawng khawvel thil tha kal san ngamin kum 6 vel tal tawp Yeshiva ah P-thian thu an zir a, an fak awmin, chawimawi an phu hliah hliah  a ni.


    Amaherawhchu, a chunga kan sawi tak Rabbi lian (Posek Halakha) kan tih ang em khi chu an ni lova, khing te erawh khi chuan Yeshiva ah kum 30/40 vel an zir hnua hmun hrang hrang leh khaw hrang hrangah te Rabbi nihna chelha an thiamnaa mahni inring tawk tawh leh Juda mipui te pawhin an rin ngam, an chanchin a chhe zawnga an sawi ngam loh chu sawi loh, an thlen tawhna ah chuan an thu chu hnial chi ah pawh an ngaih tawh loh leh, an kalna hmun apianga mi ten zahna entirnan ding chunga chibai an lo buk thin te an ni hlawm a ni.


    Tichuan, khing ang Rabbi lian chu sawi loh kan Benei Menashe zingah hian Rabanut Harashit (Chief Rabbinate) atanga Rav nihna tura exam pass pawh kan la awm lo a ni. Amaherawhchu, an zirna hmun Yeshiva atangin erawh chuan, an zirna Rosh Yeshiva hming sign hnan ngat 'Yoreh Yoreh Certificate' erawh chu an dawngin, an fak awm em em a ni.


    Tichuan, tun tuma kan sawi tum erawhchu, a tira kan hawnna ang khian, Benei Menashe te zingah hetiang kan thil tih hi keini Juda ni tawh te tan hian hman laia Juda ni tura kan inGiur hmaa kan lo chin thin thil thenkhat ang te kha tih chi leh tih zui thiang zel ala ni ang em le? tih thu ah a ni a.


    Hetiangin; Israel ramah hian mi tlawmngai thenkhat ten kum 2009 khan Kiriat Arba khuaah hawh u Chapchar kut i hmang ve ang u khai, tiin, rawtna an nei a, tichuan, kan Benei Menashe Rav pakhat pawh an rawn ngei bawk a, hemi tuma an rawnna hi Chapchar kut hman thu chungchang hi thiang ani em? tih lam ni lovin, Chapchar kut kan hmang dawn a, chutah chuan 'Cheraw kan' hi thiang a ni em? tih a ni a, achhan pakhat pawh, cheraw kan ah chuan mipa ten mau an khawng a, tichuan, an hmaah hmeichhia te an lam a, chu chu Juda dan nen inmil lo riaua hriatna avanga rawn a ni a, ani Rav chuan theihtawp chhuah puiin, a zirna Rav te a lo rawn ve bawk a, tichuan, kan Benei Menashe Rav chuan Kiriat Arba hmunah mipuite ko khawmin a zirna Rav lo chhan dan te chu hriattirna a nei a, a lo chhan dan zul zui chuan kei ni tan Cheraw kan chu a rem tawh loh zia te chu chiang tak leh kimchang tak chuan a hriattir a ni, hemi tuma a hriattirna thu hi HAKHOKHMA chuan record in vawi duailo HK_Channel lamah an ti chhuak tawh bawk a ni.


    Tichuan, Israel rama Benei Menashe thenkhat te chuan Chapchar kut ni tur atana an ruat Pesach kut lai chuan an lo tum tawh ang chuan Kiriat Arba hmunah chuan an hmang ta a, hemi tuma an chapchar kut hmang hian boruak anei tamin, sawizui a hlawh em em a ni.

 


    Achhan pakhat pawh, khami tum kum 2009 chapchar kut hmanna ah khan Mizoram lam unau te chuan Pathian hla tiin Kristian hla la khawmin a bu an rawn siam a, chung hla chhunga Isua tih hming awm te chu hming dang pea vuahin an rawn siam rema, tichuan, hemi tum chapchar kut hian chu Hlabu chu release a ni a, hei hi hman lai atanga Rabbi lian ten an lo sawi chamchi tawh hetiang Jentel hla leh Kristian hla te hi a hla thua tu hming emaw a chuan vang leh vang loh lam ni lovin, Juda te haw em em tu, Juda te lehkhabu rohlu Tanakh (Bible) pawh an duh duha hrilhfiah a, Juda mipui tam tak rinna lama chak lo tak tak te leh khawvel hnam hrang hrangte hnena kawng diklo thehdarh tu, chu kan lehkhabu rohlu hmang ngei chuan an duh duha hrilhfiah kawia, a neitu Juda te huattirna tur zawnga campaign leh missionary kuala P-thian leh a hnamthlan ti hminghliau tu te rilru pua an rawn phuah chhuah anih vang zawk a keini Juda ten an Pathian biakna ang hlaphuah reng reng te chu kan tan sak thianglo hulhual niin hei hi milem Pathian biakna vaivut kai theihna a ni, tia thutlukna an lo siam tawh ngei chu, khami tum khan tlangzarh a, an sawimawi zui tak avang khan boruak a sosang em em tawh anih kha.


   Tichuan, kum 2009 atang chuan kumtin Pesach kut lai chuan Chapchar kut chu Israel ramah chuan hman alo ni ve ta ziah a, kumtin he thu avang hian kan community chhungah ngaihdan inanlohna avanga inhnialna te, insawi elna te, invauna te, intihbuai phaha insual phah dawn hial hialna te alo thleng ta ziah mai a ni. Chu chang nilovin, hetianga Israel rama Benei Menashe ten chapchar kut anlo hmang thin ta chu Mizoram lam internet chanchinthar ah te chuan tihchhuah leh pholan alo ni ve ta zel a, chungah te chuan, Israel rama Benei Menashe awmte chu chung chanchin chhiartu te hnen atang chuan dem kan hlawh nasa em em zui bawk a, achhan pakhat pawh, an ni ngaihdan ah chuan Mizoram a an awm laiin an inti Israel em em a, Israel ah an zuk kala, intih mizo leh chakin chapchar kut te an hmang vel ti ten, leh an ni ngaihdan chuan Mizo hnam phatsanin Israel ramah an pem a, tun atakah an rawn inti mizo leh em em si a, ti ten min demin chhiartu mipui te comment pawh sang chuang a tling hial a ni, tichuan, chapcharkut hman atha tia sawi zuap zuap tute khan, khatia mizoram lam chanchinthara an lo tichhuak leh si te kha zah maka lain nawhreh leh tur tein kan han dil leh lawi bawk si anih kha.

 



    A enga pawh chu nise, kan sawi tawh ang khian, thu titlu thei leh Juda kan nih tawhna avanga mipui te tana hetiang inhnialnaa thu tithlu thei kan hnamah kan la awm miau loh avang chuan, kan duh duh leh ngaih dan danin kan sawi khawm thinin, kan Benei Menashe upa thenkhat phei chuan "Eng chap mah a char tawh loh hnua Chapchar kut lo hman chu, kam lohna zara awk phur phur awm tawk vel kan ni e" an lo ti ve cham chi bawk a, tin a then lahin, "Chap a char tawh loh hnua kut an hmang duh anih chuan, Se bawng no lim biak kut ti tein a hming hi thlak law law se" te an lo ti hlawm bawk. Tin, a chapchar kut hmang duh ten a hmang ve duh lote an sawi sel a, chutiangin, a hmang duh lo tuten a hmag duh te an sawi sel ve bawk, anih tak hi.


    Chapchar kut Israel rama hmang tura huaihawt tu ten an sawi tel ziah kan hnam inpumkhatna tur leh inlungrualna tur atan leh, kan thangthar ten kan History an lo hriat zel phah theihna tur atan an tih chungchang ah hian, an sawi hmasak zawk inpumkhatna tih thu chungchang ah khi chuan kan hlawhchham viau niin a hmuh theih a, tin, a pahnihna, kan thang leh thar ten an nu leh pa pi leh pute History an lo hriat ve zel theih nan tih thuah khi chuan hetia tum thum lai chapchar kut kan hmanpui tawhna ah hian mizo inchei leh lam kan tihpui bak chu chapcharkut awmzia leh kan mizo history thu,  an mahni tawng hriat Hebrew ngei a kan hrilh leh hriattir ri hriat ala ni lova, chuti lovin, Tehilim (Sam) sawi tirna te, Shiur (P-thian thu zirna) te kan neih pui zawk hlauh thin thung a ni. (hetia Sam sawi tirna leh Shiur te hi an mahni puala thil tha chu ni mahse, kan thupui sawi tak te nen hian thil inpersan hlauh a ni).  

 

 


    Eng le khaw le, he thuah hian hetiang em a, kan Community mipui ten enghlelha kan lo neih takah hi chuan ngawihbo pui chi mai ani ah a ngaih theih ta lo va, amaherawhchu, eng vangin nge a tira kan sawi tak ang khian, Juda ten ngaihdan inanlohna leh inhnialna an neih tuma an tih thin dan, ho te leh awl te style khi kan hman ve mai loh ang ni le.


    He thu chungchang ah hian chapchar kut hi kan hmang ve ngei duh a nih chuan, Rabbi lian te hmaa zep then neih chi a ni lova, chuvangin, thudik tak, chapchar kut lo chhuah dan te, hman lai atanga tunlai chena an hman dan te, chiang tak leh felfai tak, a kip a kawia hrilhin, hetiang hian hman alo ni thin a, tichuan, Israel ramah hian keini Benei Menashe te hian chutiang kha tiang chuan, Shiur nan te, kan thalai Rap/Hiphop lam thiam te in show na hun atan te, kan Rap thiam leh Zaithiam te in show na hun atan te, Kristian ho phuah pathian hla tia an koh Isua hming tellohna hla sak ho nan te, chai leh lam hrang hrang tih nan te leh mizo infiamna hrang hrang hmanga infiam na hun atan te, chumi khami hunah chuan kan hmang ve duh a, hetiang hian kum thum ngawt kan lo hmang tawh a, tia fel fai taka Hebrew ngeia ziak a, zawh nita mai se, tichuan, Rabbi lian (Posek Halakha) thutlukna a awm tawh chuan, 'Somekh' (rin) tur kan lo nei tawh ang a, chumi hnuah chuan a sawisel duhin a sawisel zui chuan Rabbi lian thusawi sawisel tu a lo ni tawh dawn a, chu chu ama chungthu tawh tur ni mai se.

 


    Hei hi he thu ziaktu ngaihdan hi anih angin, hetianga zawhna hi a awm lohva, sawi zui anih zel chuan, Israel rama  Chapchar kut hman fona khuaah ngei Rabbi lian leh hrawl tak, kan hnam buaina chungchang thu thenkhata kan lo rawn fo tawh chu a awm a, chumi hnenah ngei chuan thlen pui ala ni dawn a ni.


   He thuziah chungchang hi sawiselna anga ngai duh an awm chuan an thu a ni a, tin hei hian sawiselna emaw, sawi nawina emaw a hril ngei ang tih chu a ziaktu pawh hian a hre chiang a, amaherawhchu, hei hi thu dik leh prove na awm thlapa, vawi hnih mai nilo ngaihtuah anih hnua mipui te ti ti leh, thuziak hrang hrang thlur anih hnu a, a tulna in a awrthluk avang hrima thui tak thlir chunga ziah aniin, Rabbi lian hnena zawhna zawh dan tur pawh Hebrew a duan fel anih hnua ziah a ni.       

----------------------------------------------------------------------------------------------------------------------------------


Chapchar Kut:

 

     Mizo hnam te hian an history atangin Kut pui pathum an nei a, chungte chu, 'Chapchar kut' te, 'Mim Kut' te leh 'Pawl kut' te an ni a. Chapchar kut chu hlimhlawp uchauk takin an hmang thin a, hei hi an lova thing leh hnim te chu an vah thluk vek hnu ah an hmang thin a, hei hi lo atana an rama thing leh hnim te chu an sam thluk hnu thlai chi te chin a nih theihna tura, chung an sam thluk te chu hal anih theihna tura an nghah ro hun chhungin a ni a, hetih hun chhung hi, hun rei vak lo an awllen hun chhung, an nghah ro hun chhung a ni. Hei tih hun lai hi March thla tawp lam emaw, April thla tir lam a ni. 'Mim kut' hi mitthi puala kut hman thin a ni a, hei hi August thla ah emaw, September tha ah emaw an hmang tlangpui. 'Pawl kut' hi buh seng kut a niin December thla ah an hmang thin bawk.

 

    Tun tumah chuan a bikin Chapchar kut hi enge a nih chiah? tih i han zir chiang bik i la. Kan sawi tak ang khian hei hi April thla tawp lamah emaw, March thla tir lamah an hmang thin a, he kut hi mizo kut zingah chuan a lar ber leh an hman rei ber a ni. Chapchar tih hming hi an lova thing leh hnim an vah thluk tak hminga koh a ni a, chu chu 'Vahchap' tih a niin chuta tanga lak chu a ni. Tichuan, chung an vah thluk hote chu an nghak rova, chumi an nghah ro hming chawi chuan 'Char' tih hi phuah belh ani bawk.

 

   An hman tan dan chu heti hian a ni, Tum khat chu mizo hnam te chu Chin rama an awm laiin (1450-1700 bawr vel) he 'Chapchar' hunlai vel hian an khaw tlangval hote leh an Lal khawnbawl upa hote chu an ram chhuak a, amaherawhchu, hlawhchhamin engmah hawn lovin an lo kir leh ta a, an hlawhchham avang chuan an zak em em a, hmun khatah chuan eng tin nge kan tih tak ang tia inrawnkhawmin an kal khawm a, tichuan, Lal khawnbawl upa te chuan tlangval hote hnenah chuan "Eng vangin nge kan zah ngawt ang ni? kan hah vang talin intihhlim nan hah zu inin an intihlim tal tur a ni dawn lawm ni" tiin, tlangval te chu an hnem a, tichuan, khaw chhung kawtthler ah chuan tlangval ho te leh nula hote chu chhuak khawmin Zu chu an in khawm ta a, lam thaiin hlim takin hun chu hmang ta zawkin, an ram chhuah hlawhtlin hun dang ai mah chuan an hlim ta phian zawk a ni.  

 

    Chutia hlimhlawp bawla zu rui chunga an lam lai chu naupang te chuan an lo thlir hlawm a, tichuan, lam hote chuan naupang te hnenah chuan "Min en duh a nih chuan zu in chawi tur a ni" tiin an hrilh a, tichuan, naupang te chuan an in atangin zu rawn chawi chhuakin lam hote chu an tulh reng bawk a. He kut hi nula leh tlangval hote puala kut ni mahse, tar leh naupang chen chuan an rawn zawm ve bawk a, tin, he kut ah hian lam chi khat chu hmuchhuakin chu chu 'Chai' tih a ni a, he lam hi, hmeichhia leh mipa, nula leh tlangval te chu inkar thlaka inkhuah chungin kual an siam a, tichuan a laiah khuang pu awmin, zai chungin an lam ta a ni.

 

    He kut lo thlen hma ni engemaw zat atang chuan he kut lo hmuak hian an lo inpuahchah thin a, tlangval hote leh pa hote chuan kut sa tur atan an ramvak thin a, tin, naupang te chuan zu urin leh zu te chu an lo khawn khawm bawk a, Tichuan, kut ni alo thlen chuan Tlangau chuan khaw mipui te beng hriata auvin "Lusei vawk talh ni a lo thleng e" tiin a au thin a, chutiangin, a ni hnihna ah pawh chuan Tlangau chuan "Ralte vawk talh ni a lo thleng e", tiin a au zel thin a ni.

 

    Tichuan, kut zawh zan ah pawh chuan chhunzawm zelin, nula hote chu hnam incheia incheiin an kawr neih mawi ber ber te chu an rawn ha chhuak hlawm a, chutiangin, tlangval hote pawh chuan an kawr neih mawi mawi te chu an rawn ha chhuak ve hlawm bawk a, tichuan, nula leh tlangval te chu inkarthlaka inkuah chuangin kual an siam leh a, hmeichhe hote chuan mipa te dar ah kuahin, mipa hote chuan nula te kawngah an kuah bawk a, a laiah chuan khuangpu  leh sial ki tum tu te chu an awm bawk a, naupang hote chuan zu chu an lo sem reng bawk a, chutiang ang chuan zankhua chuan hlimhlawp vawrin an lam tlaivar ta thin a, tin, hetia a zankhatna a tlaivar zo lova lo muthlu te chu a zan leh lamna ah an tel ve thiang tawh lo a ni. Hetiang ang hian he kut hi ni 6 emaw, ni 7 emaw an hmang ta thin a ni.

 

    Kum 1961 ah chuan Mizoram state chuan he kut hi a rampum chuan an lo hmang ta a, tin, kum 1963 chuan an rama Kristian hote chuan he kut hi dodalin tihtawp lailawk ani , Tichuan, kum 1972 chuan Zirlai insuihkhawm pawl te chuan Aizawl khawpui center Sipai lammual ah chuan an lo hmang tan leh ta a, tun thleng hian chumi hmunah chuan an la hmang ziah ta thin a ni.

 

    Tunlai ah chuan he kut niah hian thil thar chi hrang hrang an lo belh teuh ta a, hetiangin, hnam lam hrang hrang te, inbuan te leh infiamna chi hrang hrang te. Tin, a zan lamah zai pawl chi hrang hrang te chuan Concert te an nei thin bawk a, tin, he kut ni hian kum tin  'Chapchar Miss' te an thlang thin bawk a, tichuan, he kut hi khawvel hmun tina mizo hnam awm khawmna hmunah chuan March ni 2 ah an lo hmang ta thin a ni.


*Chapchar kut in Hebrew - click here

 


Categories: Kehila, Community

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments