HAKHOKHMA Post Post New Entry

Chapchar kut

Posted by hakhokhma on April 1, 2012 at 8:25 PM

מה זה צפצר קוט?

in Hebrew - click here

   Mizote hian Kutpui pathuam kan nei a. Chungte chu Chapchar Kut, Mim Kut, Pawl Kut te an ni a. Chapchar Kut hi hlimna nia hman a ni thin a. Lo vah zawh tau thla(March) awllen lai hunah hman thin a ni. Mim Kut hi mitthi puala kut hmang thin a ni a, August thlaah emaw September thlaah emawah an hmang thin. Pawl Kut erawh chu pawl thlak fihlim fel vela hman a ni thin. Tun tum tan chuan Chapchar Kut chanchin tlangpui chuah hi khalh fal deuh dawn tai la, a tha awm e.


    Kan sawi tawh angin Chapchar Kut hi lo vah awllen lai, March thla tawp emaw April thla tir lamah emawah an hmang deuh ber thin a. Mizo Kut zingah chuan an uar ber leh hman hun chhung rei ber a ni a. Vahchap(lo atan thing leh nau sah thluk) phoro(char) lai huna hman thin a nih avangin Chapchar Kut tih hming hi a pu hlen ta a ni. A lo chhuah dan nia an sawi dan chuan, Chin State-a Mizote an awm laiin kum khat chu tlangvalho leh lalupate chu Chapchar laiin an ram chhuak a, kut bengin an rawn haw a ni awm e. Chuta an hlawhchham lo haw hrilhhai tihngaihna hre lo chuan lal upate chuan “Valate u, zahfakah lu em va chum suh, hah zu kan zu ngei tur a ni,’’a ti ta a.Tichuan nula leh tlangval dangte sawm khawmin an chen ta a, ramchhuak an hlawhtlin tum ai mahin an hlimna an tawng sang zawk mah a.


     Chutia an chenho lai chuan lu kai deuh chin tena nam deuh chhelhchawlha an lam vir vel chu naupang hovin chilthli tla lek lekin an lo en ni fahmiang,Upate chuan ‘min en chuan zu chawi rawh u’an ti a. Naupangho chuan zu an chawi a, chutia inkaihkuahho chu an in tulh bawrh bawrh a,a pui a nawiin he Kut rau chuan a fan chhuak ta a ni. Heta tang hian Mizo lam pui ber’chai’a lo chhuah phah ta a ni. He Kut ni vang-thla a lo thlen hma hian nasa fein an ur-lawk mup mup thin a. Val upate leh tlangval ten ram pilrilah Kut sa pelin an ram chhuak a, buh leh bal thar hlim hnianghnara ei leh bar a haw vanglai a nih avangin a khaw nawtin an lo inpuahchah a, naupangten zu lawm an khawn bawk a,tumah an ral bang lo a ni ber mai.Kut a lo thlen chuan ‘lusei vawk talh ni’ tiin tlang an au va, a ni hnihnaah Ralte ni an au leh a.


Kutpui kan ur khuangruah chiar nghian e,

Chappui rawh lovin a tul ngai lo:

Chappui rawh lovin a tul ngai lo,

Ka chung chhawrthla a vanglai lo maw.

(Suaitlanga kawlni lal lai/ Ca 1450 CE-Ca 1700 CE)

tiin.


    Zan a lo thlen chuan nulain an puan thulkhung an rawn bih chhuak a, vakiria an khum a, lal hlau lo thi te dahin thival, thifen leh thi-hna te an rawn awrh chhuak a, tlangvalho lah nalh mangkhengin an rawn inchei a, Thi-hna fang an rawn beh chhuak fur hlawm a ni. Tual laiah hmeichhia leh mipa inkar thlakin an ding kual a. Mipain hmeichhia koki-ah an kuah a, hmeichhiain mipa kawng hnung lamah an kuah vet hung a. A laiah khuangpui leh seki tumtu an awm bawk. Khuangpuin chai a la a, seki tumin hla a hril thung. Naupangin chaiho zu an lo tulh a, tlaivara chai tur an nia, chu chu an ziak loh dan neihsa chu a ni. An tlaivar loh chuan zan danga an chai ve a thiang tawh lo.


   A zan thumnaah Kut zan tiin mahni lu lama chai a ni a, zan linaah Zupui Ni tiin an lam nileng zak a, zan nganaah ‘Zuthing Chawi’ an tih Kut tana zu khawlsa chu in zawh ngei ngei tur a ni. Zan ruk naah ‘Ei puar awm ni’ an ti a, Ni Hrilh an ti bawk chu khawpumin awm ni an kham thin. Mizo nawlpuiina Mizoram an luh kum CE 1700 hnu lamah khan Chawngtui leh Ruallung khuaah Chapchar Kut an hman tum khan an chen rei hle a ni ang. Vakiin buh vui khuaah an rawn pu vu vu chu an hmu a, khua an hai tih an hre chauh va, thlawhhma pawh nei ta lo chuan an khua an teh phah ta a ni. Hei hi Chapchar Kut hman rei bera sawi a la ni awm e.


   Mizoramah chuan chiang fekfawka Chapchar Kut hman kum chu 1961 kum kha a ni a. 1962 kumah Synod Agenda telh a nih kum khan boruak a la awm vak lem lo. Kum 1963 Synod-ah chuan “Pi pu nun hlui kan duh tawk lote chawk thar leh theia din thar leh chu Kristiante tih tur a ni lo ve kan ti” tih thu hi an rel a ni. Mahse, hman zui tho a ni a, Feb. 25, 1966 khan Chapcharkut chu a tuk lawkah ram buaiin a rawn nanchin tak avangin hman zui a ni ta lo. Hun a rawn inher zel a, 1972 kum khan Mizo zirlai pawl General Confrenae chuan Chapchar Kut chu thar thawh lehin a huhova, hman zai an rel ta a. 1973 kumah chuan urhsun takin Aizawl lammual hman a ni. He mi kum atang hi chuan hman chho zel a ni a, hnam lam chi hrang hrang, inchei, zaithiamte sawmin hun hman thin a ni.

 

    Kawlphai Zofate awmnaah ve thung ah chuan Tahan hi a hmun pui ber a nihna angin 1965 kum khan Lushai Day tia hman thin a ni a, 1973 khan Lushai Day chu Chapchar Kut tia thlakin buatsaih thin a ni. 1973-1985 thleng kha chuan Tahan Primary School No.6 field-ah kum tin khel lovin hman a ni thin a, 1985 hnuah khan eng emaw rokawlhna a vangin tihtawp a ni .He kut ni vangthla Chapchar Kutah hian hnam lam chi hrang hrang, inchai, inbuan,thirtiang khawh, thu inziaksiak, e.t.c hman thin a ni a, zanah phei chuan Zodi Music Band-te mi a awi deuh ber thin.


    Chutia Chapchar Kut chawlh lai lawk ni ta vang vang chu ngaingam lovin Tahan-a hman puipate huaihawtna kal tlangin Tahan Mizo Kristian pawlte nen tangkawpin April 23,2005 khan EFCM Jubilee Hall-ah Chapchar Kut chu hman tan leh a ni a. Tun hma ang bawkin hnam lam chi hrang hrang Cheraw kan, Chheih lam, Khual lam, Dar lam, Sar lam, Pangpar lam, Zawlkhawsir, Zotlangsang, Kan zotlangram nuam, bakah Fashion show, lungden, Vollyball, thirtiang khawh, hnam hmanrua pho chhuak, mawl lai a tanga tun dinhmun thlenga nun zia (traditional) pho lan, thin a ni. Fiamthu thianghlim, leh zai thiam ten min awi tlei reng bawk a, mipui beng a fahin hluttu an tam tial tial a ni.


    Kumin 2011 pawh hian kum danga la tih ngaih loh Kawlphai Zofaten a ram pum huapin 30,31 March hian Tahan Centenary Hall-ah hman tum a ni leh a, hei hi Chapchar Kut a huhova vawikhatna kan hmanna tur a nih avangin khawng hrang hranga tlawmngai pawlten kawng hrang hrangin tan an la mek a ni. Hnam lam leh fashion show te, hnam ro thil pho chhuah te, Concert leh ennawm chi hrang hrang buatsaih tum a ni bawk.


Tlangkawmna:

   Chapchar Kut hi hun hmasa lamah khan sakhaw thil nen inkungkaih lo hiala ngaih a ni a,vawiin thleng hian chu dinhmun chu hmun a la luah thuk hle. A enga pawh chu lo ni ta se, kan lei tlakna (contex) azirin nun phung a danglam thei a, ngaih dan a in chen lo thung ang. Eng-le-khaw-le kan chenna mil zelin uar takin hman I tum phawt mai ang u .


By: Zalianthanga, Tahan

--------------------------------------

Bibliography

1. Dokhuma Rev.(Dr.), Hmanlai Mizo kalphung, J.D.Press, 1992, Aizawl, Mizoram

2. Lalrinfela (mafaa)H, Chawlhna tuikam, Gilzom Offset, 2002, Aizawl, Mizoram

3. Chuauthuama (Revd), Chinbawr, lengchhawn Press, 2006, te Aizawl, Mizoram

4. Lalthangliana(B), History and Culture of Mizo India,

Burma&Bangladesh, RTM Press, 2000, Mizoram

5. Tahan, Lushai hnam puipate, Minutes(2005-2011)


Source: http://www.zoin.info/chapchar-kut-2/

 

Categories: Kehila, Community, History, Article

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments