HAKHOKHMA Post Post New Entry

Rabbi Elyiahu Avichail Shlit"a

Posted by hakhokhma on March 18, 2012 at 7:45 PM

      Rav hi kum 1932 khan Israel ram khawpui Jerusalem ah a lo piang a, 'Kfar Haroe' hmuna 'Yehivat Benei Akiva' a a zirlai kum 16.5 anih lai hian sipai (Hagana) ah a tang a, tichuan, hetih hunlai Independence war lai hian Israel Sipai (Tsahal) ah a tan chhunzawm leh a.

     Chumi hnuah 'Tirat Tsvi' hmun ah insawnin Nakhal (נח"ל ) Unit din tute zingah a tel leh a, sipai ah hian kum thum a tang a, 'Kibuts Yavne' hmuna an din Nakhal Unit ah chuan Platoon Commander ah a tang thin a, a sipai tan zawh hian 'Kibuts Saad' ah member niin kum nga chhung hetah hian Agriculture lamah leh zirtirna pein a hun a lo hmang thin a, chumi hnuah chuan 'Yeshivat Kerem Bayavne' ah a zir chho leh a, chumi hnuah Jerusalem a 'Yeshivat Merkaz Harav' ah kum 4 chhung a zir chho leh a, tin, chumi hnuah Rabbi nih trainingna hmun zirna sang 'Kolel Even Shmuel' ah leh a hmun bul vela P-thian thu zirna hrang hrangah Manager hna a chelh leh a, chumi hnuah Primary school ah te, Middle school ah te leh High school ah te zirtirtu hna a chelh chho zel a, tin, 'Lifshits College' ah Bible (Tanakh) zirtirtute training pein kum 20 chhung zet he hna hi chelhin zirtirtu tam tak a lo chher chhuak tawh bawk a, tin, hetih lai hian 'Jerusalem women College' ah Judaism lam thu a zirtir tel bawk thin a, tin, 'Yeshivat Nekhalim' High School ah leh 'Yeshivat Merkaz Harav High School' ah te Rabbi hna a lo chelh thin tawh bawk a, tin, amah hian 'Special teaching methods' hmuchhuakin chumi dan chu hmun hrang hrang 'Even Shmuel school' ah te 'Yeshurun High School' ah te a zirtir thin bawk a ni. Tin, kum 70 anih lai hian 'Hebrew University' ah Rabbi hna a chelh thin bawk a ni.


     Kum 1961 atang chuan zirtirna hna a thawh pah hian a damchhan thil tum nia a hmuh 'Hnam sawm bote an ram ngeia hruai kir lehna' chu rinawm tak leh a thinlung zawng zawngin a lo buaipui tan chho ta a, tichuan, research tam takte beiin, kum 1974 khan Jerusalem day hmanna ah 'Hnam sawm bote' chungchang thu sawi tura ngen leh sawm a ni a, tichuan, thu a sawi zawh hian Harav Tsvi Yehuda Kook זצ"ל leh Rabanim tam takte ngaihsan leh lawm a hlawhin, an nawrna leh an malsawmna avang chuan khawvel hmun hrang hranga hnam sawm bote zawnchhuah leh research bei chho zel turin 'Amishav Organization' chu a lo din ta a, he Amishav hmanga research a beihna leh a hna lo thawh te atang hian khawvel hmun hrang hranga Judaism community hrang hrang te hnenah leh 'Anusim' ho thlahte hnen te chu thlengin a chhui chho zel a, tin, Benei Menashe (Menashe fate) te pawh zawngchhuak in, Peru atangin mi 150 bawr velte pawh chu Juda dan dik tak hmangin a giur a, chung hote chu Israel ah Jewish Agency ho ten hruailutin Elon More khuaah chentir niin an khaw hote chuan lawm tak leh hmangaih takin an lo dawngsawng a, chutiang ang chuan 'Baderekh Lirushalim' Community mi 100 bawr vel hote chu Mexico atangin an mahni Beit Kneset (Synagogue) ah hun rei fe ingiur theihna tura an zir hnuah giurin an lo hruailut ve tawh bawk a, hun rei vak lo an awm hrihna tur hmuna an dah hnuah Jerusalem khuaa 'Hasefer' vengah chuan in leh lo te pein a lo khawsak ngheh tir tawh bawk a, tichuan, 'Vera Kruz' leh 'Khalfa' ho te mumang chu atak ngeiin Jerusalem ah a lo thlen tir tawh anih chu.


    Chumi hnu kum 6 na, kum 1981 chuan India hmar chhak ram atanga palai te chuan Rav Avichail-a thianpa hnenah tanpuina lehkha an rawn thawn a (he lehkha rawn thawn tu hming te hi Hebrew University Library manager hian an hming a lo hre tawh lova) tichuan, chu lehkha chu lo endik niin, chumi chungchang thu chu sawi khawma committee neih anih hnuah, amah Rav Avichail-a hian hemi chungchang, an mahni chungchang hi chhuia zirchiang tur hian mawhphurhna alo la taa, an chanchin hi hun rei fe zir chian anih hnuah tun hma lam leh tunlai tea an Judaism nihna thu te, an hming 'Manasia' anih dan atang te chuan Menashe hnam ngei an nih chu ringin thutlukna chu tihtluk alo nita a, hei hi 'Midrash'lehkhabu hlui 'Pirkei Derabi Eliezer' a inziak Sam 60 na chungchang thu a hrilhfiahna atang chuan an nih ngei chu a rinawm lehzual em em a ni. (Chutah chuan Menashe fate chuan Plishtim hovin Beit Shean kulh banga Lal Shaul-a ruang an khaikan chunga ngilneihna lantirin la thlain Yavesh Gilad hmunah an phum a, hei vang hian hnam sawm bote zingah an lo kir leh hmasa ber ang tiin a in ziak a, chumi zul chuan 'Amishav' hote chuan India ram atangin ramthianghlim ah hruailutin an giur ta a, tichuan, Sakhawmi te khaw hrang hrangah chentir an ni hlawm a, heng hmunah te hian khawsak relin thlamuang takin an cheng taa, heng zawng zawngte hi Chief Rabbinate thu leh Interior Ministry te puihna a thil tih a ni.)


    Tunlaiah hian kum 50 hnu hian mi 1500 aia tam mahte chuan Hebrew tawng hmangin Israel ah an khawsa mek a, sipai ah te tangin, an khawsak chu nuam takin khaw hrang hrang ah te an hmanghlel mek a, an zinga tam tak te chuan an unaute leh an chhungte an kalsan tak te rawn pem ve thuai thuai theihna turin hma an la mek zel bawk a, heng zawng zawng te hi Rav Avichail-a chuan amah liau liauvin a ngaihsak reng a ni. Tichuan, tun thleng hian an "PA" niin, an nite nen hian inkungkaihna tha tak an nei tluang chho zel a ni.


     Tin, Japan ramah kum thum chuang mah 'Amishav' te hian tunlai hian research bei leh mekin hna tam tak an thawk mek zel a, an sakhawmi te 'Hashinto' hote hnenah chuan Judaism nih rinhlelhna tam tak leh tha tak tak hmuh mek zel a ni a, 'Amishav' te chuan hun lo kal tur hla vak lovah chuan hemi chungchang chhuina neih mek ah hian hma tam tak laa thil hmuhchhuah tha tak tak an neih an inring a ni. Tichuan, an ni hote erawh hi chu tumah Israel a la pem leh ingiur an la awm rih lo a ni.


     Harav Avichail-a hi khawvel hmun hrang hrangah leh Israel ramah pawh tawng hrang hrang hmangin hemi chungchang thu leh a lehkhabu ziah tam tak te chungchang te, a thuziah leh ama chanchin leh a thil chhuina thu vel sawi tur leh Lecture pe tura sawm leh rawih reng mek zel a ni a, tin, hetiang taka mi ropui leh kum 40 chuang zet hetiang lama hna thawk nasa anih avang hian Chief Rabbinate lam atang leh Education ministry lam atangin Rav hnenah hian Doctorate rank hlawh pek a ni.


     A nupui Rabanit Rivka Avichail pawh hi amah Rav Elyiahu Avichail nen hian a rualin kum 2012 (תשע"ב ) 'Jerusalem Yakir Prize' (Award) chawimawina hlan an ni dawn a, tin, afapa Rav David Avichail hi 'Yeshivat Mitspe Ramon' ah 'Rosh Yeshiva' anih hnuah tunah hian Yeshivat Ramot, Jerusalem ah 'Rosh Yeshiva' (Head of Yeshiva) ani mek bawk a ni.


    Tin, Rav Avichai hian lehkhabu tam tak a ziak tawh bawk a, chung zingah chuan 'Ten Tribes' (hei hi Hebrew, English, French leh Japanese a leh ani bawk a) te, 'Haovdim beerets Ashur' tih bu te, 'Judaism' tih bu tawng chi 13 laia leh chhawn te, 'Leor Hashakhar' tih bu te, 'Sipur Khaiai' ama chungchang thu ziahna te leh lehkhabu tam tak te a ziak tawh bawk a ni.


Categories: People, Kehila, Community

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

3 Comments

Reply Allenby Sela
3:19 AM on March 19, 2012 
A va ropui ve le! Kan lawmpui tak zet zet e.
Reply hakhokhma
8:42 PM on March 18, 2012 
Sharon Benyamin: Sawizawm ta leh lawk ila,lo ninglo hram mai teh ukhai.Hetia an In a kan awm hnu hian Kfar Etsion Kibbuts lamah engemaw hunchhung Ulpan Ivrit leh Yahaduth zir turin kan vaiin min dahphei ta a.Khamia kan awmchhung zawngte khan min rawn kanin min rawnfuih reng fo thin.Thla hnih tlinglo deuh chuta kan awmhnu chuan kei chu Yashivat Machon Meir ah min admit a,kannu leh Rivka Rei chu Machon Oroh ah a admit bawk a.Yashiva ka awmchhung zawngte chuan mi rawn kanin pocket money fahrante min pe fo thin a,a fapa ang chiahin min ngaiin keipawn ka pa ang chiahin ka ngai bawk a,Zoram lama nu leh pa leh chhungte ngaihna pawh mi a chhawk em em reng ani.A Inah a khat tawkin Shabbath hmang turin min sawm a,a changin hmunhla deuh a Shiur a pek dawnten min hruai thin a,Kibuts Beerot Itshak a kan thiandang awm tate min tlawhpui zeuh zeuh bawk thin.Tichuan rinloh leh beisei phak bakin Mizoram leh Manipur tlawh a tumtum khan kalve turin min sawm thut maia,beisei aia sangin Pathian khawngaihna kan changa,tum tamtak a lo beidawn tawhna thin Mizoram luh theihna chu khatih hunlaia Mizoram MP Pu Silvara puihna khan phalna a hmuh hlauh maia,rilru hlim tak leh phur takin Manipur leh Mizoram chu kum 1991 khan kan tlawh dun ani.Kawnglakah leh Hotel velah techuan a khat tawkin Shiur bakah fiamthu thianghlimte hi a thawh ve fo thin,khang hunte kha a ngaihawm hle mai.Kum 1992 sept thla chuan ama min duhsakna leh rawtna angin kannu nen hian kan lo innei ve ta a.Kum 1993 khan an Pawl Agudat Amishav hmingin kan nupain Mizoramah Community zirtir turin min tir liam leh a.Chumi kum vek chuan Thalai 42 zet Israel rama a rawn hruaite enkawl turin Gush Ketif lampangah khan kan hreh ve em2 nachungin min kalthlak tir leh ta ani.Hun alo rei a,eizawnna dang2 kan han dapkual hnuah Farm siam a Khamemoth(Green House) siam ve kan duhthu ka hrilh chu a lawmin min tuipui em2 ani,a chhan chu amah pawh hi a Israeli Army tanlaiin Kibuts velah Agriculture lampang alo tih thin avangin tha min tihpui hle.Khatianga kan thlai thar ve ngei mai an In a kan han peve thinte kha an nupa hian min lawmpuiin an fa an hrin ngeite an lawmpui ang chiah hian an hlim thin.A tir atanga vawin ni thleng hian kei chuan a biktakin midang zawng2 in in ngailove ka tihna nilovin ka ngai lehzual em em thin ani.Hetianga keima mimal chuah nilo,keini hnampumpui leh khawvela Israel Hnambote taima taka lo zawnga lohmuchhuaktu hi keini hman leh Am Israel pumpui tan hian chawimawi leh duhsakna hlan hi a phu ngawih2 ani.Amah hi Mashiakh kalkawng/Lamlian sialtu ropui tak ani chiang hlein ka hria.Keini Manasia fate leh Israel mipuite minla tichak zelturin Hashem chuan amah leh a thiannu chu hriselna leh damreinain Malsawmna tinrengin rawn vur zel mawlh rawhse...Amen.
Reply hakhokhma
8:42 PM on March 18, 2012 
Sharon Benyamin : Kan Pu/Pa tak zetzet Dr Rav E.Avichail hmel leh hming ziak ka hmuh ringot pawh a amah ka ngaihsanna leh ka ngaihna zual zel fo thin hi he chawimawina a phu hliah2 a lo dawnna azarah hian keima mimal tak nena inzawmna kan lo neih ve chungchang( tu thik mah changlo se) hi tlem azawng kan sawi ve hlek teh ang.A mah hi kum 1984 ORT Bombay ka zir ve laiin kan Hostelah lokalin thute a sawiin thlate kan la ho va,Israel ram Rabbi ka hmuh hmasak ber anih mai bakah a hmel atanga keini min hmangaihna mitmeng kha ka theihnghilh thei lo.Tichuan hun alo kal zela kum 1985 ah khan Calcutta ah Netanya Chief Rabbi Rav Shlush chu rawn tawiawmin Mizoram leh Manipur atangin mi engemaw zat kan zu kal a,a hmaa kan lo inhmelhriatna tawh nen interview velah pawh mi a tan hle a,Giur ti mai tura an thlantlinah chuan ka tel ve a,mahse hemi tum hian thulh leh ani ta a.Tichuan,kum1988 kuma Bombay a Rav Newman hova Beit Din lokal te chuan Manasia fa mi 25 lai chu min Giur ta ani,hemi tum hian amah tak a lokal ve theilo chu pawi a tiin duhsakna sangber min rawn hlan tho ani.Chutia kumpui linglet zet a lo vei chhung zawng chuan mi in Giur tawhte tan Israela kan kal theihna turin thil tul zawng2 alo buaipui char2 a,kum 1989 Nov thla ni 19,(21 Heshvan) nitak mai chuan Israel Ramthianghlim Ben Gurion Airport ah ngei mai chuan a thiante leh helaia Manasia nu pakhat Pi Rivka Dahan(Benyamin)te nupa nen chuan minlo dawngsawng ta ani.Tichuan Airport atangin a ma carah min phura,kei leh Suzani(tuna ka thai duhlaii hi) leh Rivka Rei chu ama In Yerushalayim ngeiah chuan min thlentir ta rap ani.Israel ram In nuam tak,Jerushalem khawpui,leh chawhlui hmasa ber chu a hovin kan chen tlang ta ani.Ka sawi tel duh em em chu a nupui fel tak leh Chadika em em mai Rabbanit Rivka in Nu nih zo taka min lo kuangkuah nghal kha ani.An In ah chuan zan 3-4 vel kan riak a,an nupa khan mi an ngaihtuah em2 mai a,keipek lah chu khawlum lutuk atanga khawvawt taka lut thut kan nih avangin hritlang awmna khan ka khuh bur2 mai lehnghal a,Pi Rivka chuan a fa ang chiah chuan mi bawihsawmin Damdawi tha tak2 te chu min pe nghal a,hmangaihna avang leh Israel damdawi siam ngei anih rinna avang ni ngei tur ani ka ngeih kher mai,ka lawm teh asin.