HAKHOKHMA Post Post New Entry

Thalaite kawmna leh titi puina

Posted by hakhokhma on December 22, 2011 at 7:45 PM

     Tunkar Yom Revii (21/12/2011) zan khan Kharsina khuaa Benei Menashe Israel rama piang ṭhalaite kawmna leh titi puina HK_Channel ah LIVE a neih pui a ani a, hetah hian kan Community an hmuh dan leh an ngaihdan hrang hrangte zawta titi puina kan nei a, chuta kan kawmna leh an chhanna te tlem azawng i han tarlang teh ang.


Zawhna: Ram dang aṭanga pem ve hnam hrang hrangte nen inthlauhna kan neiin in hmu em? Tih zawhna chu heti hian an chhang a.

An Chhanna: "A hmasain hnam dang hote chu atlangpuiin keini aiin an lo pem hmasa a, tin, an awm rei tawh zawk bawk a, hmun hrang hrangah nihna leh dinhmun sang tak tak an chelh hlawm tih kan hria, amaherawhchu, keini pawhin hei tunah chuan Sipai lamah te pawh officer te pawh kan nei ve tawh a, heng te hi step thar kaina chi khat a ni a, mahse, hetianga a hnam nawlpuia hmasawnna leh dinhmun sang lanchhuah tir natur chuan hun ala duh deuh mai thei" an ti a.


Zawhna: Anih leh hnam dang te emaw, Israelim kan tih mai heti laia lo awm sa te aia kan chungnun bikna leh kan special bikna eng emaw tak kan hnam hian neih neiin in hmu em? Tih zawhna chu chhan har an ti angreng hle a.

An Chhanna: "Kan (an nu leh pate) rawn kalna ram te chu ram hnuaihnung anih avangin heti laia lo awm tawh te hian atlangpuiin min en hniam avangin an mahni aia kan ṭhat bikna lanchhuah tir chu thil harsa anih mai bakah keini pawhin lanchhuah tir tumna leh duhna kan nei lo a ang," an ti a.


Zawhna: Anih leh, Israeli angin nge Hodi (Indian) angin in in hmuh?

An Chhanna: "Kan inhmu ve ve".



Zawhna: Anih chutia in inhmuh ve ve chuan, Israeli nia in inhmuh lehzualna ah thil tih in nei em? Benei Akiva (Sakhawmi Zionist thalai pawl) ah te in tel ve em?

An chhanna: "A tirah chuan kan tel ve vek hlawm a, mahse, kan ṭhian ṭhenkhat ten a free lo emai a ninawm tiin an chhuahsan a, khatia chhuak hote kha an inkawm khawm tel tel a, chung ho kohna chu anat zawk avangin, Benei Akivaa awm zel duh ho pawh a tawp a tawpah chuan kan chhuah phah ve nge nge zel hlawm avangin, tunah chuan kan vai deuhthawin tumah kan tel tawh lo a ni," an ti bawk a.


Zawhna: Anih leh Sakhawmi angin nge in inhmuh?

An chhanna: "Kan tet zual deuh lai chuan school ṭhaah te kan zir vek ṭhin hlawm a, chutah chuan P-thian thu leh thil ṭha tak tak kan zir hlawm a, chung kan thil zir te chu kan thinlungah hian a awm reng a, mahse, mihring kan nih miau avang leh heng laia lo awmsa kan ṭhian kawmte a zir angin thlarau lamah chak loh zual hunlai te kan nei hlawm a, amaherawhchu, kan zingah pawh mi fel tak takte awmin Yeshiva (P' thu zirna) sangah te an zir zel hlawm bawk a, tin, atlangpuiin heti laia piangte chu Yeshivat Tikhonit ah kan zir hlawm a, mahse sawi tawh angin, Yeshivaa zir ni mah ila, a Yehadut (Judaism) lama chak lo zawk ni anga kan lan fo ṭhinna a awm bawk a, tin, thleng tharte ho chu atlangpuiin an inthurualin an lo thlen tirh kum hnih kum thum chhung chu Sakhawmi viau angin kan hmu ṭhin a, amaherawhchu, Yeshiva ah te an zir ve miau loh avangin, tlema an awmrei deuh hnuah Khiloni (Sakhawmi lo) nun an la deuh zawk niin kan hmu a, an inchei danah te an sam meh dan ah te, chuvangin keini aia u deuh tuna Sipaia kal te phei hi chu Sakhawmi lo an ni tiin sawi ta i la, kan sawi sual tampui lo viau ang.

     Chutah chuan kan nu leh pa te hi chu an sakhaw mi hle hlawm a, kan rual u deuh kum 18 ching chunglam tuna sipai kal rual hote hi chu sakhuana lamah an hnufual em em a, keini rual hi tuilai rapin kan la awm a, tin, kan aia la nau deuh te hi chu an la ṭha viauin kan hmu," an ti a.


Zawhna: A nih leh kan hnam hruaitu hote lak aṭang hian thil dawn in nei em? Kan hnam hruaitu hote hian thil tihsak cheu an nei em? Engtin nge kan hnam hruaitute hi in hmuh dan?

An chhanna: "Kan hnamah hruaitu an awm tih kan hre lo, chutiangin, an lak aṭangin engmah dawn leh min tihsak hmuh kan nei lo, kan hriat zawng chu, kan upa hote hi an ṭawng chakin thil sawi an uar hle a, an thil sawi leh an thil vei zawng te ataka thil tih pui an neih kan hmu lova, tin, an mahni leh mahni insawisela inrel an uar hle tih kan hria, chu zawng chu a ni mai, Tin, pawnlam aṭanga mi ten min hmuh danah chuan thuhmun vek Benei Menshe in min hmu a, mahse, kan hnam chhungah chuan kan nu leh pate hian a hran vek nih duhin ropuina leh mite aia chungnun nih an duhin chung thu vel avang chuan kan hnam huam chhungah buaina leh inngaihlohna an siam niin kan hmu bawk" .


Zawhna: Anih leh, kan hnam huam chhungah hian Benei Menashe emaw Shevet Menashe tiin pawl hrang hrang pasarih vel lai a ding mek a, henga hruaitute ho hian Benei Menashe hnam hruai tute kan ni an inti hlawm a, hei hi enge in ngaih dan le?

An chhanna: "Hnam hruaitu ni turin tunge ruat a? Hnam hruaitu ni tur chuan hnampum hmelhriat leh hmanpumin an ruat tur a lawm," tiin an chhang bawk a.


Zawhna: Anih leh, in kum rual angah hian pawn lama in tlat chhuahna ah te mi dangte aia inchhuan bikna in nei ṭhin em?

An chhanna: "Nei tur kan ni a, a chhanchu, atlangpuiin Benei Menashe te hian thil kan man chakin thluak a thaa kan thiltih duh zawngah kan tuina anih chuan a ber kan kai fo ṭhin a, mahse, inlama kan nu leh pate lak aṭanga zirtirna leh enkawlna kan dawn kawngah hian kan nu leh pate hian min chhuang lovin, min ṭan lova, in kum rual kan nih chuan chutiang khatiang chuan kan ti ṭhin, tiin, min el sen khum ṭhin a, an lak aṭang hian hmangaihna leh inbiak pawh tawnna ṭha a awm loh phah fova, chuvangin, kan nu leh pa ten min treat danah kan rilru a hnual phah fo ṭhinin, runluihna leh engmah tih tui loh phah nan kan hmang fo ṭhin, an mahnin chutiang khatiang chuan kan ti thin an tia, mahse an mahni ah engmah han special bikna hmuh kan nei lem si lova, tin, hun lo kal zel turah kan nau zawkte tan pawha hun lo kal tur ala en zawk theihna tur chuan tunah hian chhung tinah te emaw, hnam pum huap ah te kan intihpumkhat hi kan hun lo kal zel tur titha thei tu awm chhun a ni, an ti.


Zawhna: Anih leh enge kan hnam thila zahna in hmuh thin?

An chhanna: Sahdah, Khaini, Talab tih vel kan uar lutuk hi ani a, tin, kan inchhunga an tih chu sawi loh, pawn kawtthler ah te khatiang a kawr vel te kha an paih mai mai zel si a, kan ṭhian ten mi an nuihsawh phahin min elsen phah ṭhin a, hei hi a zahthlak kan ti ṭhin, bawlhhlawh bawmah te ṭha takin paih thei ṭhin sela chuan a ṭha viauin kan ring.


Categories: Khinukh, Education, Kehila, Community

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments