HAKHOKHMA Post Post New Entry

Hilkhot Khanuka

Posted by hakhokhma on December 2, 2012 at 8:00 PM

Khanuka Halakhot te:


1. Bait Sheni (Temple 2na) hun laiin Israel ram chu Greek (Yavan) hovin an awp a, Israel te chu an tihrehawm em em a, an sakhua na te chu hnawl sakin Torah zir leh Mitsvah zawm te chu an khap sak a, hmun thianghlim (Beit Hamikdash) ah te chuan lutin thil thianghlim te chu an tibawrhbang a, chutiang chuan an tisa leh an thlarau lam chuan nasa takin an tihrehawm a, tichuan, kan pute P-thian chuan lo khawngaih tain Israel te chu Greek ho kut ata chu a rawn chhanchhuak ta a, tichuan, Khashmonai Kohen Gadol (Puithiam lal) chhungkua hmang chuan hnehna a rawn chan tir ta a ni.


 

   Chutia hnehna an rawn chan takah chuan Kohen chhungkua atang chuan Israel lalram chu din leh niin Bait Sheni chhiat theng chuan kum 200 lai chu an rawn lal ta a ni. Chumi hnehna an chan ni chu Kislev thla ni 25 (כ"ה כסלו ) ani a, chumi ni chuan Beit Hamikdah chu luah thar lehin an tithianghlim leh tan a, amaherawhchu, engtiklai pawha chhit thin khawnvar thianghlim (Menora) a chhit tur Olive hriak (Shemen Zait) thianghlim Kohen Gadol seal chuang chu an hmu zo ta lova, a tawpah chuan chutiang hriak thianghlim chu bel khat lek, ni khat chhit daih chauh chu an hmuchhuak ta a, chhit tawh a ngaih miau si avang chuan an chhi ta thova, amaherawhchu, thilmak lo thleng tain chu hriak chuan ni 8 chhung, Olive hriak thianghlim thar an siam leh thleng chuan mit lovin a alh ta reng a ni.


 

    He thilmak lo thleng ta hriatreng nan hian kumtinin Kislev thla ni 25 atangin ni 8 chhung chu hlim ni te atan hmangin Halel te chhiarin zantin bati chhi chunga hman thin alo nita a ni. He ni 8 chhung hi 'Yemei Khanuka' (Khanuka nite) tia koh an ni a, 'Khanuka' tih hming hi ni 25 na ah chuan Beit Hamikdash chu luah thar leh a ni, tihna a ni. (חנו בכ"ה ) .


 

    He Khanuka ni te hi hlimna hun atana hman thin anih avangin chaw tui tak leh puar taka ei chu Mitsvah ani a, chutiangin chhungkaw chawi eina ah te pa ber emaw chuan Khanuka laia thilmak thleng chungchang thu te chu a nupui fanau te hnenah a hrilh thin tur a ni a, tin, hetia Khanuka ruaitheh/chaw ei naah hian fakna hla te kan sa tel lo anih chuan 'Seudat Mitsvah' a tling lo a ni. Chutiangin hemi Khanuka nite hian Tsedaka pek te uar thin ani bawk, Tsedaka chuan kan nunna min chhanhim sak theih avangin.


 

2. Khanuka chhung hian chaw nghei thiang ani lo va, tin, Mitthi uina thu ang chi 'Hesped' pawh sawi thiang ani lo.

 


3. Khanuka ah chuan hna thawh thiang ani a, amaherawhchu, hmeichhe tan Khanuka khawnvar/bati alh chhung chuan eng hna mah thleng sil, rawngbawl takngial pawh an thawk tur a ni lo.


 

     Eng vangin nge hmeichhia te tan tihkhirh bik anih? Khatih hunlai khan hmeichhia ten an tuar nasa zawk a, achhanchu, nula thianghlim ten pasal an neih dawnin an inneih hmain Greek sipai ten an mutpui phawt tur a ni, tiin an chungah dan khirh tak an zam sak vang a ni. Tin, hemi tuma thilmak lo thleng hi Hmeichhia avanga lo thleng ani bawk a, Kohen Gadol Yokhanan-a fanu nula hmeltha tak mai chu a pasal neih ni alo thleng ve dawn ta a, a hmelthat em avang chuan Israel ram awptu Greek lal chuan mutpui turin a hnenah a hruai tir a, amaherawhchu, chu nula chuan chutianga a thianghlimna thliak tur anih avang chuan lal hnenah chuan thil pakhat a ngiat ve a, chu chu eitur Cheese (Tavshil Gvina) atanga siam a ken chu ei hmasa turin a ngen a, hei hi a tuihal theihna tur atana a tih a ni, tichuan, lal chuan ei sak tain a tui in a hal ta a, wine chu a in ta teuhva, tichuan, a lo rui ta hle a, a muhil ta a, chutia a mutthilh lai chuan a lu chu tan sakin Jerusalem ah a kenglut ta a, tichuan, Jerusalem a Greek sipai lal chuan a lo hmuhin an lal a thi tih a hriat chuan a lo hlau ta em em a, chu hun remchang chu a unau te ho chuan remchanga hmangiin Greek ho chu an lo do tan ta a ni.


    Chuti anih avangin he Khanuka thilmak rawn inirh chhuahna bul hi Bawnghnute anih avangin he Khanuka lai hian bawnghnute lam ei uar thin a ni bawk.


 

4. Eng hriak pawh Khanuka khawnvar chhitna atan hian a tlak a, amaherawhchu, he Mitsvah tihmawi zualna atan hian khami hunlaia an hman thin ang anih avangin Olive hriak (Shemen Zait) kher hman chu a tha bik a ni. Amaherawhchu, Olive hriak kher kan hmu lo anih chuan, hriak dang a eng fiah leh fai bik dang kan nei anih chuan chu chu hman pawh a tha thova, tin, bati pangai ang pawh a eng chu a fiahfai that avangin a hman theih bawk.

 


    Meipui a an loh nan kan mei/bati chhit chu a inhnaih lutuk tur ani lova, a hran thliah thliaha daha chhit tur a ni. Tin, kan bati chhit tura chu pathian dang/milem biakna ina mi emaw, chutiang biak nana an hman bik thin ang bati emaw chu thil tenawm anih avangin hman loh tur a ni. Chutiangin a phita (Ptil) pawh chu a thianghlim (Kosher) tur a ni, a tha ber ah (Mitsvah min hamuvkhar) chuan lapua atanga siam ngei chu hman tur a ni a, zantin hian a phita hi thlak ziah kher angai chuang lova, a hman theih chen chen chu a hman theih tho bawk.

 


5. A chhitna (Khanukia) a hun chi hlum atanga siam anih chuan a tuk zanah chuan a lo ung tawhin a mawi tawh loh avangin a tuka chhit leh nan atlak tawh lova, chuvangin a thar dang dah leh tur a ni. A chhitna a hi a lan mawi reng theih nan thir lam chi atanga siam ngei hman chu thil tha a ni a, kan nei zo anih phei chuan Mitsvah tihmawi zual nan Tangkarua atanga siam ngei hman theih phei chuan a tha hlei hlei.


 

6. A tha thei ang ber (Mehadrin min hamehadrin) a kan chhit duh chuan inchhung member tin te chuan a hran theuhvin an chhi tur a ni a, hetiang hian Ashkenazim dana kal te chuan an chhi thin nghe nghe. Sefardim danah chuan chhungkaw lu ber (Pa ber) in chhungkaw tan a chhi thin. A chhit danah hian zan khatna ah chuan bati pakhat chhit tur ani a, tichuan, zantin a hma lam zan ami te leh bati pakhat dang belh zelin zan riat chhung chhit tur a ni a, chhungkaw member tina chhi thin te chuan an bati chhit te chu a inhnaih lutukin an dah tur a ni lova, hei hi an bati chhit zat chu chiang taka a hran theuhva a lan theihna tur atana tih a ni. Tin, he Khanuka bati chhitna hi kum tluana bati dang kan lo chhitna thin hmunah chuan kan chhi tur ani lova, hei hi Khanuka bati bik ani tih hriat hran theihna tur atana tih a ni.

 


7. Mishna leh Gmara hunlaia an lo tih thin angin Khanuka mei chhit chu kawngka pawn lam, vantlang kawng kal te hmuh theihna hmun tura dah thin ani a, hei hi Nes (thilmak) puanzar nana tih a ni. Rampawna hnamdang hote nena inchenpawlhna hmuna kan awm anih chuan hnamdang ten an lo tihchingpen palh lohna turin mahni inchhungah pawh a chhit theih tho va, tin, inchhungah tukverh bulah pawh pawnlam a kawngkal te hmuh theihna hmun ah pawh a dah theih a ni. Tin, kawngka pawn lama kan chhi anih chuan a veilam 'Mezuzah' awm lohna lamah kawngka biang atanga sum (Tefakh) khat a hlaah hun tur a ni. Tichuan, kawngka a a luh leh chhuah chuan Mitsvah pahnihin a hual dawn tihna a ni.


 

8. Khanukia chu chhuat atanga sum 3 aia sang leh sum 10 aia hniama hun chu Mitsvah ani a, sum 10 aia sanga a hun pawhin ala theih thova, amaherawhchu, tawng (Ama) 20 aia sanga hun/chhit erawh chu thiang lo a ni. Achhanchu, tawng 20 aia sang chu mi kawngkal pangai te mithmuhin a huam tawh loh vang a ni. Amaherawhchu, inchhawng sangah emaw cheng anih chuan sum 10 aia sang pawh nise, tukverh ah pawh a dah thei a ni. Amaherawhchu, chu chu tawng 20 aia sang anih chuan kawngkal ho mitin a hmuh phak loh avangin an in luh chhohna kawngka bul ah chuan a hung/chhi mai tur a ni.

 


9. Khanukia a Bati/Mei te chu an insan hleih zung tur ani lova, a san zawng a inrual khai tur a ni, tin, a meia te chu an inhnaih lutuk tur ani lova, a alh tina te chu hriat hran theih an ni tur a ni. Tin, bati pangai kan chhi anih chuan an inhnaih lutuk tur ani lo bawk a, achhanchu, pakhat zawkin a pakhat bati hnun chu a hem sat chuan an chhiat phah theih avang a ni. Tin, bati pakhat phita pahnih awmhmun hrang nei ang chi pawh chhit loh tur a ni.


 

10. A chit hun hi Arsi pathum lan veleh chhit nghal tur ani a, khawtlai pui tur ani lo, Arsi lan hun atang hian Khanuka bati chhit hma chuan eng dang mah Torah zir tak ngial pawh tih loh tur a ni a, Arvit tawngtai phawt erawh chu a theih a, chutiangin, tih thin dan ah chuan Arsi lan veleh Arvit neiha chumi zawh veleh chuan bati chu chhit nghal thin a ni. Hetia chhit hma hian chhungkaw member tin te chu koh khawm phawt a, a huhova chhit thin tur a ni a, hei hi Nes puanzar natura tih a ni. Tin, kan bati chhit emaw, kan Olive hriak chhit chuan a lo berah darkar chanve tal a alh tling tur a ni.


 

    Eng emaw ro khawlhna avangin a hun chiahah hian kan chhi thei lo anih chuan, kan inchhung member dangte an la men chhung chuan a Brakha nen kan la chhi thiang a, amaherawhchu, an mu reh vek tawh anih chuan Brakha tel lovin kan chhi tho tur a ni. Tin, a chhit hun tur ang ah hian thil tih mamawh deuh ka nei anih chuan a hma lam 'Plag Minkha' (Arsi lan hma darkar khat leh tlem) atang pawhin ka lo chhi lawk tawh thei a, amaherawhchu, chutianga ka chhit hma dawn chuan ka bati chuan Arsi lan hnuah darkar chanve ala alh tling tur a ni a, chuvangin, Olive hriak emaw ka chhit dawn chuan a hriak chu ka dah hnem deuh tur a ni, chuti lova, arsi lan hnuah darkar chanve a alh tlin loh chuan Mitsvah tilo anga ngaih ka ni.


 

11. A chhit dan ah hian, a zan khatna ah chuan Khanukia a ka dinglam zawn ami chu ka chhi hmasa ber tur a ni a, tichuan, a zan hnihna ah chumi bul chiah veilam ah chuan a thar ka dah belh leh ang a, chutiang zel chuan zantin a veilam ah a thar kan dah belh ziah ang a, a thar ber zela chu kan chhi hmasa ber zel tur a ni.

    Khanuka bati eng kan hman sual palh lohna turin Shamash kan chhi tel thin a, hei hi Brakha sawi hma ah emaw, Khanuka bati tlar kan chhit zawh hnuah emaw chauh chuan kan chhi tur a ni a, Brakha kan sawi zawh veleha Shamash chu kan chhit palh chuan kan Brakha sawi leh a Mitsvah kan tihtur inkarah daidanna (Hefsek) kan siam tihna ani a, chu chu tihdan diklo a ni.


 

12. A zan khatna ah chuan bati chhi tur chuan a chhit hmain Brakhot pathum a sawi tur a ni a, (Lehadlik, Al Hanisim, Shehekhianu). A zan dang zawngah te chuan Brakhot pahnih chuah sawi thinin, Shehekheianu chu a sawi a ngai tawh lo a ni. Tichuan, Brakhot a sawi zawh veleh chuan a bati thar bera chu a chhi kai nghal ang a, tichuan, bati dang a chhit kai leh lai chuan 'Hanerot halalu...' hla chu a sa zui tur a ni. Ger (In Giur) chuan 'Sheasa nisim laavoteinu' ti ve lovin, 'Sheasa nisim leisrael' a ti thung ang. Amaherawhchu, 'Laavoteinu' tia a sawi pawhin pawm sak tho a ni.


   Onen (Mitthi nei, a mitthia an la phum hma) chu midangin a Brakha nen an chhit sak ang a, amah chuan 'Amen' a lo pe ang. Amaherawhchu, midang chhit sak tu tur an awm lo a nih chuan, amah chuan Brakha tel lovin a chhi ang.


 

13. A Mitsvah kan tih lai tak hi kan chhit kai lai chiah hi a ni a, chuvangin, chhit hma hian kan dahna hmun tur leh kan hriak dah zat chu kan fimkhur em em tur a ni, chuti lo chuan, sum 3 hnuai ah emaw, tawng 20 aia sangah kan chhi a, a hnuah a awmna hmun tur dik taka kan hun sawn chuan kan Mitsvah tih chu a 'Pasul' (Tlak lo) a ni. Tin, kan dahna hmun ah chuan thli a thaw nasa tih kan hriat a, tichuan, thli chuan darkar chanve a tlin hmain a lo chhemhlum palh chuan, Mitsvah tilo ang kan ni a, chuvangin, a thara Brakha tel lova chhit that leh tur a ni. Amaherawhchu, engemaw palh thua kan bati chu darkar chanve hmaa a lo thi anih chuan Mitsvah ti tawh ang tho kan ni a, mahse, chutiang pawh nise, Brakha tel lova chhit that leh tho thin a ni. Khanuka bati bik hmang chuan bati dang te chu chhitkai tur a ni lova, a Shamash emaw, bati dang emaw in chhit kai hlawm tur a ni.

 


14. A Mitsvah chhung, darkar chanve chhung chuan Khanukia a bati chhit eng chu eng atan mah, kan mita kan en chauh tih lo chuan hman thiang ani lova, chuvangin, eng emaw tihpalh thil thua a eng kan lo hman palh natur laka kan inven nan Shamash (bati dang pakhat) an bulah chuan chhit tel ve thin a ni a, chumi awmzia chu, Khanuka bati eng chu kan lo hmang palh anih chuan Shamash eng zawk hmang kan nih theih nan. Amaherawhchu, Shamash chu hriat hran anih theih nan bati dang rual aia sanga dah tur a ni.


 

15. Pirsumei Nisa (Thilmak thleng tlangzarh) anih nan Beit Kneset ah Khanuka bati chu a Brakha nen chhit thin a ni a, a chhimlam bang ah hun thin a ni. Chu chu Minkha leh Arvit inkara chhit thin a ni. Beit Kneset a bati chhit ah hian tumahin Mitsvah kan tina a tum sak lova, chuti anih avangin, Beit Kneset a Brakha nena chhi tu pawh chuan a inah Brakha nen a chhi leh tho tur a ni. Lusun lai chuan a zan khatna ah hian Beit Kneset ah a chhi tur a ni lova, hei hi 'Shehekheianu' sawi a ngaih vang a ni a, Lusun te chuan he Brakha hi 'Tsibur' (Mipui zingah) an sawi thiang lo a ni. Amaherawhchu, ama inah chuan 'Shehekhianu' chu a sawi tho tur a ni.


 

16. Hmeichhia te pawhin Khanuka bati hi an chhi tur a ni a, he Nes ah hian an tel ve tho avangin. Chutiangin chhungkaw tan hial pawh an chhi thei a ni, tin, Sfaradim te tan pawh chhungkaw pa ber a awm loh pawhin nu ber chuan pa ber chhit ai a chhi thiang a ni. Naupang pawh zirtirna ngaithla rual (kum 6/7 vel) chin chuan an chhi ve vek tur a ni.

 


    Mitdel chuan midang pakhat chhit chu rinpui vein 'Amen' alo pe thei a, tin, nupui a neih chuan a nupui chhit chu a ring ve thei bawk, tin, amaha awm anih chuan midang puihna in a chhi ve tur a ni.


 

17. Erev Shabat (Shabat dawn) ah chuan Khanuka bati a chhi phawt ang a, chumi hnuah Shabat bati a chhi leh tur a ni. Mahse, hei hi 'Plag Minkha' (Arsi lan hma darkar khat leh tlem) ah ani tur a ni. Tin, Khanuka bati chu Arsi lan hnua darkar chave alh tling tura buatsaih tur a ni a, chutiang anih loh chuan a Brakha sawi kha a loh thlawna (Brakha levatala) sawi ani tihna a ni.

 


18. Motsaei Shabat (Shabat chhuah) ah chuan Havdala tih phawt tur a ni a, chumi hnuah chuan Khanuka bati chu chhit leh tur a ni. Beit Kneset ah chuan Arsi lan hnuah a chhi tu tur chuan 'Barukh hamavdil bein kodesh lekhol...' tih Brakha chu a sawi ang a, tichuan, a chhi ang a, chumi hnuah Arvit an hmang ang.

 


19. Mi chu a chhit hunah hmun dangah awm ta se, a inah chuan a nupuiin a chhi tho dawn tih a hriat chuan a awmna hmunah chuan Brakha tel lovin a chhi tur a ni. Amaherawhchu, a theih hram chuan a awmna hmunah chuan midang chhit Brakha sawi chu a ngaithla hmasa zet ang a, tichuan, 'Amen' alo pe ang a, chumi hnuah chuan amah chuan Brakha tel lovin a chhi ve nghal ang. Tin, hmun dangah mi inah chutih hunlai chuan awm tase, a in lamah pawh chuan a nupui leh a fate awm ta lo se, a awmna in neitupa chhitna ah chuan a telve mai tur a ni a, amaherawhchu, chutia a tel hma chuan ama puala a telve theihna turin in neitupa chu pawisa tlem (Pruta) a pe ang a, tichuan, in neitupa chuan a hriak pawh chu tlem a mikhual pa tan chuan a leih belh ang a, tichuan, in neitupa chhit ah chuan a tel ve thei ang.


   Amaherawhchu, 'Hidur' (A tha thei ang ber) a chhi thin an nih a, chhungkaw member tin ten chhi thin an nih chuan, ama khaw chhunga hmun danga awm anih chuan a haw hunah ama pualin a chhi zawk tur a ni.


 

20. Khanuka laia a bati chhitna Khanukia a hriak bang awm te leh, a phita hlui hote chu Khanuka zawh ah mei chhemin chutah chuan a rawh ral tur a ni. Achhanchu, chungte chu Mitsvah tan bika a ruatte an nih avangin tihbawrhbang loh nan a ni. Tin, chu a mei chhem chu chumi atan tih chauh lovah chuan thil dangah a hmang lo bawk tur a ni.


 

21. Khanuka hun chhung zawng chuan Shome Esre ah leh Birkat Hamazon ah 'Al Hanisim' sawi tel thin a ni a, kan lo sawi theihnghilh palh anih chuan a hnua 'Shem Hashem' (P-thian hming) kan lam hman anih chuan kan kir leh thiang tawh lo va, amaherawhchu, 'Shem Hashem' kan sawi hma a kan hriatchhuah hman chuan kan kir leh tur a ni.


 

22. Khanuka chhung zawng chuan Shakharit ah 'Halel' tluan sawi thin a ni a, tin, 'Takhanun' leh 'El erekh apaim' leh 'Lamnatseakh' leh 'Tsidkatkha tsedek' te chu sawi loh tur a ni.


 

23. Khanuka laia Shabat ah chuan Sefer Torah pahnih lakchhuah thin ani a, a pakhatna ah chuan Parshat Shavua chhiar thin ani a, tin, a pahnihna ah chuan Khanuka chumi ni bika chhiar thin chu chhiar tur a ni. Tin, Haftara ah 'Roni Vesimkhi..' chu chhiar tur ani bawk. Tin, Khanuka lai chuan Shabat vawi hnih a tlak chuan a Shabat vawi hnihna Haftara ah chuan Lalte bu ami 'Benerot dishlomo..' chu chhiar tur a ni. Ni pangaia Rosh Khodesh Tevet ni chuan Sefer Torah pahnih lakchhuah tur a ni a, a pakhatna ah chuan mipathum ten Rosh Khodesh nia chhiar tur chu chhiar thin a ni a, tin, a pahnihna ah chuan a mi palina chuan chumi ni Khanuka a chhiar tur chu chhiar thin bawk a ni. 'Tadir vesheeino tadir tadir kodem' tih anih avangin, Rosh Khodesh chu Tadir anih avangin, Rosh Khodesh ta chu chhiar hmasak zawk tur a ni. Tisual palhin Khanuka ta chu lo keu hmasa zawk ta ang se, a koh a pawh chuan brakha lo sawi tawh ta ang se, chutiang dinhmun chu a nih chuan, tihthat leh kher angai chuang lova, Khanuka ta chu chhiar hmasain a hnuah Rosh Khodesh ta chu an chhiar zawm thei ang.

 


24. Rosh Khodesh Tevet chu Shabat nia a tlak chuan Sefer Torah pathum lakchhuah tur a ni a, a pakhatna ah chuan mi 6 in Parshat Shavua chu an chhiar ang a, tin, a pahnihna ah chuan koh 7 na chuan Rosh Khodesh ta chu a chhiar leh ang a, chumi hnuah 'Khatsi Kadish' sawi tur a ni a, chumi hnuah chuan Maftir in Khanuka chumi ni ta chu a chhiar ve leh ang. Tin, Haftara ah chuan 'Roni vesimkhi..' chu chhiar bawk tur a ni. Rosh Khodesh chu Khanuka aiin 'Tadir' ni zawk mahse, a Haftara chu pakhat chuah chhiar tur ani a, chuvangin, Khanuka ta zawk chu 'Pirsumei Nisa' (Thilmak puanzar) nan chhiar zawk tur a ni.


25. Brakha nena Khanuka mei chhit theihna hmun hi mahni in ah mahni tan leh chhungkaw tan emaw, a chunga kan sawi tak ang khian engemaw vanga midangte tana kan sawi sak anih loh chuan hmun dangah sawi a thiang lova, hetiangin:- puipunna hmun angah chuan tunlai Beit Hamikdash (Temple) awm loh lai hi chuan a chunga kan sawi tak ang khian Beit Kneset ah chuah a Brakha nen a chhit theih a, amaherawhchu, hmun dang ang khawtthlera Khabad ho chhit ang ah te, Mesiba (Party) tihna hmuna Khanuka mei chhit ang ah te hian Brakha sawi thiang a ni lova, tin Amen pawh lo pek thiang ani lo, mi tam tak ten he thu hi an hriat loh avangin Khanuka lai chuan mei chhitna apiangah Brakha telh zel tur emaw an ti a, tichuan, Brakha an sawi thin, hei hi thil dik lo a niin, Avera (Thil sual) lian tak a ni a, chu chu a lohthlawna Brakha sawi nihna aniin, thupeksawm ami angin a lohthlawna P-thian hming sawi nihna a ni.


   Hetiang dinhmun angah hian a Barkha sawi kher kan duh anih chuan a tihtheih dan chi khat a awm a, chu chu, kan awmna hmunah chuan naupang kum 3 aia nau a awm chuan, chumi chu chhit pui ila, tichuan, chu naupang chu a Brakha leh a tihdan zirtir pahin a Brakha hi a sawi theih, amaherawhchu, chutiang ang naupang kum 3 aia nau an awm loh chuan 'Shev ve al taase adif' tih angin, tih loh mai emaw, a hmingin a Bati chauh chu chhit mai tur a ni, Brakha tel lovin. (Harav Yakov Yosef Shlit"a).



מתוך הספר קיצור שולחן ערוך השלם

Categories: None

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments