HAKHOKHMA Post Post New Entry


view:  full / summary

Malsawmna bul chu Hashem atang chauhvin (Parashat Behar))

Posted by icolney2 on May 19, 2019 at 2:25 PM Comments comments (0)

Mi tam tak ngaihdanah chuan, mi in hna a thawh hnem phawt chuan sum a nei hnem ang tih a ni thin a. Chu thu chu a dik nge dik lo? Thenkhat chuan Tawngtai hman lovin hna kan thawk a, fate pawh enkawl hman lovin sum um in kan tlan thin bawk a, chu mai bakah Torah nikhat a reilo te tal pawh zir hman lovin kan buai ni leng bawk thin a ni. Shabbath niah pawh Tawngtai a Torah zir ai chuan a karleh a mi tur hnathawhna tur a tan hahchawlin theih pa tawp chhuah in kan mu thin bawk. Amaherawh chu heti chung pawh a sum leh pai khawlh theih bawk si loh chuan, khawi atang in nge hnianghnar na chu a lo thlen tak?


Kan Torah atang a thlir a chhanna kan pek dawn chuan a dik lo a ni. Mi tu emaw chuan rim takin hna a thawk a, mahse tlem te chauh a hlawh chhuak a, adang pakhat ve thung chuan tlem te chauh thawk in a hlawh chhuak teuh bawk si. Malsawmna leh hlawhtlin na chu vanneih dan a zirin a danglam mai em ni? Chunglam atang a Hashem Malsawmna tel lo chuan Malsawmna hnar a awm thei lo a ni.


Hashem chungah rinna engzat chiah nge kan neih fiahna chu Kum sarih chawlh, Shmita chungchangah hian a ni a. Kum khat chuang huanah hna thawk lovin, ram chu chawlh tir a ngai a. Chutia ram chawlh tir a nih chuan khawi atang in eitur leh sum lakluh a nih tak ang le? L-LPA P-thian chuan Israel hnam te hnenah chu thutiam siam sakin kum rukna a, a nakum kum sarih na eikhawp rah chhuak turin malsawm ka pe ang che u a ti a, ti chuan kum sarihna kumah chuan chu malsawmna chu eiin ami Israel hnam te tan chuan an kut hnathawhna atang in hahchawlhna hun min siam sak a ni.


(על פי מכילתא פרשת יתרו, בחודש השלישי פרשה א;)

Tunge thil pek pe hnem zawk (Parashat Emor)

Posted by icolney2 on May 19, 2019 at 2:20 PM Comments comments (0)

Achang chuan kan nu leh pa ten in a hnathawh tur tlem te min phut ve te hi peih lovin, kan thawk hnem ve tawk tawh viau ah kan ngai thin a. Ti chuan, thinrim in emaw lungawi lovin emaw kan tih hram hram a nih loh pawhin kan ti tha duh lo fova, a chang phei chuan, kan nu leh pa ten tih tur thu min pek te pawh chu kan tih peih lo chawk thin a ni.


Kan nu leh pa ten kan tana thil tam tam min tih sak kan in chhung a thil awm zawng zawng, thawmhnaw, thutthleng, eitur tui hnai tak tak te bakah kan chenna in ngei te chu kan nu leh pa te thawhchhuah a ni tih kan theihnghilh thin. Torah ah pawh thil hlan tur hrang hrang ti tur a thupek kan ni a, “Berâm emaw, bâwng emaw, kêl emaw, a pa chu a pui bulah ni sarih a awm ang a, a ni riat ni aṭang chuan hâl ral atân hman theih a ni tawh ang.” (Vayikra 22:27)


Miin halral thilhlan te a hlan dawnah tunge bawng emaw kel etc petu L-LPA P-thian chu a hrechhuak thin tur a ni. Hashem chuan, “Nunna ka pek loh hmasak loh chuan tunge tawngtai ang? Tu in nge In ka pek loh chuan a kawngka biangah Mezuzah vuang ang? Tu in nge Arbaat haminim Brakha chu sawi ang a, a leina tur sum ka pek loh chuan? Tu in nge a huanah miretheih te eitur thlawh hma sir zuah ang ram ka pe a nih loh chuan? Tu in nge halral thil hlan hlan tur pe ang, ran ka pek si loh chuan?” a ti a ni.


(על פי ויקרא רבה, פרשת כז. סימן ב;)

Thangchhuah puan sinin Josefa lim

Posted by Moshe Ilan on May 5, 2019 at 6:15 PM Comments comments (0)

Kum 100 vel lai chu Archeologist te leh Media lam te chuan Bible a kan hmuh ang Aigupta rama Hebrai hote sal tanna chungchang chu an phain, chutiang thil a awm loh zia min zirtir thin a ni. A chhan pawh an sul hnu ataka chhui chian tura hmuh tur engmah a awm lo tiin an sawi thin a ni. Wikipedia ah phei chuan Aigupta sal tanna atanga chhuahna chu Myth(thawnthu) ti hialin a inziak bawk a ni. Tel Aviv University a Archeologist hrawl tak tak te pawihin "he thawnthu hi Israel te hmanlai thawnthu lawrkhawm zinga pakhat a taka thil thleng si lo" tiin Prof' Zeev Hertsog chuan a sawi hial a ni. Chutiangin Prof' Israel Finkelstein pawhin "Israel te Aigupta a an awm thu hi eng evidence mah tlem te tal pawh a awm lo" a ti hial bawk a ni.


Amaherawhchu, hetianga chiang leh huai taka thu tlukna an neih ang hi chhut chian chuan an thelh fuh deuh chu a ang ka ti. A chhanchu, Aigupta rama Israel fate an chhuk tirh khan chhungkaw pakhat hung tak chhukthla kha an ni a, an sulhnu pawh hmu pawh nise, Bible a hnam anga Israel faten Kanaan ram an rawn luah tak hnua an sulhnu nen chuan thil tam tak a inang thei dawn lo a ni. An hunlai ah kha chuan Israel fate kha Shema thlahte "The Semitic people" zinga chhiar tel an ni a, tichuan, tunlaia Archeologist tena hmanlai Aigupta hmun hlui an laih chhuah zingah heng Shema thlahte sulhnu leh an thilhlui vel tam tak an hmuchhuak a ni. Tlema Archeologist lam chanchin hria te chuan Egyptologists chungchanga hriatfiah har an tih ber pakhat chu hmanlai Aigupta hunlaia an ram chhunga hun/chhuan hrang hrang te sulhnu History thil an laihchhuah te inthlauhna chu a ni. A chhanchu, thil hmunkhata an hmuhchhuah si amaherawhchu, chung an hmuhchhuah te chu hun inkar hla tak tak kum 100 lai laia in upat hleih te an ni hlawm a ni. Chuti anih avangin hetiang chhui tute hian Bible a a sawi Aigupta sal tanna ata an chhuah hun leh an sulhnu niawm tak thil te chu an chhui mil hlei thei thin lo va, chuvangin "ani lo, a thleng lo, a awm tak tak lo" tiin thu tlukna an siam phah chawk ta thin a ni.


Archeologist pakhat Manfred Bittac, Austrian Institute of Egyptology chuan hmanlai Aigupta hmun hlui Hyksos khawpui Avaris hmun chu kum 30 chhung lai haiin a lo chhui tawh a, he hmun hi Tel A-Daba Egypt hmar lama awm a ni. Heta a thil hmuhchhuah zingah hian Israel fate sulhnu a puh theih Bible thu mil thil tam tak a awm a ni. Chumi awmzia chu he Avaris hmun ah hian hmanlaiin Hebrai hote an lo chetla viau niawm a ni.


He Avaris hmuna an thil hmuhchhuah zingah hian Kanaan kutchhuak thil tam tak a awm a, heng te hi Aigupta kutchhuak leh an thil ani lo tih a chiang hle a ni. He hmunah hian ran leh Beram ruh tam tak hmuhchhuah a ni a, hei hi Aigupta ho te chenna hmuna thil awm ngai miah lo a ni. A chhan pawh, Bible a kan hmuh angin (Gen 46;34) "I chhiahhlawhte hi kan thlah tute chenin, kan naupan tet ata tun thlengin ran vulh tute kan ni,… Beram veng tute chu Aigupta mite tenzawng tak an ni si a". Tin, an thlan hlui an hmuhchhuah ah te pawh an mitthi an phum dan ah pawh Shema thlahte inphumdan ang chiah vek an ni hlawm a, Aigupta hote mitthi phum dan nen a inang lo a ni.


Amaherawhchu, chuti chung pawhin hetiang thil hi hmuhchhuah ni mahse Hebrai ho, Israel te sulhnu chiah ani e tih tur erawh chu a fiahna tun thlengin ala awm lem lo. Heng mi te hi hmanlai Hyksos hnam hote pawh an lo ni maithei, amaherawhchu, kum 2000 vel kalta a Juda Historian Josefus chuan heng Hyksos hote hi Israel hote an ni, tiin lo ziak tawh mahse, a fiahna tak erawh tun thlengin ala awm lo.


Tun hnai deuh khan hetilai hmun ah hian mihring ruhro tam tak an hmuchhuak a, an chhuichianna ah heng ruhro te hi ṭam tuar leh mi cher tak tak an ni tih an hre thei a, chu ai pawha ngaihtuahna tithui thei chu heng an mi ruhro hmuh chhuah te zinga 50% lai hi naute ruhro an ni bawk a ni.


Tin, thil mak leh deuh chu he Avaris hmun hi a mi cheng ten an chhuahsan thut tih an la hmuchhuak leh ta zel zel a, tichuan, hemi hnu ah hian Aigupta ram chuan harsatna namenloh tawk zuiin kum 100 vel zet hetiang harsatna lak ata an dinchhuah leh theihna tur hian hun a duh ani tih pawh an hre thei a ni. Heng thil an chhuichhuah te hian Bible Exodus bua kan hmuh te nen thil hmehbel theih viau chuan a lang pang mai a ni.



LAL IN

He hmuna ah hian Lal in niawm tak in lian tak mai an laichhuak bawk a, he Lal in hi Aigupta ram in sak dan ang lo takin The Bronze Age hunlaia Syria mite in sak dan ang style a sak a ni a, hetiang in ang Style hi Haran ram hlui sulhnu ah hmuhchhuah tur tam tak a awm bawk a ni. Ngaihruat dan ah chuan he in sa tute hi Aigupta mi an nih a rinawm lohva, Bible atanga kan hriat angin Jakoba te chhungkua kha Haran lam chhuak an nih kha. Tin, he in lai ah hian ban lian pui pui 12 lai a intung sung bawk a, hei hian he in hi Goshen rama Josefa Lal in kha ani thei mai ang em? Tih min dawn tir thei viau mai a, Josefa khan a unaute zatin (Israel hnam 12) heng ban te hi awmze nei takin a lo tung tihna em ni ang?



THLAN HMUN

He Lal in kiang ah hian thlan hmun a awm a, he thlan hmun ah hian thlan 12 chiah a awm bawk a ni.



JOSEFA LIM

He hmuna Aigupta Lal in rorel tura a dah Governor Shema thlah pa tan hian Lal ni lem lo tena an chan ve phak ngai loh, khawi hmunah mah la hmuh ngai loh Pyramid hial a thlan atan a din sak a, heta tang ringawt pawh hian he hmun rorel tupa hi Aigupta Lal hian a duhsak tawk viau anih a rinawm. Amah hriatrengna tur atan he Pyramid ah hian lian tawk tak mai meter 3 laia sangin a lim a din sak bawk a ni. He lim hi a vunah rawng enga chei a ni a, a sam chu mei rawng ang sen deuh thur a ni bawk a, tin, a kutah hian vawm-tiang a hum bawk a ni – heng zawng zawng te hi Shema thlah te symbol hlirhlak a ni. Tin, thil mak dangdai leh deuh mai Aigupta mite lim ang ve miah loh langsar tak he milim hian a neih chu he milim hian kawrfual zetial rawng hrang hrang nei a ha bawk a ni. a mak in ti ve em? Chu aia la mak zawk chu he a kawrfual ze tial dan hi hmanlai mizo te rawng neih chiah kha niin, han en thuak phei chuan mizo Thangchhuah puan a sin emaw tih tur hial a mawi a ni. Josefa hi mizo tena kan inchhuina pa Menashe-a pa kha ani a, he a pa (Jakoba) in a kawrfual ze tial nei a lo thui sak rawng kha kan pi pu te hian an lo chhawm ta zel em ni ang? Hetiang rawng hi keini Menashe fa inti te pawh hian kan kir lehna ram ah hian kan chhawm lut zel a, hman deuh khan Kiriat Arba khuaa nu pakhat chuan Beit Kneset (Synagogue) ah Torah lehkhabu zial man to tak a present a, chu Torah bu zial khuhna atan chuan hetiang Josefa limin a hak ang rawng hian thui saka khuh a ni.


Thil mak leh deuh chu, he Pyramid ah hian a thlan chhunga a kuang niawm tak ah chuan ruhro pakhatmah hmuh tur ala awm lo lehta zel a, hei hi hmanlaiin Thlan rawk thin tu ten an rawk bo tel ani ang, ti dawn ila, heng ang mite hian thlan chhunga rohlu chiah an duh thin a, ruhro an ruk chhuah tel ngai hriat anih loh avangin, Bible thu nen a inmil leh ta em em a ni. Kan hriat angin, Josefa khan a ruh te chu Israel rama phum tura la chhuak tel ve tura a tih thu kan hmuh kha.


He Avaris hmun hi Archeologist te hian kum 30 chuang an lo hai/lai tawh a, amaherawhchu, tun thleng pawh hian 3% chauh he hmun hlui tak hi an la hai lang a ni.



ANKH

Pharoah pathumna 'Amenemhat' hnuaia Minister (Avazir) lar tak pakhat hming 'Ankh' an tih chu, he milim neitu (a lim an siam) a hi ni ngeia hriat a ni a, he a hming hi han chhut chian chuan Bible a Josefa kha anih a rinawm hle mai bawk a ni. Achhanchu, khatia roreltu dinhnun a a kaisan veleh khan Pharoah khan hming thar phuah sakin "Tsafnat Paneakh" (an hunlaia an lam dan – Tsafnat Pa Ankh) tiin a ko a nih kha. A hming thar awmzia hi "La dama chu" tihna a ni. Hei hi Pharoah khan Josefa leh apa Jakoba te an inhmuhkhawm ah khan a pa khan a thi tawh emaw a tih tawh si, mahse nung dama a lo la awm reng si a han hriat tak thu vel avang khan hetiang hian Pharoah hian a hming thar hi a phuah sak ta mai em ni ang?


Hmanlai Aigupta chanchin zirtu Egyptologists hote chuan he minister (Avazir) Ankh hi a thih hnuah afapa te pahnih 'Rasenab' leh 'Imru' te chuan an pa hna hi chhunzawmin minister ropui tak tak hna an chelh zui bawk an ti a ni. Hemi chungchang ah pawh hian Josefa khan fapa pahnih Menashe leh Efraim te a neih thu kan hmu bawk a, hemi te hi em ni ang heng Avazir te hi? Aigupta hming hran an lo nei ve reng tihna em ni ang le?


Avaris hmuna an hmuhchhuah zinga mi hmanlai lehkha 'Papirus' zinga Brooklyn Papyrus an tih, hei hi Aigupta lal Pharoah lai lai laihawl vela mi kha a ni a, hetah hian mihausa ni ngei tura rin bawih/sal 100 vel lai neitu diary ah chuan a bawih hming inziak lang hote chu Hebrai hming leh Shema thlahte hming hlir a chuang bawk a ni, hetiangin; Ashera = Asher (Gen 30;13), Skhara = Isakhar (Gen 30;18), Akuba = Yakov, te leh Shifra (nau char tu – Ex 1;15) ami te ang khan.


Ipuwer Papyrus ah pawh kum BC zabi 18 na lai vela thil thleng inziak han hmuh te phei chuan Exodus bua Aigupta rama hremna thil thleng vel chiah kha ani mai a ni. hetiangin;


Ipuwer Papyrus:

IP 2:5-6 Hmun tinah thisen a awm.

02:10 Lui chu a sen vek a.

(Ex 7;20) "tichuan, luia tui zawng zawng te chu thisenah a chang ta vek a".



IP 1:13 Hmun tinah suam hmang an awm a, chhiahhlawh te chuan an hmuh a piang an la a.

IP 3:2 Rangkachak te, rohlu te, tangkarua te chu bawihnu ten an nghawng ah an awrh a.

(Ex 12;35) "tin, Aigupta mite chu tangkaraw incheina te leh rangkachak incheina te leh,puante an dil a,"



IP 9:11 Leiah chuan eng reng a awm lo a.

(Ex 10;22) "Aigupta ram chhung zawng zawng chu nit hum chhung zet a thim ta mup a."



IP 4:13 Thing te chu a tlu a, thing zar te chu an thlawn hlawm a.

(Ex 9;25) "phula thing reng reng te chu a titliak vek a."



IP 3:16 hmun tinah chuan rumna leh tahna nasa tak a lo thleng a.

IP 2:13 mi tin te chuan hmun tinah an unau te chu an phum a.

(Ex 12;30) "tin, Aigupta ramah chuan tahna nasa tak a awm a, mitthi awm lohna in reng reng pakhatmah a awm si lo va."


He Avaris hmunah hian Nile lui lak penna Pium dil nena inpawh tirna a awm bawk a, hei hi Nile lui lianin hmun a tihchhiat lohna tura tih pin ani a, hei vang hian Aigupta ramah khan tam tla ta anih a rinawm hle bawk a ni. He tui kawng hi tun thlengin "Josefa tui kawng" tia koh ani bawk.




(A sei lutuk dawn.. ti thleng hi ziak phawt ila, hun remchang ah ka la rawn ziah belh ang….)


 

*Josefa lim - https://www.hakhokhma.org/apps/photos/photo?photoid=205697312

Jentel hnena zu in chungchang dan

Posted by Moshe Ilan on February 14, 2019 at 8:10 PM Comments comments (0)

Jentel hnena zu in chungchang – eng tiangin nge a thian loh a, khawi hmun ah nge?


Jentel wine in hi an chhang ur leh eitur siam ei ai pawhin a khirh zawk a, juda wine pawh nise jentel te khawih hnu te chu in thiang ani tawh lo a ni. Khakhamim te chuan Juda mi zu te pawh chu jentel te hnenah an mahni chauh pawhin in thiang lo ani an lo ti a. Jentel te ruai thehna leh intihhlimna hmun ah pawh an eitur te chu ei ve thiang ani lo a, an ni te nena kan inkara in inzawmna siam a tul hun angah leh innghirnghona emaw inhuatna a awm phah palh lohna hun tur angah erawh chuan ngaihdan hrang a awm a, tlema thlahzam deuh tur ti an awm laiin, chu tak chu intih fir a ngaih hun ti an awm bawk. Tun hma lamah chuan vantlang hmuha shabat bawhchhe tu chu jentel mi ang ngalngata ngaih a nih laiin, tun laiah erawh a dinhmun a hran ta deuh bawk. A zawhna awm ta a chu: puipunna hun party/mesiba ang ah te Juda thil culture ang ni lemlo ang chi ah inhnamhnawih loh tur nge, thiang lo bur?



Jentel te khawih hnu wine in thiang lo:

Khakhamim te chuan juda te kan tluk palh lohna turin pelh chin tur huang (Siagim) lo siam in, jentel te eitur siam te chu ei thiang lo an lo ti a, hei hi inneihpawlhna (Hitbolelut) lak ata kan intihhlat theihna tur atana tih a ni. Chuvangin jentel te eitur siam (Tavshil) leh chhang siam (Pat) te chu ei thiang lo tiin dan an siam a. Tin, Wine phei chuan lu a tihkai theih avangin leh kan lo inthlahdah phah theih avangin khirh leh zual zawkin dan an lo siam a, Israel mi wine pawh nise Jentel mi khawih tawh hnu ang te chu in a thiang tawh lo a ni, tiin. Chutianga a khawih tu Jentel mi chu milem be mi anih leh lek phei chuan a wine khawih hnu chu an milim hmaa an hlan thin anga ngaih niin (Yain nesekh) in a thian loh mai bakah chumi atanga hlawkna tel pawh chu a thiang tawh lo a ni. (Hlawkna tel tih hian jentel mi te hnena zawrh emaw a pek a pek pawh thiang lo a ni). Amaherawhchu, a khawih tu jentel mi chu milem be mi anih lem loh chuan in thiang ani lo a, mahse a lak atanga hlawkna tel chu a thiang thung a ni. (Jentel Milem be lo tih hian Muslim hote leh naupang nikhua la hre rual lo kum 5 chin vel a huam a, a bak zawng sakhaw dang zawng zawng te chu milem bia an ni a ni).



Jentel mi hnena zu in chungchang:

Khakhamim te chuan Jentel wine te, eitur chhum/kan te, chhang ur te eia in thianglo dan an lo siam tawh a, chutiang ang chuan Emoraim te chuan inneihpawlh (Hitbolelut) thlen lohna turin huang dang an lo siam belh leh a, chu chu Israel mi chuan jentel mi huam chhung, in chhung, dawr ah leh ama huam chhung hrim hrim ah chuan zu lam reng reng in thian lohna dan an lo siam leh a ni. ( עבודה זרה לא, ב ). Zu tih hian Whisky te, Arak te, Vodka te, Liquor te leh Beer ang chi zu ruih theih ang chi reng reng te chu a huam a ni. A thian loh dan hi Israel mi chuan Jentel mi huam chhung ah chuan amah chauh pawhin a in thiang chuang lo a ni. A chhanchu zu chuan lu a tihkai theih avangin Israel mi zahawmna tichhe thei tur ang chi anih avangin a thiang lo a ni. Tanaim hunlaiin he dan hi an lo siam loh nachhan chu an hunlai chuan wine chauh hi an lo in thin a, chu chu khirh tak maiin a dan hi an lo siam a, an hunlaiin heng zu lam chi hran hran te hi a la awm loh mai vangin an lo sawi tel lo chauh a ni. Tichuan, Babulon (Bavel) ah chuan heng zu lam chi hrang hrang te hi a lo awm tawh a, chuvangin Emoraim te hian wine ang thovin heng zu lam chi ah te hian dan an lo zam phah angai ta a ni.(ערוה"ש קיד, ו ).



Zu leh Chhang leh eitur chum chungchang inthlauhna:

Chhang ur leh eitur chum/kan ang chi ah chuan a thian loh dan chu an mahni jentel mi te siam kher a kawk a, chu chu jentel mi chuan Israel mi inchhung ah pawh a lo ti anih chuan ei thiang ani lo a, amaherawhchu, zu lam chi ang ah chuan jentel mi siam kher lam ni lovin jentel mi hnen ah in thiang lo a ni. Chuti anih avangin zu chu jentel mi chuan thil thianglo pawlh miah lohva a siam chu Israel mi hnenah chuan in thiang ani lawi a, achhanchu thil tuiril lam chi anih avangin jentel eitur siam ei thianglo danin a huam lo a ni. Amaherawhchu, zu chu Israel mi siam pawh nise, jentel mi hnenah emaw a huang chhungah chuan Israel mi chuan amah chauh pawhin a in thiang lo thung a ni. ( שו"ע קיד, א ).


Amaherawhchu, a reng/fo lo tur chi leh rui khawp lo tur chi angah chuan, Israel mi chuan Jentel mi dawrah pawh luta leiin a luna tihrehna tur emaw, a intihharhna tur atan chuan pek/no khat ang lek te chu inin a kal sawn leh vat thei/tur a ni. Tin, chutiang ang dinhmun ah chuan jentel mi chuan juda mi hnenah chuan zu no khat ang te chu khilaiin a in sak thei a, eng le khaw le thu duna an in dun dawn loh phawt chuan a in sak thei a ni. ( שו"ע קיד, א )  . Chutiang ang dinhmun ang ah chuan vawi/tum hnih lai pawh a in sak thei a, amaherawhchu, a vawi thumna tur chu a reng (kavua) ang chi anih tawh dawn avangin a in thiang tawh lo a ni. Chutiang ang dinhmun a reng/fo ang dinhmunah chuan inlaichinna (kirva yetera) a awm phah theih tawh dawn avangin a thiang tawh lo a ni. ( כנה"ג, פר"ח, כה"ח ו ).


Jentel ina innghah chungchang ah:

Juda mi chu zin chhuakin Jentel mi inah man chawi emaw a thlawn emaw pawhin innghat ta ang se, chutiang ang dinhmun ah chuan zu chu keng lutin a in thei a, hei hi hetia a innghah chhung hi chuan amah juda mi huam chhung anga ngaih ani a, tin, a lo khualtu jentel mi chuan zu chu lo pe pawh nise tlem chu a in sak thiang a ni, hei hi an inkara inhmuh thiamlohna a thlen palh lohna tur atana tih vang a ni. Amaherawhchu, chutiang dinhmun angah pawh chuan eitur leh chhang te chu a ei sak thiang chuang lo a ni. (תוס' עבודה זרה לא, ב "ותרווייהו", שו"ע קיד, א: ש"ך ב ).



Jentel te inhmuhkhawmna hmuna zu in chungchang:

Chutiang ang chuan, Jentel mite zu no dawma an inhmuhkhawmna hmun angah chuan Israel mi chuan zu chu chhe te pawh a in ve thiang lo va, chu hmun chu Jentel mi in kher pawh nilo mahse, inhmuhkhawmna hmun atana an hman hunlai hi chuan a in ve tur ani lo a ni. Israel mi chuan ama in tur bik a in atanga a ken pawh nise a in thiang chuang lo a ni. Amaherawhchu, chutiang ang hmunah chuan eitur kosher an chhawp ang te chu a ei thiang thung a. Tin, chutiang ang deuh chuan Israel mite inhmuhkhawmna leh Israel te tihdana inhmuhkhawmna anih chuan an zingah chuan Jentel mi te pawh tel ve mahse zu (wine ni lo) te chu in thiang ani thung a ni. (על פי רמב"ם מאכלות אסורות יז,י ).


Jentel te intihhlimna (Party) hmuna ei thian loh dan:

Jentel te ruaithehna emaw intihhlimna hmun ang, hetiangin; inneihna, lungphun, naute thar lawmna, an kut ruai – silvester, kum thar, christmas ang chi reng reng angah chuan a eitur lam aiin a ruai hming chu a pawimawh zawk avangin zu lam chi chu sawi loh, eitur Kasher pawh chutiang ang hmun ah chuan ei thiang ani lo a ni. He a thianlohna dan hi Torah atangin a ni a, Khakhamim tam tak te lo ziah tawh angin.(רא"ש, ריטב"א, יש"ש, ט"ז, ערך השולחן, נצי"ב ).


A thian lohna chhan chi hnih te, a pakhatna chu inngainat theihna a lo awm ang a, chu chuan inneihpawlhna (Hitbolelut) a siam thei a ni. A pahnihna chu, Jentel mi chu milem bia alo ni thei a, chuti anih chuan kan thil tih khan an milem biakna ah tanna (Tmikha) leh telve nihna a siam thei a ni. Chutiang hmun angah chuan Jentel mi chuan Juda te ruai kilna tur bik dawhkan siamin Kosher tha ber chi Mehadrin pawh chhawp mahse ei a thiang chuang lo a ni. Chutiang ang chuan Torah ah heng thianlohna chihnih ang te hi kan zir tawh a, "Chutilochuan chu mi rama mite hnenah chuan thu i thlung ang a, an pathiante lakah an uire ang a, an pathiante hnenah an inthawi ang a, an rawn sawm chein an inthawina (ruai) chu i ei dah ang e. tin, i fapate tan an fanute i nei ang a, an fanute chu an pathiante lakah an uire ang a, i fapate pawh an pathiante lakah an uiretir dah ang a.." tiin. (Shmot 34;15,16). Chutiang ang chuan Khakhamim te chuan heti hian an lo sawi a "Israel te chu rampawnah chuan thianghlim chunga milem bia ang mai an ni a ni, eng tiangin maw? Jentel mi chuan a fapa tan ruai a theh sak a, a khuaa Juda zawng zawng te chu sawmin an mahni eitur siam sa te chu rawn keng khawmin an tirhchhiah tur an hmaah chuan ding mahse, mitthi ruai (milem biakna ruai) kil ang an nitho a ni. ( עבודה זרה ח, א ). Hetiang ang hian Khakhamim te chuan lo sawiin Akhashverosh (Ahasuera) ruai chu kilin Israel mite chuan P-thian lakah thil an lo tisual ta a, chuvangin an chungah Haman misuala chuan dan thalo tak a rawn lekkawh ta a ni, tiin. (מגילה יב, א ).



Israel te tana hlauhawmna thlen theih thil thu ah:

Hetiang thil bawhchhiat theihna avanga heng Jentel te ruai thehna a tel ve loh avanga Juda te tana hlauhawmna thil thlen theihna ang chiah hian, kan eitur Kosher thianghlim kengin telve mai ila tih ah Poskim (Rabi te) te hnenah ngaihdan hrang a awm a, ngaihdan pakhat ah chuan – thiang lo, hetiang thil tih hi Torah in a lo vaukhan angin inneihpawlhna a thlen tir theih avangin hlauhawm thei thil pawh nise, ngaihzam a thiang chuang lova, chutiang avang tak chuan inkar hlat theihna hun remchang tha ani, ti an awm a. ( ט"ז יו"ד קנב, א ).


Tin, Thiang ani, kan telvena hichu hlauhawmna a thlen hlauhthawn thil mai chauh vang ani a, hetia kan telve hian inzawmna leh inngainatna a thlen lo ang a, tin, an thiltihnaah tanna (Tmikha) pek a nih dawn loh avangin thiang ani ti an awm bawk. (נקודות הכסף שם ). Chuti anih avangin engemaw loh theih loh thil ang (Shaat dkhak) ah chuan tlemin a lak zam deuh theih a ni. Amaherawhchu, chutiang dinhmun ah pawh chuan zu lam reng reng te chu in thiang lo bur a ni.



Vantlang hmuha Shabat bawhchhia te chungchang ah:

Shabat bawhchhiatna chungchang thu hi a khirh em em a, Khakhamim te chuan Vantlang hmaa Shabat bawhchhetu thilhlan (Korban) lo ken te chu pawm sak loh tur, tin, satalhtu pawh nise a sa talh chu a Kasher lo a ni, an lo ti hial a ni. (חולין ה, א: עירובין סט, ב ). Hetiang ang hian Rambam chuan alo ziak bawk a ni. ( שבת ל, טו ) : "Shabat leh milem biakna chuan Torah a thupek zawng zawng te hi an hen ve ve ani. Shabat chu Lalpa P-thian leh Israel te inkara kumkhaw chhinchhiahna a ni a, chutiang ang chuan, Mitsvot (thupek) dang zawng te bawhchhe tu chu - Israel misual tih ani a, mahse, Vantlang hmaa Shabat bawhchhe tu chu – milem bia anga ngaih ani a ni. chuvangin an pahnih chuan Jentel mi ngalngat ang ve ve an ni a ni", tiin.



Tunlai huna Shabat bawhchhe tu dinhmun:

Hetiang hi Shabat bawhchhetu dinhmun anih avangin Rishonim thenkhat te chuan vantlang hmaa Juda mi nisi Shabat bawhchhetu wine khawih hnu chu Jentel milem belo wine khawih ang ani tiin an lo sawi a, chumi awmzia chu a wine khawih hnu chu in thiang ani lo a, mahse jente te hnenah zawrh thiang ani a ni. (בה"ג, רבנו יונה, אשכול, ריב"ש, ועוד ). Marawhchu, he dan hi Gmara ah a chuang lem lo a, chutiangin Rishonim tam takte pawhin an lo thailang lem lo bawk a ni. Chuvangin Rabi thenkhat te chuan Juda mi Shabat bawhchhe tu wine khawih hnu chu in theih tho ti an awm a ni. marawhchu, Akhronim tam zawkte chuan vantlang hmaa Juda mi Shabat bawhchhe tu wine khawih hnu chu in a thiang lo an lo ti a ni.


Chutiang ang chuan (Shabat bawhchhe tu wine khawih hnu in thiang lo) chhuan tam tak Halakha an lo kalpui tawh a, achhanchu, Shabat chu Juda te chhinchhiahna ualau leh pui ber ani a, chuvangin vantlang hmaa Shabat pawisalo tu chuan Juda te rinna a pawisak lo zia a lantir ani a, Juda te ti Juda bertu lak ata inla hrangin a uire san tihna a ni a, Juda ah a inngai tawh lo tihna a ni. Amaherawhchu, tun chhuan hnuhnungah hi chuan Israel mi tam tak te chu Jentel zia in a nghawng nasa em em a, Shabat chu Juda te chhinchhiahna pui ber ni tawh lo ang hialin a nghawng tawh a ni. tin, hmanlai ah chuan Shabat bawhchhe tu te lakah dodalna lantir anihin kawngro a tha lamin a su thin a, marawhchu, tunlai ah erawh thung chuan, Shabat bawhchhiatna dodal anihin a zualzepui vaihlenhlo tih ang maiin nghawng tha lo tak tak a hring chhuak ta fo zawk a, chuvangin tunlaia Rabi thenkhat te chuan Shabat bawhchhia te zing rau rau ah pawh runluih hmanga Sakhawmi te deusawh zawnga Shabat bawhchhe tu te chauh chu Jentel mi ang ah ngai an awm bawk a ni. chuti anih avangin Shabat serh nachhang leh a dan hre lem lo, mahse, Shabat a thiam ang tawka ngai pawimawh a, Kidush emaw, Shabat mei chhite erawh chu Jentel mi angah an ngai lemlo a ni. tin, chu chang ni lovin, Sakhawmilo chhungkua atanga seilian a, tet te atanga Torah zirtirna dawng lova seilian te pawh Juda mi Jentel kara seilian engmah Shabat pawimawhna hre lo (Tinok shenishba) naute ang maia ngaih an ni bawk a ni. Tin, chutiang ang chuan Juda chhungkua ni si Sakhawmi chhungkua ni lemlo atanga seilian te pawh Khiloni (Sakhawmi lo) boruakin a chiahpiah nasat em avanga a awmzia a hriat miau loh avanga Shabat bawhchhe tute pawh Shogeg (tum reng vang lova tihpalh thil thua Shabat bawhchhia) anga ngaih an ni a ni. (בנין ציון חדשות כג: מלמד להועיל או"ח כ"ט: אגרות ראיה ח"א קלח ) . Tin, chutiang dinhmun mite laka kan fir uchuak chuan an chhungkaw karah leh vantlang karah hnuaichhiahna leh awm nawmlohna kan thlentir palh thei a ni. ( הרב יוסף משאש באוצר המכתבים ח"ב אלף שב ).



Harav Eliezer Melamed


Metsada chanchin

Posted by Moshe Ilan on August 7, 2018 at 6:05 PM Comments comments (0)

Metsada hmun hian History thu tam tak nei ni mahse, hun rei tak chhung a awmna hi hriat ani lo a, kum 1838 ah chauh khan hetiang thil hlui chhuitu pakhat Edward Robinson chuan a hmun hi a hmu chhuak ta a ni.


He hmun hi Israel chhak lama awm Dead Sea thlang lam tlang chhip hmun a awm a ni a, he tlang hi Dead sea atanga tehin meter 440 asang a awm a ni. an hunlai History chanchin ziaktu Yosefus (Yosef Ben Matitiahu) chuan hemi hmunah hian Hordus-a chuan a Lal in mawi zet leh ropui zet chu a sa tiin a lo ziak tawh a, amaherawhchu, hemi kum a a hmun an hmuh chhuah atang hian a Lal in chu an zawng tan nghal a, mahse hun rei tak chhung an hmuchhuak mai lo a ni.


He Metsada tlang hi tlang lian lemlo tak ani a, a chhip hi rawt zawl ani a, a dung zawng meter 600 a sei leh a vang zawng meter 200 chauh va lian a ni. Tichuan, hemi hmun te reuh te ah hian chutianga Lal in ropui chu zawn hmuh loh chi rual ani lo tih hre tho mahse, hmuh tur reng a awm lo a ni.


Tichuan, kum 1933 khan "Hanoar Haoved" pawl hotupa Shmaria Gutman chuan hemi hmun hi chhui chian a chhawm nun hna a thawk tan a, tichuan, a zirlai te pawh chu hetah hian hruaiin a hmun cheibawl that hna chu an thawk tan ta a ni.


Kum 1953 khan hetah hian Kibuts Mayan Barukh ami, Mikha Levana leh Zeev Mashal te chu kal vein Metsada hmar lampanga tlang pang awih ah chuan an nun thap tak meuh meuhvin hmun awihpang hlauhawm takah chuan an chhukthla ta a, chutah chuan an ni te hian Hordus-a Lal in sak ngei mai chu step anga chhawng thum ram chhia chu an hmu chhuak ta a ni.


Metsada chu tu lo din nge?

Yosef Ben Matitiahu (Yosefus) sawi danin kum 143 – 161 BC khan Khashmonai chhungkua ami Yonathan-a Kohen Hagadol chuan he hmun Metsada hi a unaupa Yehuda Makabi boral hnuin Greek hote laka helna an beih laiin a lo din ani, a ti a.


Tichuan, kum 42 BC ah Hordus-a chuan he hmun hi ala ve leh a, kum 40 BC ah khan Partim hoten Jerusalem an lak tum khan Khashmonai chhungkua ami Antigonus chu Juda te Lal atan an siam a, tichuan, Hordus chu tlan chhiain he Metsada ah hian a awm a, chutah chuan a chhungkua te leh a mipui te mi 800 lai te nen hetah hian an tlan khawm a, chutah, amah chu Rome ramah kalin a unaupa Yosef-a command na hnuai ah heng a mipui te hi a lo dah rih a, a mipui dang te chu Edom ramah a tlan chhiat tir thung a, chumi hnu ah Rome atanga a lo kir lehin Rome Lal te chuan Hordus chu Juda te Lal atan an siam a, tichuan, he hmun hi a awmna hmun atan siam nghetin kulh bang te siamin a Lal in pawh chu a sa ta a ni.


Hordus-a thih hnuin he hmun hi Rome sipai ten awmhmun khuar nan an hmang ve leh a, tichuan, Mered Hagadol (Rome hote laka Juda te helna) tan tirh kum 66 AD lai khan hetah hian Juda pasaltha Sikarim pawl te chuan heta awm Rome hote chu um chhuakin an awm ve leh tan ta a ni.


Juda pasaltha Sikarim pawl ten an hmun pui ah Metsada an nei

Metsada hmun chu kum 66 AD ah khan Juda hel pawl 'Sikarim' pasaltha ten Rome hote lak atangin an la a, an hotupa Menakhem ben Yehuda chuan hemi hmuna Hordus-a ralthuam dahthatna hmun kudam chu hawngin chung ralthuam te keng chuan Jerusalem a Rome hote do turin heta tang hian a feh chhuak ta a ni. Amaherawhchu, chutah chuan Menakhem-a chu a thi ta hlauh mai a, a tha chhang dawltu Eliezer Ben Yair chuan a pawlte chu hemi hmun ah hian kir puiin chutah chuan an inkulh ta a, he Metsada hmun hi Sikarim pawl te hmunpui atan an hmang zui ta a ni. Tichuan, kum 70 AD ah chuan Jerusalem chu Rome hote lakah a lo tlawm ta a, tichuan, chuta tang chuan kum 3 chhung he hmun Rome ho ten an lak theih hma chhung zawng chu Eiezer ben Yair hona hnuai ah he Metsada hmun hi vawn him ani a ni.


Rome hoten Juda ral tlan te an bei

Kum 72 AD ah Rome sipai hotu Flavius Silva chuan a sipai 10,000 te leh an ram awp chhunga hnam dang sipai 15,000 rual te nen Metsada chu lak an tum ta a, Metsada tlang chu hualin a sir tuak tuak ah te chuan camp 8 lai a din a, chung sipai rual tam tak te chuan Metsada tlang chhip a Juda raltlan puitling, nunau leh naupang te awm mi 967 mai te tukdawl leh man chu an thil tum a ni.


Chutia kum 70 na AD a Jerusalem leh Temple a chhiat hnu ah chuan ala dam chhun Juda pasaltha te chuan an ralthuam te chu paihthla tlawm mai zai rel chu an tum awzawng lo va. Hmun hrang hrang hmun 3 ah inthenin awmhmun an khuar a, Jerusalem chhimlam a awm Herodion ah te, Dead Sea kianga awm Metsada ah te, Jordan rala awm Mikhvar hmunah te chuan an inkulh hlawm a ni.


Chung la dam Juda te um zuia tukdawl tu tur chuan Rome sipai hotu Lukilius Basus chu ruat ani a, hepa hi Juda ram awp tura dah Judea Commisioner a ni. Hun rei lote chhung Herodion hmun chu a hual atangin ni rei lote ah a la thei ta mai a, chumi hnu ah Mikhvar hmun bei leh tur chuan a thawk chhuak nghal a, he hmun hi chuan kaina tur hmun chheng chhe tak a awm anih mai bakah kulh rinawm tak neia sak ani a, he hmun ah hian Jerusalem atanga Juda ral tlan sang tam tak te an lut khawm a ni.


He hmun lakna tura Rome hote chuan lei chhun vum hmanga lei an dawh te chu an hlawhtling hlei thei lo a, a chhanchu, Juda pasal tha te chuan an rawn run thut thut ve reng vang ani a, tichuan, hetia Mikhvar lak an tumna lamah hian Rome sipai te chuan nunna tam tak an hloh bawk a ni.


Tichuan, tum khat chu hemi hmun venghim tura Juda pasaltha te hotu Eliezer-a chu Rome hote chuan an man thei ta hlauh mai a, hei hian a pasaltha te chu a ti zam nasa em em mai a, mi tam takte chu Rome hote hnenah chuan tlawmin an inpek phah hial hlawm a, amaherawhchu, mi tam tak te chuan do zui zai an rel reng ta tho a ni.


Tichuan, Rome hote chuan eng ti tiin emaw he khua hi an la thei ta a, hemi tumah hian Juda pasaltha mi 1700 lai an thi a, tin an mi man hmeichhia te leh naupang te chu ram dangah sal atan an hralh vek bawk a ni. Amaherawhchu, chuti chung pawh chuan Juda mite chu mi tam tak an tlan chhuak thei a, heng tlan chhuak hote hi Jordan rala Gilad tlang ramhnuai velah te chuan tlan lutin an biru hlawm a. Tichuan, chung an bihrukna atang te chuan Rome sipai te hi an la do zui ta cheu a ni. Tichuan, Basus-a chuan chung tlan chhuak te chu a um zui a, hetia a umzuina ah hian henglai ram hnuai leh ngaw a thing to te chu a kit eng vek bawk a ni.


Chuti chuan, Juda tlan chhuak hote chuan an rawn nangching dawn tho tho tih an hriat avangin Rome Legion te chu an vaia thawk chhuakin an hotu pa Yehuda ben Ari ho chuan an bei ta chiam mai a, hemi ni hian darkar rei tak chhung an inbeih hnu chuan Juda mi zawng zawng te chu an thih zo ta vek a ni, hemi ni hian Juda te mi 3000 lai te chuan nunna an chan a ni.


Tichuan, chutianga Juda te tanhmun pahnih an tukdawl theih tak hnu ah chuan ala bak pakhat Metsada hmuna Juda inkulh te chu bei leh turin an thawk chhuak leh ta a , he Metsada hi Dead sea kam thlang lam panga tlang pawng chheng chhe tak, lawn kai harsa taka awm a ni a, hetah hian Juda pawl "Sikarim" hote chu an in khuar a, he mite pawl hi Temple chhiatna tura Rome sipai te do chhuak hmasa ber tute an ni a, he hmun Metsada a in kulh Rome sipai te chu indo tan tirh ah khan an lo um chhuak tawh a ni.


Hemi te pawl hi an ralthuam chu chemte luzum hi ani mai a, chu mi hming changchawi chuan an pawl hming ah pawh hian Sikarim tia koh an nita a ni, Sika (Chemte luzum). He an chemte hi mi pangai anga incheiin an puanhnuai ah an thukru a, chumi hmang chuan Rome hote mai bakah Juda mite pawh nise Rome hote tanrual puitu nia an hriat chu an phil hmiah hmiah mai thin a ni.


Hetianga an chetna firfiak avang hian indo tantirh lamah khan Jerusalem khaw chhung atangin Juda ten hnawt chhuakin an hotupa Menakhem-a chu manin an that a, tichuan, chung an hnawhchhuah te chu Metsada ah hian an hotupa Eliezer ben Yair-a hovin hetah hian an inkulh ta a ni. He tuna an hotupa Eliezera hi an hotu hmasa ber Rome hote lo luh tirha an laka helna lo chawk chhuaktu Yehuda tupa te zinga mi a ni.


Rome hoten Metsada an hual

Kum 72 AD ah chuan Juda rama Rome Commisioner te chu inthlakin Basus-a chu Flavius Silva chuan a rawn thlak a, tichuan, tun tuma Metsada lak pawh chu amah Silva kovah chuan a innghat ta a ni.


Tichuan, Silva chu sipai tam tak te nen thawk chhuakin Metsada tlang hualna tur atan a tuak tuak ah Camp 8 lai a sa a, camp leh camp inkar ah te chuan Juda mite an tlan chhuah theih lohna turin pal a hung chhuak vek bawk a ni. Chutianga pal an hung zawh veleh chuan a tlang chhipa lawn kaina tur leh an kulh bang sut kehna khawl te hlan kai theihna turin tlang thlang lamah chuan lei chhun vum hmangin dawhkai "SOLELA" asiam tan ta a, he dawhkai siam hi thil hautak tak anih avangin Rome sipai hnathawk tam tak te mai bakah sala an lo man tawhsa Juda mi tam takte chuan an siam ta mup mup mai a ni. He hna an thawh chhung zawng hian chung lam atangin Juda pasaltha te chuan meichher alh leh lung tum te hmangin an rawn vawm buai ve reng a, chuvangin hna chu a muan phah em em a, tichuan, kar tam tak an thawh hnu chuan an dawhkai chhun te chu an peihfel thei ta a, chutah chuan an 'MEKHONAT MATSOR" kulh bang sut kehna te chu an hlang tan ta a ni.


Amaherawhchu, tlang chhipa Juda awm te chuan kulh bang dangdai tak mai Rome hote kulh sutkehna in a sut chhiat theih loh tur kulh bang an lo sa chu niin, he an kulh hi a tuak tuaka thinga siam ani a, a karah chuan meter 4 laia chhahin lei an chhungkhat leh a, hei hi an khawl hmanga an han sut vel pawh chuan a ting ulh ulh chauh mai a, a lo sut chhiat theih der loh mai a ni.


Tichuan, Silva chuan a sipai te hnenah thu pein meichher hmanga chu kulhbang thinga siam chu hal turin thu a pe a, tichuan, kulh bang chu a kang tan ta a, tichuan, a tir lamah chuan Juda te lama tang ni awm takin khawchhak thli na takin a rawn tleh hum hum a, chu chuan kulh bang kang chu Rome hote lamah chhem pheiin an khawl te chu a kang kai ta hlauh hluah mai a, Juda te chu lawma hlimin an au dur dur mai a, marawhchu, thawk leh khatah thli chuan tanhmun thlakin khawthlang lam atang chuan khaw chhak hawi zawngin na tak in a rawn tleh let ta thut mai a, chu chuan kulh bang chhunglam thing te pawh chu a rawn hliau kai kang ta dur dur mai a, tichuan, a kara lei an chhunvum te chu a dawl ta lova a chim ta hawk hawk mai a ni, Juda te chuan "Lalpa kan lamah a tang ta lo ve" tiin an ngui takin an tap ta hawm hawm mai a ni.


Tichuan, khua alo thim tan ta bawk a, Rome hote chuan hmanhmawh kher a ngai ta lo, tunah chuan, "Awt chhunga sa an nih tak hi" tiin, a tuk lama tha thar chhuah pui zawk turin an camp lamah an kir san ta rih a ni.


Hemi zan hi Pesakh (Kalhlen kut) zan Nisan ni 15 zan a ni a, chu chu Jerusalem leh Temple chhiat atanga a kum thumna kum AD 73 na a ni. Tichuan, chutia Rome hote an kir leh rih bawk takah chuan chuta Juda awm hote a lu nungin mi 967 te chu Leil Seder Pesakh zan ruai theha hmang turin hmun pakhatah an lut khawm a, tichuan, an hotupa Eliezer-a chuan a mipui te hmaah chuan thusawina a nei a, "Kan in chhanhim nan engmah hmachhuan kan nei ta lova, amaherawhchu, tumah hi kan tlawm mai tur a ni lo, a chhanchu, kan tlawm anih vaih chuan rawngra thei ang bera tihhlum tur tho kan ni dawn si a, chutianga min tihlum lo anih pawhin kan dam chhung atan Sal a man leh hralh kan ni ang a, rawngra leh diriamna tinreng hmachhawn chungin sala tana chhawr hlum tur tho kan ni dawn ani a ni. Rome hote chuan an sal man patling te chu ennawm chhuahna hmuna sakawlh sehhlum tir turin an thawn thin a, tin, hmeichhia te leh naupang te chu an sipai te tan leh an awp ram hmun hrang hranga nawhchi zuar tur atan an hmang thin bawk a ni. Chuvangin, tunah hian kan pi leh pute Aigupta sal atanga zalen fa nitura bawih nihna ata an chhuahna ni ah hian zalen fa angin kan thi tur a ni. Kan nupui te chu an tibawrhbang lai eng tin nge kan thlir theih ang ni? Eng tin nge kan fanau te te te chu hliam nasa tak tuar chunga sala an chhawr lai kan en theih ang ni?" Tiin thinlung na tak chung chuan a sawi a.


Hetia a thusawi zawh hian mipui te chu darkar engemaw zat an tap hawm hawm a, an kawr te an pawt thler a, a tawpah chuan an hotupa rawtna ang zalen fa anga thih mai chu an pawm tlang ta a ni.


Tichuan, Metsada kulh chhunga in zawng zawng chu an hal chhe ta vek a, hetah hian an eitur dahkhawmna in Kudam chauh chu an hal kang lo a ni, hei hi Rome hote chuan an hmuh a, riltam vanga intihlum leh thi an ni lo tih an hriat theihna tur atana an zuah a ni.


Tichuan, mipui te tihlum tur chuan hotu 10 an thlang chhuak a, chung mite chuan tap chungin an nupui fanau te an thlah fel hnu chuan, mipui zawng zawng te chu an mu tlar ta dul mai a, tap chungin Shma Israel (Aw, Israel ngaithla rawh Lalpa chu kan P-thian ani a, amah chu pakhat ani) chham chung chuan hotu 10 te chuan an rawn tihlum ta nghauh nghauh mai a ni. Chutianga an mipui te an thah zawh hnu ah chuan hotu 10 te chuan bel kehthem ah an hming theuh ziaka thum vawrin an zinga pakhat chuan a thian te mi 9 te chu a rawn that leh ta nghauh ngauh va, tichuan, a tawpah amah pawh chu ama chem chuan a in vit hlum ve ta a ni. Tichuan, chumi zan chuan Metsada tlang chhipah chuan chutiang ang chuan thihna vantirhkoh chuan ro relin tlang chhipa pasaltha te inkulhna khua chu nghilh ta dukin a reh ta tlawk tlawk mai a ni.


Tichuan, a tuk zing ah chuan Rome sipai te chu phur takin kulh bang kang hawl huam tawh chu rawn su keh hawngin an rawn lut ta a, amaherawhchu, an mak tih tak maiin eng mah lo dan tumna leh lo do tum hmel reng an tawng lo chu an hrilh a hai hle mai a, tichuan, zawi zawia fimkhur tak chunga hma lam pan zelin khawimaw sir kil atanga an lo chan rukna hmun atanga an rawn tleh chhuak huk tur lak theihna atanga inralring tak chung chuan an veh lut ta them them mai a. Amaherawhchu, khaw lailai lai taka in lianpui ding kawngkhar an han hawn nak chuan, chutianga khaw chhung lo reh tlawk tlawk nachhan chu an hre chiaingin a awmzia an hmu chiang ta hle mai a ni.


Chu in chhungah chuan mipui nunau naupang chenin mi 960 lai an lo thi sawn nulh mai an han hmuh chuan an hamhaih hle mai a ni. Chutiang ang thil tihna chu Rome sipai senior tak tak te pawh chuan tunhma lam te ah pawh an do hnam te lakah hetiang ang reng thil hi an la hmu ngai lo a ni. Tichuan, khuarkhurum chhunga nu 2 leh an fate naupang mi 5 lo biru te chu an rawn chhuak a, chung mite chuan Juda te thil tihdan chu kim chang takin an hrilh ta a ni.


Tun tumah hian Rome hote chuan tum danga an tih angin an hnehna channa ah chuan hlim leh lawmin engmah pawh an ti lova, Juda te an hmelma laka thih aia an mahni leh mahni an lo intihlum te ruang chu zah tak chungin an ralthuam te hlip thlain chibai an buk hial ta zawk a ni.


He Metsada pasaltha te huaisenna thil tih hian, kan pu te tlawm duh loh avanga an huaisenna thil tih, Yodfat khuaa puk chhunga Yosef ben Matitiahu sipai te mi 38 te intihhlumna te, Gamla tlang chhip atanga Juda mipui nunau mi 5000 zet intihlum tura an zuan thlakna te, Migdal khaw mipui 2000 lai te tuipuia an zuan thlakna te, Jerusalem a Temple kang hluah hluah chhunga puithiam te an zuan luhna te, huaisenna chu a zui ve ta a ni. Juda pi leh pute chuan milem bia Rome hote laka an Lalpa P-thian uire san tura phatsan ai chuan tia P-thian hminga an mahni nunna hial hlanna Rome ho ten an awp ram dang mite tih ve ngai loh "Mesirut nefesh" nunna thapna chu hmuh tir tur leh an ram leh hnam, an P-thian tana an rinawmna an lantir na chu ava han zahawm teh lul em.


Kum 7 zet kum 66 na atanga kum 73 na thleng Juda te an ram ngeia an hnam tukdawlna tura Rome ram ropuiin a theihpa tawp chhuaha a sipai tam tak te nena rawn thawk chhuaka an beih hnu ah, kum tam tak Rome ram tluk chhiat hnu leh, an rimra pawh hriat tur a awm tawh loh hnu kum 2000 hnu ah pawh Juda te chuan ral thum mai tum lovin, an mahni ram ngei ah zalenna sual chhuak lehin mahni ram an rawn din thar leh ta a, chutia Israel in independence a hmuh tak hnu ah chuan, kum 1963-1965 ah khan Prof' Igael Yadin hovin Archeologiest rual te chuan he Metsada hmuna Juda pi leh pu mi huaisen te sulhnu chu hai lan a chhui chiang turin beihpui an thlak ta a, hemi tumah hian an thil hmuh chhuah hrang hrang te zinga thil pahnih te chuan lung a kuai hle mai a, chu chu hmun pakhat ah hlum bel keh them 10 an hmu a, chung ah te chuan Juda pasaltha te hming alo inziak hlawm a, hei hi Rome hote kut tuara thih aia an zavaia intihhlum thu an tihtkuknaa mipui te tihlum tur an thlan chhuah hote hming kha a ni a, chung bel keh them zinga pakhat ah chuan chiang tak maiin an hotu pa hming 'Ben Yair' tih chu alo la inziak kalh mai a ni.


Tin, a pakhat leh chu, hemi hmuna an inkhawmna thin, Torah an zir khawmna thin, leh an mipui te thinlung huaisen nei tura an infuihna hmun Beit Kneset hmun chu a ni a, chu Beit Kneset sir ah chuan pindan te reuh te pakhat an hmuchhuak a, hemi hmun hi an Torah savun lehkha bu zial te leh an ziak thianghlim hrang hrang te dahkhawmna pindan a ni. Chu pindan chhuat ah chuan chung an lehkhabu zial kang bang them te chu an hmu chhuak a, chung zingah chuan thuziak chhiar theiha him pial mai pahnih an hmu chhuak bawk a ni. A pakhatna chu Dvarim (Deuteronomy) bung tawplam ami, Moshe Rabeinu chu Nevo tlanga lawna chuta tang chuan ram tiam hmun tin mai a thlirna chungchang thuziak a ni a, (Deut' 34) "Tin, Moshe chu Moav phai atangin Yerikho zawna Nevo tlang, Pisga tlang chhip ah chuan a han chho va, Tin, Lalpan Gilad ram zawng zawng, Dan thlengin a en tir a, Naftlali leh Efraim ram zawng zawng, a thlang lam tuifinriat thleng, chhim ram leh Tum khawpui Yerikho phai ruam, Zoar thlengin. Tin , Lalpan a hnenah, He ram hi a ni, Avrahama te, Itskhaka te, Yakova te hnena, I thlahte ka la pe ang," tia chhe chham meuhva a tiam thu te.. a dang leh ah chuan , Ekhezkel bu a mi ruhro a hmuh thu .. Ezekiela bung 37;12 "Lalpa P-thian chuan heti hian a ti a a ni, Ngai rawh u, in thlan te ka hawng ang a, aw, ka mite u, in thlan ata ka chhuah tir ang che.." tih lai chang kha a ni.


Nangni Metsada pasal tha te u , Jerusalem khawpui thianghlim leh a biakbuk thianghlim chhiatna hmu a, in siamtu P-thian uire san lohna tura mahni nun hial thapa he hmuna lo muhil ta te u, vawiin ni ah hian Zawlneiin a lo sawi tawh angin tun hunah ngei hian a zawlnei ka atanga Lalpa thuchhuak ang ngei chuan a thu dikna tichiang tura he hmuna in sulhnu ah te hian zah tak chung cheuin kan rawn kal a ni.


Prof' Igael Yadin leh a hote chuan an Archeolgy hna an zawh fel hnu chuan Israel sawrkar chuan a hriatrengna leh zahna entir nan Medal a siam a, a pang lehlam ah chuan Juda pasaltha hotupa Eliezer Ben Yair-a thusawi ami "Zalen fa i ni reng ang u" tih leh,,a pang lehlam ah Hla phuah thiam Itskhak Lamdan-a lo sawi "Metdasa chu a thu chhe leh tawh ngai lovang" tih an chhu kai a ni.


Tichuan, kum 1969 ah Prof' Igael Yadin te hovina an hai chhuah Metsada pasaltha te ruhro 28 lai te chu Israel sipai te chuan a thara phum tha lehin ursun tak leh zah tak chungin sipai invui dan kimchang in an vui tha leh a ni.


Metsada hmuna hmuh tur awm te

Kulh bang: kulh bang meter 1400 zeta sei, a san zawng meter 5 a sang, a sir tuak tuaka lung banga rem, a zau zawng meter 4, a awm a, heng kulh bang ah te hian ral ven in sang 37 lai a awm bawk a ni.


Shvil Hanakhash: A chhak lamah hian Metsada tlanga lawn kaina kawng te kual kawi tak tak Shvil Hanakhash (Rul lamtluang) an tih chu a awm a ni.


Hordus-a tui dahthatna: A thlang lam ah Hordus-a Lal in leh Rome hote lawnkaina hmun inkar ah hian Hordus-a chuan tui dahkhawmna hmun 12 ngawt a siam a, heng ah te hian fur laia tui a luan luh theihna tura fing tak hmanga an luankhawm tir dan te chu a hmuh theih a, henga tui fur khata an khawl khawm te hian a khaw chhunga cheng mi 1000 te tan kum 7 chhung hman theih tur khawpa tam tui a khawl thei a ni.


Lal in: Thlanglam hmun ah hian tunhma zawng chuan Hordus-a lal in ni ngeia an hriat In tha zet zet mai a awm a, heng te hi Square meter 4000 zeta zau ani a, heng te hi "Haarmon Hamaaravi" tia koh a ni, mahse, kum 1953 ah khan a hmar lam pang awih ah chuan a Lal in tak zawk chu step anga chhawng 3 an hmu chhuak ta a, tin, an rin danin a chhawng hnuai ber hi Hordus-a nupui Miriami phumna thlan anih rin a ni bawk a ni.


Kudam: He an thil dahthatna hmun ah hian in lian tak tak 15 lai a awm a, heng zawng zawng te hi square meter 5000 bial a ni.


Beit Kneset: Temple 2 na hunlai atanga an lo chin tan tawh Beit kneset chu a awm a, hetah hian tawngtaina atan te, Torah zir khawmna atan te leh luhkhawmna atan an lo hmang thin a ni.


Mikveh: Tui thianghlimna inchiah thianghlimna hmun engemaw zat a awm bawk.


Thum vawrna hmun: an kudam hmun kiang ah chuan Binian Minhala office pakhat zau hel hawl a awm a, hetah hian hmun bel keh them 10 lai an hmu chhuak a, chung zinga pakhat ah chuan "Ben Yair" tih chiang taka ziak la chhiar theih a awm, hei hi an intihhlum dawn zana a tihlum tu turte thum vawrna atana an hman ngei anih rin a ni.


Thil hmuhchhuah dang te: Hlum bel keh them 700 lai ah thuziak hmuh chhuah ani bawk a, heng a thu inziak te hi , Hebrew te, Aramit te, Greek tawng te, Latin tawng te a inziak an ni hlawm.


Tlush – Lei rawhchan a Hebrew a thu inziak ania , hei hi eitur insem dan tur an ziah thu a ni.


Mihring hming: Lei rawhchana mihring hming inziak.


Savun lehkha zial 14 – Bible bung hrang hrang inziahna.


Coin 4000 – Mered Hagadol hunlaia Juda te pawisa thir te pawh a awm.


ISRAEL TE KHAWPUI JERUSALEM ALO NIH TAN DAN

Posted by Moshe Ilan on May 13, 2018 at 2:05 PM Comments comments (0)

Vawiin 'Jerusalem Day' pual hian Jerusalem atangin Jerusalem chanchin tawite i han thai lang ve hrim hrim teh ang.


A hmasa berin Juda ten "Aw, Jerusalem ka theihnghilh che chuan ka lei hi ka dang ah bet tlat se la, ka hriat reng loh che chuan ka kut dinglam hian a thil thiam theihnghilh ve nghal rawh se" tia an lo kur pui an khawpui thianghlim hi an thurin bu TORAH (Mosia lehkhabu panga Gen',Ex', Lev', Num',Deut') ah hian vawi khatmah a hming ang kawlh a thailan ani lo hi thil mak tak ani awm e.


Tin, chumai bakah Josua hova Kanaan ram an luh khan Israel hnam 12 te tana an awmna hmun tur an ram then theuh an lak duai duai lai khan eng vangin nge chuti ema nakina an khawpui hlut leh hmangaih tur Jerusalem chu an lo lak tel ve loh, tih pawh zawhna lian tak a tling awm e.


Khatih hunlai khan Jerusalem ala awm lo ani ani ang, ti dawn ila, Juda ten an pi leh pu te chen atanga ka a an inhlanchhawn an chanchin sawina ah Mosian enthlatu a tirh te khan Jerusalem kulh bang ropui leh sang lutuk, lung lian pui pui hmeithai in tia tia a sak intiang urh mai an hmuh khan, te chem chemin an inhmu a an lakah chuan khaukhuap ang lekin an inhmuh phah ta kha ani si a.


Tin, TORAH ah ngei pawh chuan Salem Lal Melkisedeka khan Abrahama a hmuh thu vel ziahlan pawh hmuh ani si a, heta Salem tih hi Jerusalem hi ani tih ani a, Jerusalem tia ziah lan ni lo mahse mithiam ten a awmna leh a chanchin an chhuina ah chuan he Jerusalem hi ani an ti a ni.


Hun alo kal zel a, Israel ten an khawpui kumhlun tur Jerusalem an luah tanna chu Lal Davida hunlai Hebron a a lal hnu kum 7 leh a chanve hnu ah an luah tan chauh thu kan hmu a ni.


Aw le, heti ema tun huna khawpui pawimawh ni ta si, tunlai thleng pawha khawvel titi titam tu ber Juda ten kan khawpui tia an puan, ram dang dang ten an pawm sak hleih theih loh, Arab Palestinian hoten an rawn chuhpui ve reng bawk si, hun rei tak khawvel ram chak ber America pawhin Trump-a hma zawnga an pawmpui thu a phuhchhuah ngam loh, tun naktuk maia an Embassy an rawn sawn luhna hmun tur, chumai bakah P-thian pakhat ringtu inti sakhaw pathum (Judaism, Islam, Christian) te hmunthianghlim ni bawk, a lehlamah khawvel ram hrang hrang khawpui zinga thisen chhuahna leh thisen dawt hnem ber tawh tu he Jerusalem khawpui hi Juda ten an lo luah tan theih dan thuruk hi tawi fel deuh taka sawi i han tum teh ang.


Gensesis bung 14 naa kan hmuh angin Abrahama chuan Lota chhanchhuah nan Lal 4 te a do thu leh a hneh thu kan hmu a, tichuan, ami chhanchhuah te nena an lo haw khan Salem lal Melkisedeka chuan lo lawmturin a rawn kal a, hetah hian lal pawh ni lo, ram pawh nei lo Abrahama chu heti lai ram lal te hian a huaisen zia leh a chak zia an lo hre ta a, tichuan, an hlau ta hle mai a, hun lo kal zel turah Abrahama chuan an mahni chu dovin an khawpui te chu a chhuhsak mai ang tih an hlau ta hle mai a ni.


Tichuan, an be tha ta hle mai a, thian thaa siamin inremna saui an tanpui ta a, Salem lal hian "Nang leh i thlah te chuan heti lai rampum hi neia Lalram in nih hma chuan ka chi leh hnam te hi min do lo la, kan khawpui Salem pawh hi min chhuhsak suh ang che", tiin bon a sign pui a ni. Chumi man atan chuan ani hian P-thian Chungnungbera puithiam anihna chu a thlahte (Cohen) tan a pe ve thung a ni.


Tichuan, hun a lo kal zel a, Israel ten Aigupta sal nihna ata an chhuah hnu, Josua hova henglai ram Kanaan ram an rawn lak lai pawh khan, Lal nei an la nih loh avangin Jerusalem chu he an pu te remna thuthlung avang hian khawihbuai ani ngai lova, chutiangin, Roreltu te hunlai pawhin Lal nei an la nih loh avangin Israel te hian he Zion khawpui chhunga awm Jebus hnam te hi an tibuai ngai lo va, an do ngai hek lo a ni.


Tin, he inremna thuthlung avang hian Josua pawh khan Israel hnam 12 te tana an ram then tur a rin sak lai pawh khan he Jerusalem khawpui hi a rin tel lova, Juda-a hnam leh Benjamina hnam ram chantur inkarah a dah a ni.


Mahse, Israel te chuan he khawpui hi hun ruat ni a an khawpui tur leh an P-thian in an la sakna tur ani tih an hre reng a, chuvangin 'Sameuela II' bung 2 naa kan hmuh angin Lal Davida chuan Saula thih hnu ah Juda hnam te Lal anih tirh phat pawhin P-thian chu rawnin Jerusalem chu lak a hun tawh em? tih a rawn a, mahse, P-thian chuan "Tun ah chuan Israel hnampum leh rampum lal ila ni lova, hnam pakhat lal chauh i la nih rih avangin tunah hian ala hun lova, i Lal in chu Hebron ah din hrih rawh" tiin a chhang a ni.


Hetah hian engvangin nge Lal Davida hian Jerusalem chu lak a hun tawh em? tih a zawh, kan tih chuan, a tet laia Zawknei hriak thih ani a, tichuan, (Samuela I, 17;54) a rawn len deuh hnu tleirawl te ala nih lai Goliata a virvawm hmanga a thah tum khan a lu chu lain Jerusalem khaw chhunga awm Jebus ho chu um chhuah a an khawpui chu lak sak tawh tumin ava kal ta mai a, mahse, an ni Jebus ho chuan an pu Melkisedeka leh apu Abrahama inremna thuthlung chu lo phawrhin an lo hmuh tira, "Lal pawh i ni lova, huaisen hle mahla hetiang ringawt in kan khawpui hi min rawn chhuhsak thiang lovang", an lo ti a, tichuan, Juda Lal anih veleh hemi tuma an lo chhan dan thu avang hian Jerusalem chu han lak a duh tawh hle a, chuvangin P-thian chu a rawn ta a ni.


Tichuan, Davida chu Hebron ah chuan Juda hnam te tana Lal niin kum 7 leh thla 6 lai a lal hnu meuh chuan Israel Lal Saula thlah te zawng zawng lal thisen kai te an thih zawh tak hnu ah chuan alana tibuai thei tur mi dang an awm tawh loh hnu ah chuan Israel hnam zawng zawng te Lal atan a rawn awm tan thei ta a ni.


Tichuan, chutia a rampuma awm Israel hnam 12 te Lal anih tak ah chuan P-thian rawn buai ngai tawh lovin Jerusalem la tur chuan right kimchang anei tawh tih a hria a, Melkisedeka leh Abrahama thuthlung sign chu a tawp ta tih hriain, Jerusalem chu ala ta a, chutah chuan Israel te Lal ah awmin kum 33 chhung Israel hnam pum tan ro a rel ta a ni. Chuti chuan chuta tang chuan Jerusalem chu Israel te khawpui thianghlim a lo ni tan ta a ni.


Eng vangin nge Josua khan ram then ah khan Jerusalem kha alo rin tel ve loh? kan tih chuan, ni e, Israel hnam tin te tana an Lal thutna khawpui tur ani a, hnam tin te engthawl taka an lawi za theihna tur atana a lo zuah ani a, chuti ni lovin, khawimaw lai tu hnam ber ram thenah emaw khan Lal kha thu ta ang se chuan (Saula angin) aram neitu te kha an intithei bik ang a, tin, a hnam dang te kha an kimki bik phah thei dawn a ni, chutiang zawng zawng lo dawn lawk chuan he khawpui thianghlim Jerusalem hi Israel hnam tinte ram chan chung ah awmin Sea level atanga meter 754 a sangah awmin Van Jerusalem khawpui thianghlim tih hiala hming chawi alo nita a ni.

DONALD TRUMP AN IRAN DEAL A CHHUAHSAN

Posted by Moshe Ilan on May 8, 2018 at 5:50 PM Comments comments (0)

ISRAEL BREAKING NEWS (8.5.2018)

- Moshe Ilan ( www.hakhokhma.org )


Tunhnaia Israel leh Iran inkar boruak lum chungchang thua thil inmun vel thuah Iran chuan Syria ram chhung atangin Israel hmarlam khawimaw lai Sipai base chu missile hmanga arawn kah ngei an rin avangin Israel chuan Syria ram chhunga Iran ho te chetla chu ngunthluk takin a intelligence te hmangin a thlir reng a. Vawiin lam khan Syria ram chhunga Iran base pawimawh deuh deuh te ah ralthuam chhekluh ani tih a hmu a ni.


He thil avang hian zanin Israel dar 9:00pm a US President Donald Trump'an Iran Nuclear deal ata a bansan thu a puan dawn avang leh hemi denchhen hian Iran chuan Israel chu a rawn kah an rin avangin Israel chuan thim thet thet atang khan a inralring tan tawh hle a, hmarlam van boruak ah a Jet fighter rual te a vir tir ther ther reng tawh a ni.


Post hmasa lama kan ziah tawh ang khan Iran hian tunhnaia Israel sipai te kut a lo tawrh tawhna a a sipai mi pasarih lai ten nunna an lo chan tawh avangin chumi phuba lak nan chuan thungrulh ve a tum ruh hle a, a thungrulh ve ngei pawh a rinawmin eng tik hunah nge a chet chhuah dawn a, khawilai hmun nge a rawn bitum dawn? tih chauh ngaihchan ani a ni.


Zan dar 9:00pm vel khan Israeli Home Front Command chuan Israel hmar lam khaw hrang hrang te chu an khaw chhunga Shelter te hawng sa a dah nghal turin thupek a chhuah ta ruai a, hei hi Siren a rik ruala mipui te inhmumhimna tura an tlanluh na tur a ni.


Tichuan, US President chuan TV ah LIVE in thu a rawn sawi ta dut dut a, fiah fek fawk a tul chin chiah chiang fakin a sawi a, hetah hian "Thla thum kalta vel atang khan he deal hi a tha lo va, chuvangin siamthat angai ani tiin ka sawi tawh a, mahse, engmah siamthat tumna a awm loh avangin he agreement atang hian kan in hnuhkir thu ka tithlu a, tichuan, tun atangin a level sang berin Iran lakah Sanction kan thlak nghal thu pawh ka puang nghal a, Iran hian he deal siampui a nih tirh atang khan nasa zual sauh in Terrorist pawl hrang hrang Isis te, Hamas te, Khezbolah te, El Kaeda te sum leh ralthuam hmangin a pui nasa em em a, chutiang thil tihna lo puitu nih chu kan duh lo a ni, hetia an laka sanction kan thlak na ah hian lo pui zuitu ram te chu kan thurualpui dawn lo bawk a ni" a ti a ni.


A sawi zelna ah N.Korea ho te nen tunah hian remna siama hma kan lak zel zia leh khawvel nuam zawk leh muanawm zawk kan siam ho dawn a ni.. a ti bawk.


Hetia a thu sawi zawh veleh hian Israel PM Netanyahu pawhin TV ah LIVE in thu sawina a nei zui ve nghal bawk a, President Trump thutlukna chu 100% in kan thlawp tih thu a sawi a, tin, a thusawi tawp lamah hian Israel sipai chakna hi tumahin rawn chhin tum duh suh se, an rawn chhin anih vaih chuan Israel ban tha chak tak kutthlakna chu a tuar let ngei ang.. tih a sawi tel bawk.


He thu a sawi zawh hnu lawk hian Syria rama Iran base panga laia an Missiles leh Rocket Launchers kudam te chu a puak zui nghal dawm dawm mai a ni.


Hei hi Israel chuan keimahni tih ani tih thu sawi lo mahse, Syria TV chuan Israel Jet fighters te bomb na a ni tiin thu an puang.


He kutthlakna hi Israel chuan an rawn kap dawn tho tho va, chuvangin hetia intin tawn reng tawh tho tho anih chuan phawi khalh a an rawn kahna tur te lo va kah chhiat hmasak na atana a tih anih a rinawm hle a ni.


Tin, han chhui zau leh deuh ta ila, hetianga an deal a lo keh chhe tan ta anih bawksi avang leh, deal awm chung pawha Iran hian Ballistic Missiles a siam reng theih tho si avang hian Missiles thar changkang zawk leh kap dik zawk an siam chho buk buk zel si avang hian Israel chuan kan nghah rei leh zel chuan tun ai hian missiles an nei tha zel dawn a, chuavangin tun hun remchang hi chet chhuah a vuak zawi zawt na huntha ah ngaiin an sa zek zek in, he huntha hi bawhpelh an tum lo a nih hmel a, tun dinhmun a indo na tura chet chhuah nan hian Iran chuan a cheng a hmeh per ve dat hi Israel chuan a chang ran tawh a ni. An ni lah vaupung na hmang chauhin an la chhang mai mai bawk si.


Hetia US President in thu a sawi zawh veleh hian President hmasa Obama chuan a Twiter ah Trump-a thutlukna chu a tha lo, a tih thu leh khawvel hmun hlauhawm ah a siam ani, tiin thu a lo post ve nghal bawk.


Tin, Europe tangrual te pawhin thuchhuah siam ve nghal vat in, hetianga US President in deal a chhuah san mai hi pawi an tih thu leh an mahni chuan an chhunzawm pui zui dawn tho tih an lo sawi ve bawk. Amarawhchu, Trump-a sawi ang khan Sanction a thlakna ah anmahni ram hote tan pawh an tawrh phah theih dawn avangin a peih rei pui zui vak a rinawm lem loh.


Tin, he Trump-a a thutlukna hian Israel te lakah man a nei sang hle dawn tih a hriat ran mai a, tunah hian Trump-a chuan ama dinhmun President hmasa te thil tih ngam loh leh lo tih tak loh te hlawhtling takin ama style te in a rawn tihhlawhtling ta zat zat zel a, a thusawina a hrilhthawina a rawn belh zauh ang khan tunah hian N.Korea ram Nuclear pawh nei sa ran te nen pawhin remna an siam dawn mek ani a, hei hi a hlawhtling anih ngat chuan a hmaa mite lo hlawhchham pui kum khua tawh Israel leh Palestinian te inkar remna pawh rawn siam ve a tum leh var dawn a ni.


He thil tihhlawhtlin na tur hian direct taka Israel ramchhung thil anih dawn avangin Israel Sorkar duh loh deuh ram then emaw, Jerusalem inphel tir emaw a rawn tum ngei a rinawm hle a, chutih hunah chuan Israel ten dodal hle mahse, ka style hi a hmantlakin a hlawhtling ber zel ani tiin, a duhdan tein, a thil tumah dingngheta tihhlawhtlin ngei a tum dawn bawk si avangin, hma a rawn la ngei ang a, chutah Israel ten lo dodal viau pawh nise, a hma lamah Israel te tana a chithlum neih tinreng an duhdan ang taka Deal cancel te, Jerusalema Embassy sawn luh te hmangin a lo fah tawh bawk si avangin an hnial hlei thei tawh si lo ang a, abuai thlak chho map map hle viau maithei a ni.


Eng le khaw le tun dinhmun ah hi chuan Israel PM Bibi-a policy kumkhua a rawn tihhlawhtlin chhoh tak zat zat zel avangin Israel ram politics dinhmunah Bibi-a chuan mark pawh a hmu sang ta ngiang mai. Obama hunlaia Obama duhloh zawnga a chet thinna avangin khatih hunlai khan eptu lam ten an sawisel nasa em em thin kha a ni a, tin, facebook lamah amah sawichhe hnem em em thin tu Ex.PM Ehud Barak-a pawh khan khatih hunlai khan Israel leh America inthianthatna tichhe tu leh khawvel ram hrang hrang te lak ata Israel maltan tir tu, tia a lo demna te kha tunah chuan ataka hetianga kum 70 meuh a vei hnu ah Israel thiantha ber America in Jerusalem chu Israel te khawpui ani tia a pawm avanga a Embassy pawh Jerusalem ah a rawn sawn luh dawn tak ah chuan, ram dang dang te pawhin an sawn luh ve tur thu an puang ta chur chur mai a, Bibi-a pawhin tunah zet chuan khatianga sawichhe tu Ehud Barak-a te pawh "Mi hlui hmuihmul thar neia.." tiin nuihsawh takin a ko ta vel mai mai a ni.

IRAN IN ISRAEL TE LAKAH PHUBA A LA DAWN

Posted by Moshe Ilan on May 7, 2018 at 2:25 PM Comments comments (0)

Nimin khan Israel Security thu neitute chuan Vaukhanna thuchhuah siamin "Tunhnaia Syria rama Iran Military base pawimawh deuh deuh bomb chhiat anihna ah phuba lak nan Iran chuan Missiles hmanga Israel kah a tum" tih thu an chhuah a.


He thu an tihchhuah hian a thil tum ber chu Iran thu neitute hnena an thil tih tum mek ruahman dan an hriat thu hrilh thawina leh vaukhanna atana an tih a ni.


Enge a awmzia, Israel mipui te tih thlabarna thu mai ani lawm ni? kan tih chuan, a hmasa berah Iran hian tun dinhmun ah hian Israel nena indo hmachhawn rup hi a duh lo a, a chhanchu, a duh angin Israel ram hnaih ah ala inchhawp muk tawk lo tih a hria a, chuvangin, indo pawh nita se, a sipai te tan ral beihna kailawn a awm si loh chuan Missiles hmanga inral sai mai mai chauh an ni dawn a, Israel lahin chung an Missiles te chu a lo sai thlak sak zel emaw ni lehnghal ang a, kawngro tam tak a su hle dawn lo tih a hria a ni.


Iran hian hun rei tak ata a thil tum tawh, a ruk aral thei ang bera Israel hnaiha inchhawp luh hret hreta Syria rama a sipai te awmhmun benbel tir a, chumi kailawn hmang chuan Indo thu puan ni a rahbi pawimawh atana hman a duh a ni.


Mahse, he ruahmanna hi Israel thu neitu te chuan an hre chiang tak zet a, chuvangin, vawi duai lo Israel ram hruaitute hian "Iran chuan min beihna tura Syria a a sipai te leh a ralthuam hmun tur a benbel leh a in chhawp luh hi kan rem ti dawn lo a ni" tih thu pawh an lo phuhchhuak thin tawh a nih kha.

 

Chuti anih vang alawm, Syria rama Iran base te chu tu tih hriat loh kut thlakna avanga a puah leh dum dum thin ni. Tin, hetianga Syria rama Iran leh Khezbolah te Target tu tih hriat loh ten an bomb leh thawr thin hi ani taka Israel kut thlakna ani lo tih chu tu pa chhia leh tha hriatna mahin puh tur dang a hre mawlh chuang lawng e. Mahse, hei hi Israel chuan tun dinhmuna heng a bomb chhiat te hi thil hlauhawm teh ual ni thin lo mahse, a message pek tum zawk tak erawh chu "Iran hian min beih nan Syria ram hi hman tum duh suh se, hetah hi zawng chengrang chawia ka lasi zawl mual anih hi" a tihna pakhat ve hranpa a ni.


Hei tak hi ani a, Iran tan hian an duh ang taka an duhna hmun Syria a an inchhek luh theih thin loh avang hian tu tih hriat lohte chet ziah thin ngam lohna tur hian ataka hman tum lo pawh nise vaufung chhuantelel atan Nuclear Weapons hi neiha hum ve ngei hi a duh tak zet zet a ni.


Chumi an thil duhna leh tihhlawhtlin ngei an tum chu pu Bibi-a hian a hre chiang hle a, chumi ruahmanna tibahlah thei tur chuan a tha leh zung chhia leh tha hriatna pawh a seng sana ngiang ani tih kan hre awm e.


Tun tumah pawh hian Israel Security thu neitu te hian an thil hriat chu Iran hian indo hmachhawn a duh loh avangin an phuba lakna leh thungrulhna atan hian direct taka an mahni chet chhuah hi an tum lova, marawhchu, Syria rama an mahni thurualpui leh an thlazarna hnuaia awm, an sum leh pai leh ralthuam hmanga an vulh Khezbolah ho te leh Shiite Militia ho te chu hma tawn tir a, an missiles lo pek tawh te km 50 - km 100 vel kap phak te hmanga Syria ram atanga Israel chu kah tir an tum a ni.


He an thil tum dan hi Israel intelligence te chuan hriain tunah hian Iran chuan phuba lakna tur atana program duang turin an sipai lal te General Slimani te, an Air force Chief General Khaji Zada te leh an Missiles Unit Comender Mukhamad Bakri Khatam Abadi te chu an ruat a ni.


Heng mite hian tunah hian program duangin Syria rama Khezbolah hotu te leh Shiite militia hotu te chu hemi phuba lakna tur atan hian tan ho tirin ruahmanna an siam mek a, arang thei ang bera he an ruahmanna hi ataka kalpui an tum a ni.


Hetianga an mahni phuba lakna tur nisi direct taka an chetchhuah duh si loh hi Israel chhan let lehna kut an tawrh ngam loh vang ani a, a lehlamah Iran ang Military Power lian tan phuba lak ve ngei a mawiin a awm si. Chutah Israel in a chhanlet huna Iran a va bitum vaih chuan Iran hian thiam channa tur atana UN a a zualko theihna turin hetianga a tih mai hi atan kawng awmchhun ani si. Chutah hetianga an thil tum dan tactic hi Israel Security thu neitu te hian an hriat avangin khatia thu tichhuak thuai kha an ni a, eng pawh lo thlengin Syria atangin ani emaw, khawi hmun atang pawha min rawn kap anih vaih chuan a mawhphurtu chu Iran in ni tho tho dawna a vuakletna in hmachhawn hunah thiamthu sawi tur in nei dawn lo a ni, an tihna a ni.


Tun ah hian Israel ram chu a inralring hle a, Missile kah thlakna te pawh hmar lamah a bun ther fer fur tawh a, tin, indo a chhuah thut pawha mipui te tlan khawmna tur Shelter in chi hrang hrang te pawh peihfel diam in a dah tawh a ni.


He phuba lakna tura an hotupa General Kasem Sulimani hian "Israel chu a sipai te lakah a tap ve tur a ni, keini pawhin kan sipai te kan tah angin, mit aiah mit.." tiin a vaupunna thu a chhuah a ni.


Eng pawh nise, thil kal dan vel han thlir hian Iran hian tun dinhmunah hian Indo tichhuak turin Israel khua leh tui targeta a kah hi a rinawm loh va, phuba lakna atana a tih anih avangin an target atan khawilai hmar lama Israel military base vel a rawn bitum a rinawm.


Eng le khaw le, Bible lamah pawh Israel te tana an chakna hnar an ka hmanga thu chhuak ("A aw chu Jakoba aw a ni si..") angin Balaama pawhin Israel te beih tuma anchhia lawh a tum tum pawh khan P-thian thil tihtheihna hmangin Malsawm thu a phuhchhuak ta hlauh zawk anih kha, khatiang ang khan tun tumah pawh hian Israel te tana thupek "Mit aiah mit.." tih thupui hmanga a mi Israel te rawn beih an tum ani si a, P-thian in ami te a venhim dan tur chu i lo thlir leh phawt mai ang u.

www.hakhokhma.org

DAWITHIAM ROPUI BIBI NETANYAHU SHOW KHAN ENGE A TUM

Posted by Moshe Ilan on May 5, 2018 at 6:10 PM Comments comments (0)

Israel Prime Minister Binyamin Netanyahu, Politics dawithiam tih hiala an koh chuan dawithiam tena dawi thil an show na ang maia mipui hma dawhsan chunga puanzar pawt thlaa sazupui emaw pangpar emaw an tihlan ang maiin puanzar dum hlai tawk tak tak pahnih pawtthlain Iran Nuclear Weapon siam ruk tumna program bu tam tawk leh discs tam tawk tak mai chu khawvel mipui hmuh theih turin a hai lang ta rup mai le.


Tichuan show chu nei tannin Israel ram TV channel zawng zawng te News puan hun darkar chiah tak maiah nei tan in, kum tam tak a lo vahvaih pui tawh "Iran hian Nuclear weapon siam a tum ani" tia khawvel ram hruaitu zawng zawngte hnena a lo tlangau pui thin, bara an khawn that duh lem si loh chu ram tin hruaitu te mai bakah khawvel mipui hian hmuin hre ve the se tiin English nal tak mai chuan a han hem zui nghal tan ta a, hemi tuma a show neih hi khawvel zawng zawng hriat anih mai bakah history bua chuang reng tawh tur ani ngei ang le.


Hetiang anga presentation pe thiam leh mi te rilru chhungril khei sak tura thusawi thiam lamah hi zawng ama nihna dinhmun chuh tum a bei tu zawng zawng te pawh hian a ne pawh an pha lo hle a ni, tin, chumai ani lova, khawvel ram hruaitute zingah pawh hian amah anga zei hi an awm meuh lo a ni. Israel Election neih hnuhnung berah pawh khan hun khar hma darkar hnih lek a awm tawh tihah a facebook post a thu changkhat lek a sawi ah mipui te amah vote tura a kohna avanga a Party Likud ten seat 4 vel an hmuh belh leh zawt pawh kha Politics dawithiam tih hi a phu hliah hliah a ni. Tun tuma a show avang ngawt pawh hian mipui ngaihdan an zawhna ah a Party Likud chuan a kar hmasa lam ai chuan seat 3 velin a sang leh ta dawrh mai.


Kha a show ah khan ama che vel leh a thusawi vel hrim hrim kha hmuhnawm a tling hle na a, amarawhchu, a chhungthu erawhin tun dinhmunah hian kawngro a su tam pui lo hle a, khatia thuruk tawpkhawk tlangzarh duhna thinlung a nei hrim hrim kha mite mak tih a awm hle a, amarawhchu, Iran Nuclear siam mekna a US leh Erope ram tena tuna Iran ram nena Obama hunlaia Agreement an lo siam kha tihdanglam emaw sut kir tir a duh avang zawk ani a, hetia top secret a pholan hian Agreement siam tute thinlung ah nghawng a neih theihna tur aduh vang a ni.


Amarawhchu, he show hi thlir dan a inang lo hle thung a, agreement siamtu te zingah America President Donald Tramp chuan kha agreement kha a thatloh zia a tihfiahna a hmuh laiin Europe ram hruaitute erawh chuan he a thil show hian an agreement siam kha a that zia a pholang tiin an hmuh thung a ni. Achhanchu, agreement kha kum 2015 a an siam ani a, mahse tuna Bibi-a thil pholan erawh hi chu khami hmaa an program lo ziahfel tawh a ni thung a ni.


Eng le khaw le, heng program zozai te hi tunhnai maia Israel spy (Mossad) te ruk chhuah ani na a, Bibi-a pawhin heng thil te hi kum 2015 hma lam ami tih a pha lo a, mahse, a sawi fiah tum ber chu khatih hunlai zawng zawng leh tunlai thleng pawhin Iran hian Nuclear Weapon siam kan tum lo a, chutiang ruahmanna pawh kan nei lo an ti reng a, chumi "Dawt" base a he agreement hi kum 10 chhung daih tura an siam pui mai chu tha ti mawlh lo a ni.


Tin, he agreement ah hian Ballistic Missile siam chungchang a tel loh avangin, Iran hian tunlai thleng hian Missile kap hla chi a siam chhunzawm buk buk reng a, Bibi-a hmuh dan chuan he kum 10 chhung hi Nuclear pu tur Missile an siam hun chhung atan hmu in, kum 10 a ral veleh hun reilo te chhungah Nuclear chu neiin an Missile ah te hian an vuah mai dawn ani ati a ni.


Tin, Iran hian Nuclear weapon siam duhna rilru an nei lo anih a, tuna Inremna hnuaia an Nuclear power siam mek chu thil dang atana hman tura an tih si chuan, eng vangin nge khang program zozai te kha hmun biru leh venhimna khirh tak hnuaia an la dahthat ruk si? Inremna hun tiam a zawh ruala phawrh ve leh mai tur atan bak em ni ang le?


Tunkar chhovah hian Donald Tramp chuan he agreement chungchang ah hian ngaihdan siam felin a cancel thu a puang dawn nge, tih danglama siamthat a tul a tih thu a puang dawn a, chu chu karleh maia Jerusalem a US Embassy a hawn hunah Israel tan an lawmzawng thu a rawn thlen ngei a rinawm hle a ni.


He a show ina a thil thlen tir tum lam chu lo dahtha ta lawk i la, khatia Bibi-an show a neih dawn hma zan ah khan Syria rama Iran Military base pawimawh tak chu tu tih hriat loh ten an bomb darh chuai chuai anih kha. Kha base pawimawh tak ah khan Israel khawilai hmun pawh kap pha chi missile 200 chuang zet Iran ram atanga tunhnaia tawlh luh a ni a, a tuk zingah khan America chuan he thil thleng ah hian an inrawlh loh thu a puang thuai a, chutih laiin Israel PM Netanyahu chuan a Cabinet te committee pawimawh tak nei turin a ko khawm ve bawk si, chutah Iran TV lamah lah he thil thleng hi Israel F-15 te chetna ani tiin thu an lo tlangzarh ve bawk si, Israel ram lamah lah News vel zawng zawng ah indo hmachhawn rup tur niawm takin thu an puang nileng bawk si, chutah Israel reserve sipai hote lahin an whatsapp group lamah inralring turin thu an lo thehdarh ve bawk si a, khami ni tak kha chu aw… Israel ram mipui te lu a hai a ni. Tichuan chawhnu her vel ah khami ni tlaia Kneset thutkhawm pawimawh tak mai neih turah PM Netanyahu a tel dawn lova, dar 8:00pm ah TV ah thu a puang dawn ani tih tlangthan tir a ni a, chuvangin Knesset a eptu lam te pawhin indo nikhuaa an tihdan angin ram hruaitute tihbuai lohna turin Sorkar kalh zawnga thu an put luh tum te pawh an sut leh chur chur bawk a, mipuite chuan PM chuan indo thu a puang dawn anih ngei an ring thup a ni.


Amaherawhchu, tun hnua an sawi danin khami ni Cabinet thutkhawm naah pawh khan indo thu lam emaw, a hma zana Iran base chhutchhiat lam thu pakhatmah sawi lan ani lo ani an ti a ni.


Eng pawh nise, Iran hian tunlai Cyber khawvel ah hian eng vang kherin nge an top secret program zo zai te kha lehkha ah leh disc ah an lo dah that kher kher tih kha zawhna lian tak ani ngei ang a, Iran hian Israel te hi tunlai khawvel Cyber War neih mek ah hian an chungnun zia leh an thil tihtheihna a hriat avanga khatianga che kha an ni zawk maithei a, amarawhchu, Israel spy te chet na leh chet dan history khawvel mipui tena an mahni tawnga let a thawnthu ngaihnawm tak tak an chhiar mek hi Persian tawngin an lo let ve lo nge ni dawn teh reng ni? Hetianga an hmun biru lutuk leh Iran mipui maktaduai tam tak kara mi pali panga lek in a awmna leh a chhunga thil awm te an hriat hi Irsael Mossad Agent te hian an luh chilh theih hi an beisei lo vin an ring pha lo hrim hrim ni ngei tur a ni a. Amaherawhchu, Israel Mossad Agent te thung chuan tlangnel taka leng lutin an pu Bibi-a duh zawng tur atana an rin deuh deuh te chu a rih hlawm awm teh lul nen an khai haw sak thung si a le.


Hetiang taka Israel ram ang khawvel map ziah chang pawha a ram hming, a ram chhunga ziah len loh ram te reuh te hian Spy huaisen leh tha tunlaia khawvel Spy te chetna a lian ber leh hlawhtling ber a nei hi ava mak thin em tih pawh a awm hliah hliah a ni. Tun atanga kum 20/30 vel ah chuan he Mossad Operation chetna hi khawvel hnamtin tawngin lehkhabu chhiar hlawh ber te zing ah a tang leh ngei ang le, Israel Spy ropui Eli Cohen ai maha ropui zawk tur thih chilh ve lem lova hetiang Israel ram tana rohlu tling hmelma thuruk rawn pu chhuak thei achangtupa chet dan chanchin hi hriat ava chak awm tawh teh lul em.


Iran tan lah khami nia an Military base pawimawh tak mai vawi sawmsariha chhut chhiat nawn ai maha tawrh na zawk leh zahthlak zawk hetiang taka an hmelma Israel spy ten an hriat miah lohva an hmun pawimawh ber luh chilha an duh duh an linglet vel ta mai hi zahtlak an tiin an tuarna tak zet dawn a ni, Israel spy te lahin kha hmun in bangah khan "I was here" tih an ziak lo chauh kha a ni si a.


Hetiang taka Israel ram te reuh te laka Iran ram lian tana thil zahthlak tur hi Iran tan chauhva zahthlak leh kimkitna ani lo va, Agreement siam puitu ram Europe ram ropui leh thil tithei inti tak tak German, British leh France hote tan pawh an intelligence te hriat ve loh thil ataka hmuh theiha Bibi-an ahan pho lang kher kher hi chu aw… zahthlak an tiin an ngei ve vawng vawng khawp ang le, "Bibi-a kher kher thin hi chu hetiang te chu a su su hmang zawka min hrilh tur hi ania le, an ti rilru ngawt maithei a ni.


Hetianga Israel ram hruaitu pa ina an Intelligence agents te thil tihtheihna ram ropui zawkte ualau taka a puan khum sak avang hian Europe ram hruaitute hian ngei luat avanga sual chhuahin an thinlung tihkhauh luiin an agreement siam chu a tha a ni, tih danglam emaw sut emaw angai lo an tihluih ngei a rinawm a ni.


Eng le khaw le, han thlir kir deuh hlek ta ila, khatia agreement an sign dawn khan Bibi-a hian theih tawp chhuahin ama future politics atan pawha pawi thei tur anih pawh hre reng chungin ram tana theihtawp chhuahin zah leh chaltlai nih hlawh tur pawh dawn duh lovin khatih hunlaia US President Obama duh loh zawng takin US Congress hmaah he an agreement sign tum hi a tha lo ani tih a zuk tlangau pui tawh anih kha. Tun tumah hian a chet dan kha a dikzia leh a thil tumah a dinzui ngheh zia leh a dikna tlangzarh theihna tura thu hretu a neih remchan chu hmang tangkaiin Europe ram hruaitu tena Obama an tih dan anga tuna US President chu virpilha a thinlung rilruk thlakdanglam tir an tum hmaa tunkar maia pu Tramp-a thutlukna siam turah a duh dan zawnga nghawng aneih tir tum em vang ani a, chutih rualin Europe ram ropui tak tak te a thil duh tih sukuk tir zel tu te a chaldelh na ani pahfawm nen, saihlum pakhatin sava pahnih a perh thla kan ti thei ang.

www.hakhokhma.org


KHAWCHHAK MITE NGAIHSAN ISRAEL TE

Posted by Moshe Ilan on April 19, 2018 at 12:55 PM Comments comments (0)

Eng atia mawni, mizo te hian mahni hnampui te aiin hnamdang mi leh an nun dan, inchei dan leh zia phung ngaihsan hi an ching hle a, hei hi a ram awmna kilkhawr vang nge, sap hoten hun rei tak chhung an lo awp vang zawk ni dawn ni?


He zawhna chhanna hre tur chuan puh tur eng eng emaw kan hre nual hlawm mai thei a ni. Tlem lai deuh kha chuan sap mingo hrim hrim ngaihsan ani thin a, hei hian nghawng thui tak a nei a, ram danga mizo awmte pawhin an rualpui mingo te bulah chuan kimkitna deuh hlek an nei thin a, an ni zinga insit deuh hlekna an nei ru tut thin a ni.

 

Tichuan, tlem lai deuh leh khan vai ngaihsan hunlai a awm leh a, marawhchu, vai ah hian chi hnihin kan then tlangpui thin awm e. Vai chhia leh vai milian tiin, vai chhe ho chu kan chheh leh avela hnathawka kan hmuh phak tawk te emaw, kan kal thlen phak china kawngsira vai kan hmuh thin te hi an ni mai awm e. Vai milian kan tih ah hian hosa chauh ni lemlo filmstar te pawh kan huam tir thei ang a, chung te erawh kan thlirdan leh ngaihdan vai chhe ho lakah chuan a dang viau thung a ni.


Amarawhchu, thil mak ve deuh pakhat chu vai milian ngaisang thin viau e ti lo chuan an inchei dan erawh mizo ten an la lem lo, ram hruaitu te zinga mi pahnih khat tih chauh loh chuan vai milian kawrchung nghawng pum tak ngial pawh an ha hreh deuh tlat niin a lang, chutiangin, mizo hmeichhe ho pawh sari kaih duah duah chunga khawlai leng hmuh tur an awm pawh kan hre lem lo awm e.


Hun la rei vak lo atang khan khawchhak lam Korean ngaihsan lamah kan suk thlekna kan thlak leh ta a, chutah erawh zawng a bikin kan thalaite zingah kan sam meh dan, kan inchei dan leh kan sukthlek dan zawng zawngah kan til kan then tir ta suau suau thung a, kan rawlthar leh tlangval tlawmngai ngalchak tur pui pui, thlan laih nikhuaa bawngtuthlawh leh suahdur lek chak tak tak tur te pawhin powder leh hmuihnawihsen inlek siakna lamah tuanzai kan rel ta duaih duaih zawk a nih zawng hi.


Israel rama zofa cheng te zingah pawh fiamthuin an sawi thin, "Thailand i ang e, an tih chuan an lungawi lovin min hmusit tiin an thinrim viau laiin, Korean i ang an tih erawh chuan an lawmin an nui khi var var thin" an ti e an tia lawm.


Aw le, heti taka zofa ten kan ngaihsan Korean hote pawh hian hnam ngaihsan an lo nei ru ve reng chu zu nia. Khawchhak Asia ram China, Japan, Korea, Thailand tih vel ho te khian Israel hi an ngaisang em em a, Israel ram tihdan leh hmasawn chak dan thil chi hrang hrang zir hian Israel ram ah hian heng ram atang hian an thalai tam tak te Israel ah hian thil zirin mi tam tak te an awm ve reng thin a, chumai ani lo, China ah phei chuan "International Radio of China" ( https://www.facebook.com/crihebrew/ ) awmin china mite vekin Hebrew ngatin thu an puang thin zu nia.


A tlangpuiin khawchhak mi tena Israel an ngaihsan nachhan ber nia lang chu Innovation (Thil thar chinchhuah leh siamchhuah) lamah Israel te hi khawvel ram hruaitu niin an hmu tlat a ni. Japan ah pawh an thufing pakhat chu "Israel mite angin thil thar chinchhuah lamah tlan rawh u" tih a ni.


Kan sawi tak Korean hote pawh hian Israel te hi khawvela hnam fing ber an ni an ti a, tichuan, an finna thuruk hre tur hian hun rei tak chhung research an beih rukna ah Israel te chuan hmanlai kum 2000 kalta hunlai ata an pi leh pute chanchin leh an Juda dan ngawrh taka tunlai thlenga an zir vang ani an ti a, tichuan an ni ang kan nih ve theihna turin tiin Juda mifing hmasa te lehkhabu tunlai pawh a Juda te P-thian thu zirna school Yeshiva a an zir pui ber TALMUD chu an tawnga letin South Korea ho te chuan an school leh in tin deuh thaw khian an zir ve ta mup mup mai a ni. ( https://www.ynetnews.com/articles/0,7340,L-4065672,00.html )


Israel te hian BIBLE (Tanakh) hi kan 'Nunna lungpui' ani tiin an ngaisang em em a, chuvangin Israel Independence day apiang hian Jerusalem khawpui ah PM hovin World Bible Quiz an nei thin a, hetah hian ram hrang hrang atanga tleirawl leh rawlthar tam tak te inel turin an rawn fuankhawm thin a ni.


Vawiin Israel independence day pawh khan he Quiz hi neih ani leh a, chutah chuan Israel rawlthar Azriel Shilat kum 17 mi chu pakhatna a ni a, hetia an inelna a zawh veleh a pawna a chhuah hian Korea TV reporter pakkhat chuan interview na lo neih sak nghalin a zawhna hawnna atan "Nang ni Israel te hi kan entawn leh ngaihsan te in ni a, chuvangin Bible nena in inkungkaihna thuruk hi enge ni?" tiin a lo zawt var a ni.


World Bible Quiz - https://www.youtube.com/watch?v=viKi1WmKENE

www.hakhokhma.org

Letter to Bnei Menashe

Posted by hakhokhma on June 15, 2017 at 6:10 PM Comments comments (0)

Chibai ule,

Shavei Israel “Integration Centre (Mercaz klita) Kfar Khasidim atanga thlengtharte an chhuah a chin thlakhat dawn a lo liam ve ta reng mai a, hlim leh lawmna tur kan va nei tam em.


    • Hun rei tak Aliyah a awm theih loh hnuah, a tawp a tawpah Mizoram atangin Aliyah awm theihna tur kawng a lo in hawng a
    • He Aliyah kawngkhar inhawng hi mizoram chhuakte tan a ni a.
    • Thlipui chak leh tleh rangtak ang maiin, Israel ram ngeiah mizoram group-te chu hruai hawn an lo ni ta.
    • Mercaz Klita an awm chhung pawh a rei lovin, a hlawhtling hle a.
    • Aliyah group dangte ang bawkin, tun group a mite pawh hun reilote chhungin GIUR an paltlang zung zung a, giur la paltlanglo tlem an la awm bawk.
    • An awmna tur khua Natzrat illit an pandan leh an inbuatsaih dante pawh a ropuiin sawiselbo a tih theih hial awm e.
    •  A hmaa kan lo buatsaihsa ang thlapin, Hashem zarah ni 13/6 khan puitling hovin Hebrai tawng an zir tan a, naupang hote pawh an zirna tur education system-ah an lut tan a ni.
    • Thiltha tihna atanga thatna dang a lo piang chhuak zel ang hian (מחיל אל חיל ) hmasawnna hlimawm tamtak kan neihchhoh zelna turin, ke kan la pen fan fan zel dawn a ni.

He Aliyah a hlawhtlin theihna tur hian keini “Shavei Israel lam pawhin kan tha leh zung, sum chenin tam tak kan seng a, mi tamtakin theihtawp tak meuh meuh chhuahin hna an thawk a, an thawhchhuah zarah hlawhtlinna a lo awm a, an va chhuanawm tak em. Mahse, mi thenkhat chu hlim leh lawmna chang hre lovin, social media lamah mawilo tak taka chein, lawm a hnekin a letling hlauhin an che tih kan hria a. Itzkhak Raham-a mizorama thawnhaw a nih vanga social media a inhuatna (שנאה ) , midangte chungchang a chhezawng a sawina (לשון הרע ) , pawlawh taka chetna leh pawlawh taka midangte va nghaisakna (יחסי זלזול ) , midangte zak taka siamna (מבייש ) leh kan chunga thiltha ti tute laka lawmna chang hriat miah lohna lian tak (כפויות טובות גדולות ) lanchhuah tir a lo ni a.


Hetiang zawnga Shavei Israel chunga chetna hi a thlen zeuh zeuh thin avangin, tuntum chu chhan letna leh hrilhfiahna ni pahfawmin, thu ka han sawi teh ang.


Hnamdang Jentel-te (Goi) giur paltlang dan kawng leh Bnei menashe-te giur paltlang dan kawng in an lohna:

A lan danah chuan mi tupawh, Yehudi ni duh tan a in giur mai theih a, Yehudi a nih mai theih reng a. Amaherawh chu, chu in giur-na TAHALIKH GIUR (Conversation Process) paltlang tur erawh chuan juda dan leh dun, halakha leh Israel ram sorkar dan kimchang taka paltlang a ngai a, hetiang dan chi hnih paltlang hi thil awlai a ni hauh lova, midangte tanpuina tel lo chuan paltlang theih loh a tih theih awm e. A bikin bnei menashe-te tan hian a har leh zual.


Giur paltlang turte tan hetiang hi a kal dan phung a ni-

A hmasa berin, Israel ram kalna turin a ticket man tur a ngai hmasa phawt a, chutah visa a dawng thei a nih chuan Tourist/B2 visa hmangin, Israel ramah a lut ang a, chutah Israel a thlen hunah Ma'arakh Giur shel Rabanut harashit le-Israel-ah dilna thehlutin tahalikh giur a paltlang theih nana file hawn nan, file dang tamtak chilhtel a ngai a, chungte chu- Rav liante recommend-na leh ram pawna awm orthodox community-te hriatpuina lehkhate, Rabanut harashit in a hmelhriat, Rav liante leh orthodox communities-te hnen atanga recommend-na a chilhtel a ngai bawk a, he recommend-na la chhuak thei tur hian Israel-ah kum khat atanga kum hnih chhung, juda sakhawmi te zingah mitzvah leh halakha zawmte, torah zirte, thinlung chhungril tak atanga duhna tak tak thinlung nei chung leh a thinlunga juda dan zawm tura mawhphurna tak tak lak huamna thinlung nen a awm hnuah chauh a ni hetiang recommend-na hi an pek thin. Chutiang zawng zawng a paltlang hnuah chuan, giur theihna tur file chu hawnsak a ni dawn chauh a ni.


Giur paltlang chungchanga bnei menashe-te harsatna

A chunga giur process tar lan khi b’nei menashe-te tan paltlang a harsa em em a. B’nei menashe (India a cheng, giur la paltlanglo)- te hi halakha danin Jewish Community a chhiar tel an ni lova, Rabanut Harashit (chief rabinnate) leh Misrad Hapnim (Ministry of interior) -te Requirement (phut, mamawh) te zinga an tel ve loh mai bakah, harsatna khirhkhan dang tam tak a awm bawk a ni.


Bnei menashe-te giur chungchang a Shavei Israel hmalakna


Kum 2007-2012 Israel sorkarin b’nei menashe-te hruailuh, aliyah a rem tih loh chhung khan Shavei Israel organization chuan b’nei menahse-te aliyah theihna turin kawng hnihin hma a la a, chungte chu:


1. Ram pawna hmalakna: Bnei menashe India a awmten sakhuana lamah hma an sawn theihnan program a siam a, chungte chu seminar neih puite, shavei activist ho zirtirna pekte, emissary Israel atanga India a awmte zirtir tura thawnchhuahte leh India ram chhung a khaw hrang hrang a awm community-te in zirtir chhawng zel tura fuih leh thawnchhuahte, activities hrang hrang neihpuite leh sakhuana thil leh giur-na atana pawimawh tur lehkhabu hrang hrang, mizo tawng leh Manipur tawnga lehchhuahte a ni bawk a.


2. Ram chhunga hmalakna: Israel ramchhungah ve thung chuan keini shavei israel-ten kan theih tawp chhuahin chief rabbinate-te, sorkar laipuite kan tlawh a, kan ngen a. b’nei menahse-te hian giur theihna tura paltlang tur tamtak (a chunga giur dan kan tarlan tak) hi ti ve theilo mahse b’nei menashe-te sakhaw duhziate halakha leh mitzvot-te zawm thei tura an inpumpek theihna leh sakhaw dan zawm tura mawhphurna an lak theih turzia te kan sawi thin a. Sorkar laipui leh chief rabbinate-te thinlung kan hneh theihna tur hian tha leh zung, sum tamtak kan seng reng bawk a, hemi atan hian keini shavei staff chauh nilo, bnei menashe community chhunga hruaitute, shavei israel activitist-te, bnei menashe mipui ngeite tanlakna pawhin hma min sawnpuiin an hmalakna theuhah fakawm kan ti hle a ni.


Bnei menashe-te tan aliyah a rawn awm a, giur danthar a lo piangchhuak a.


Kan hmalakna pawhin hma a sawnchho hret hret zel a, Chief Rabbi hmasa, Harav Shlomo Amar Shlita nen kan inkarah inhriatthiamna rawn awm chhovin, a hnuah Chief Rabbi thar, tuna kan chief Rabbi nilai Harav Itzkhak Yosef Shlita nen pawh b’nei menahse-te giur chungchanga hma lakna ah inhriatthiam tawnna a lo piang ve leh zel bawk a.


In hriatthiam tawnna tih awmzia chu heihi a ni. b’nei menashe-te chanchin kan theih anga tam Chief Rabbi hnena kan hrilhhriat hnuah, chief rabbi ngei chuan India hmar chhakah juda nundan anga nung b’nei menashe thahnem tawk tak an awm a ni tih a lo hria a, halakha danin juda a chhiar nilo mahse anni chu Israel-ah in giur tura hruai a lo remti ta a, chu giur paltlang turte chu juda sakhua duhna leh pawmna sang tak nei, thinlung chhungril atanga inpeih an ni tur a ni, sakhuana dan an hre tur a ni a, an thinlung leh a tak ngeiin (Practical) an zawm tur a ni. chutiang mite chauh chu a ni awlsam taka giur paltlang thei turte chu. awlsam tih awmzia hi in giur dan pangaia kum khat emaw kum hnih emaw nghah ngailo a, thla thum chhung chauh a giur paltlang theihna tihna a ni.


Hetiang a nih avang hian giur paltlang thei tura tlingzote (qualify) thlan chungchang hi uluk tak leh khirh (strict) taka tih a lo ngai ta a, a chunga kan tarlan tawh angin “giur paltlang turte chu juda sakhua duhna leh pawmna tak tak nei, thinlung chhungril atanga inpeih anni tur a ni a, sakhuanna dan an hre tur a ni, an thinlung leh a tak ngei (Practical) in an zawm tur a ni”. Shavei israel-in giur leh aliyah turte thlan hna kan thawk a, a bak leh a piah lam chu Chief Rabbi staff, Dayanim-te thutlukna leh an thu a ni tawh.


A tawizawngin tihian sawi ila- B’nei Menashe-te Israel rama hruai an nihna chhan hi thil pakhat vang chiah a ni a, chuchu halakha zulzuia juda mi diktak an nih duh vang chauh in a ni. he juda nih duhna b’nei menashe-ten an neih hi chief rabbinate leh Israel sorkarin an “Rin” avangin, an ni hruai a, giur hi an remti ta chauh a ni.


Juda nihduhna han tih hian duhna hi kawng hrang hrangin a langchhuak tur a ni a, chung kawngte chu sakhaw dan hriatte, practical a mitzvot zawmte, thinlung chhungril ber atanga juda nun zawm duhna emaw pawmna emaw a awm tur a ni a, chu bakah he dan zawm tura intiamkam emaw mitzvot zawm tura mahni leh mahni mawhphurna lak a tul a ni.


B’nei menashe zingah duhna leh duhna lan chhuahna kawng hrang hrang, a chunga kan sawi takte a ding zolo emaw zawm duhlo emaw chu hruai tlakloh leh giur tlakloh an ni lo theilo a ni.


Israel rama hruai tur leh sakhaw dana tlingzote (qualify) thlan chungchang hi shavei israel-te mawhphurna a ni a, Giur-na a mawhphurtute chu Dayanim-te an ni, midik leh thlantlak, thlan awm hliah hliah kan thlan hi vansanga awm Hashem laka kan mawhphurna a ni a, khawvel lamah pawh nise, Israel ram sorkar tan pawha kan mawhphurna a ni a, nangni bnei menashe community thatchhohna tur leh hmasawn chhoh zelna tura kan mawhphurna a ni tel bawk.


Sakhuana-ah pawh chiang manglo, torah dan leh halakha dante zawm leh si lo (מי שלא ראוי ) kan zinga thlan palha a lo awm a nih chuan chu chuan keimahni chhungah thilthalo a thlen thei a, B’nei menashe-te aliyah leh giur thlengin nghawng thalo a nei thei a. chuvang chuan chutiang mite chu Israel-ah hruailo tura kan theih tawp kan chhuah a tul ta a ni.


Engatinge giur chungchang hi ka sawi tak duah mai?


A chhan chu shavei israel-in b’nei menashe-te tana theih tawp a, a hnathawh b’nei menashe-te tana aliyah leh giur chungchanga thil in thlakthleng (Revolution) hi hrilhhriat che u leh hrethiam tura ka duh vang che u a ni. tunah chuan aliyah chungchangah te pawh hmasawnna a awm chho zel a, a kum a kum nghah ngai tawh lovin, thla thum chhung chauhin b’nei menashe-ten giur an paltlang thei ta a ni.


Engtin nge Israel ramah sakhuana a tlinglote (מועמדים לא ראויים ) hruai an nih theih?

Israel rama kal tur leh sakhuana a tlingte (qualify) thlan chungchangah hian Scientific method leh mathematics tools hman a ni lova, chuvangin thlan sual leh tihfuhloh chang a awm palh thin. Israel ram kal thei tura kan mi thlante reng reng hi an chungchang (personal information) kan la khawm a, sakhuana a taka (practical) an tih dante enfiahte, interview neihpui thin an ni tlangpui a. Tichuan, inhmelhriatna a lo awma chutatang chuan tlingzo (qualify) ni a kan hriat chu kan thlangchhuak ta thin a, a tlangpuiin Israel ram kal tura kan thlan tawhte hi thlanawm tak tak vek an niin ka hria a, thlan awmloh, thlan sual palh chu tlemte chauh an ni.


Thlan awm loh/thlan sual palh a awmna chhante chu hengte hi an ni:


    1. Personal information lak khawmteah a kimlo (Partial information) leh a diklo (Disinformation) min pek thin vang a ni.
    2. Israel rama kal turte thlan an nih hun laia thlan awm tak, mahse thlan an nih hnua, an mawhphurhna a dingzo leh lote emaw Israel ram thlen hnua sakhuana a hnufual leh ta te.
    3. Israel rama kal thei tur thlan hun laia mi tling nia ngaih leh a mawhphurna pawh hlen zo tak, amaherawh chu israel ram kal hun nghah chhunga lo DA leh hman emaw lo inthlak danglam (sakhuanaah emaw nunphungah).

A tlangpuiin aliyah thei tur mipuite thlantlin an nih hnuah hian aliyah a awm nghal mai thin lo a, chumi chhung chuan thil tamtak a lo thleng hman thin a, chuvangin aliyah dawn hnaih apiang hian thlan tawhsa mipuite dinhmun hi uluk taka ennawn leh phawt turin thu ka pe thin a. A chhan pawh tute emaw chu kan hnawl loh theih loh a an lo awm leh thin vang a ni. A nihna takah chuan aliyah an nghahchhunga zu bawiha lo tlu lutte (alcoholic) emaw sakhuana a practical a an zawm loh vang emaw a ni thin.


Thlanthlin tawhte zingah Mizorama mite chauh hi em ni hnawl leh paih thin an nih?

A chhanna chu "ni lul love". Kum 15 chhung khan Israel-a kal tura thlantlin tawh, hnawl leh si emaw list atanga paih leh tak an awm nual a, anni ho list atanga paih tura thutlukna siamtu leh hnawltu chu keimah ngei Rav khanokh-a hi ka ni. Mizoram leh Manipur atanga thlantlin tawhte kan lo hnawl nual tawh a, kal tur list atanga kan paih leh tam zawk hi Manipur lamchhuak an ni a. Chumai bakah tun hma atang tawh reng khan Israel atanga thawnhaw lehte pawh an awm nual thin a nih kha.


Engtik lai mahin kal tur list atanga ka paih leh tak emaw Israel atanga ka thawnhaw lehte vangin ka inchhir ngailo a, mahse thawnhaw tur emaw kal tur list atanga paih tura thutlukna kan siamtawhte tana chance kan pek leh thinte vang hi chuan ka inchhir thin.


Hetianga chance ka pek leh thinna chhan chu information diklo min pein, an intiam a, an chhungten “a la insiamtha ve mai ang” ti a thu an tiam thin vangin ka lo ring a, “chance pek leh a tha ang” tiin thutlukna ka siam leh thin.


Itzkhak Raham chungchang bik ah

Midangte ang bawkin kum 3 hmalam khan itzkhak-a hi Aliah turte list-ah thun tel a ni a, khatih lai khan itzkhak-a hi sakhuana ah a hnufualin (tawngtaina, tfilin zem te regular takin a ti lo), sakhaw chungchang pawh a hre thlem hle bawk tih kan hre tho a, mahse aliyah nghah chhungin kum a liam dawn a ni tih kan hre lawk a, chumi hun chhung chuan sakhuanaah a lo chak zawk leh regular taka a lo practice kan beisei a, chuvang reng chuan a ni, itzkhak-a kha chance kan pek ni!. Amah pawhin kal tur list-a a telna chhan a inhrechiang hle a, juda dan tha taka lo practice turin a in tiamkam a, intiamkamna pawh a sign reng a.


Tun tum aliyah in buatsaih nan khan ni 10 chhungte chauh kan nei a, vanduai thlak takin kal turte dinhmun- sakhuana a an dinhmun leh sakhuana an practice that leh that loh ennawna hunk an neilo a,ennawnna hun lo nei ilang chuan itzkhak-a dinhmun diktak kan lo hre lawk ang a, Israel rama hruai hnua thawnhaw leh kher ngai lovin, a tir atangin kal tur list ata kan lo paih tur a ni a, chutiangin lo ti ta ni ilang chuan amah chungah leh b’nei menashe mipuite chunga manganna leh lungaihna (צער ) lo thleng hi kan lo pumpelh daih thei zawk dawn a lo ni.


Sakhuana a chaklo midang pawh an awm a, engatinge Itzkhak-a hi hremna pek a nih bik?

Itzkhak-a hi hrem a ni lo a, malsawmna ropui tak, giur malsawmna leh Israel hnam leh Israel ram mi leh sa ni thei turin a tlinglo (unqualify) zawk a ni. a thil neih sa engmah laksak emaw ruksak emaw a nih loh mai bakah a neih tur emaw a chan tur emaw laksak a ni lo. Aman a zira sakhaw dante a zawm that chauhva a dawn theih thil ropui tak, a duh loh vang leh a ngaih pawimawh tawk loh vang chauhva CHAN ta a ni zawk.


Itzkhak-a anga sakhuana a chaklo chu an awm ngei ang, mahse itzkhak-a kha chuan mercaz klita a an awm lai khan sakhuana a la pawlawhin ngaih pawimawhna tlemtal, a der tal pawhin a tilanglo a ni. Mercaz klita a an awmchhung kha hun reilote chauh (thla hnih vel chauh) a ni a, khami chhungte pawh khan a der tal pawhin sakhuana a ngai pawimawh a ni tih kha a ti lang peih thlawt lo a. Shavei Israel-in theih tawp chhuahin a lo kalna tur sum a seng a, inchhunglum a awmna tur in a hmuhsaka, nitin chaw vawi thum a thlawna a dawn theih nan, tanpuina a zawn sak a, a tih ve tur chu a rawn kal rual puite anga tih ve mai kha a ni, chungte chu torah leh Hebrew zirte, mitzvot theih ang ang a zawm leh theih tawk ang zela hmasawn lo tum ve chauh kha a ni a, mahse itzkhak-a kha chuan chutiang chu tumna a nei ve lo a ni. chuvang chuan hetiang hun atana “Golden chance”ah pawh hetianga a khawsak chuan giur hnuah pawh mitzvah a zawm dawnin kan hre lova, chuvangin thuthlukna siam a lo ngai ta a ni. Aliyah leh giur chungchangah hian intihluihna leh inthlemna a awm lova, he malsawmna ropui hi a dawng tlakte hnenah leh chhungril atanga duh tak takte leh thupek (mitzvot) zawm duhte hnena pek chauh tur a ni.


Zah tak leh hmangaih tak chung che u in, tihian ka sawi ang menashe fa tupawh chhungrilah torah leh mitzvot zawm duhna tak tak neilo chuan he malsawmna ropui dawng tur leh he giur paltlangna ropui leh danglam tak hi dawn a "PHU" lo. He malsawmna rochung tur chuan chhungril a duhna tak tak leh torah leh mitzvot-te zawm tura tih tak zetna mimaltin leh community in a neih a ngai.


In thawnhaw hi a nunrawn thlak maw?

Torah mithiam ten tihian an sawi a, "Mi nunrawngte khawngaih tlat thin tute chu, a tawpah khawngaihna a khat mihringte chungah nunrawng takin an che thin" (כל המרחם על אכזרים, סופו שיתאכזר לרחמים ) . A awmzia chu mi va khawngaih ringawt hi in zirtirna dik a ni ngawt lova, tuna thil thleng atang hian entirna a pek theih ang. Mi kan khawngaih a, kan ngaihdam chuan thil hi a kual a kual mai thin a, vawinah hepa hi kan khawngaih a, kan ngaihdam chuan, naktukah pawh a dang kan khawngaih a, kan ngaihdam leh a lo ngai ang. chumi hunah chuan rei lotea kan in giur theihna hlu tak hi pawlawh takah kan la ngai ngei ang. Tichuan a duh tak takte leh tih takzeta beitute kan giur thin na hi sakhuana engatanmah ngaivelote pawh an giur-na ah a lo chang ngei ang, chutih hunah chuan chhiatrupna community-ah a lo thleng ngei bawk ang. Ka sawi kai leh duh chu tun hmaa hetiang chungchanga ka thlutluk siam tawhah khawngaihna avanga ka lo ngaihdam thin te kha, a pawi ngei mai! Miin ka in siam tha tawh ang tia a in tiam a, mahse a in tiamna chhan kha vana awm Hashem a rin avang leh a tih vang ni lo, giur paltlanga Israel rama a awm duh vang chuaha ti a nih chuan hlawhtlinna a awm thei lovang. Hemi chungchanga kan fimkhur loh chuan Israel ramah b’nei menahse juda dan pawlawh taka latute an lo pung ang a, Hashem hma-ah kan ti sual der dawn a ni, tichuan chief rabbinate-in shavei Israel leh b’nei menashe-te chunga a rinna a hloh ang a, b’nei menashe-te aliyah neih theihna turin a thlawp tawh ngai lovang.


Tihian thil pahnih ka ngaihtuah a, menashe-te tana hmasawnna leh kawngtha zawk eng nge ni ang tih chungchangah:

- Sakhuana palzam deuh pawh nise, a insiamtha mai ang tiin beiseina ka nei dawn nge?

- B’nei menashe community pumpuite thatna tur atan leh an laka chhiatna a lo thlen palh loh zawkna turin ka ngaidam lovang tih hi.


Itzkhak-a thawnhaw a nih hi thutlukna dik a ni a, ama tan leh b’nei menashe community tan pawh a tha zawk a. Ama tan a tha, ka han tihna chu puitlinna kawng leh hringnuna mawhphurna lak dan a zir chhoh a, juda nun leh sakhaw dan chungchangah kher ka ti lova, a hringnun kawng a zawhna ah pawh puitling zawk leh mawhphurna hlen thei mi nih a zir dawn a ni. a awm dan leh a chetzia leh a thiltih dan a zirin rahtha leh thalo a awmin, a lo piang thei ani tihte a zirchhuak ang a, kan nuna kan thil tawn reng reng hi a thlawna lo awm mai anilo tihte a zir chhoh zel ka beisei. Itzkhak-a thawnhaw leh thawnhaw loh chungchanga thutlukna siam a nih lai khan b’nei menashe Mizoram leh Manipur a la awmte kan ngaihtuah lo thei lova, anni tana kawng daltu emaw an aliyah ti khaihlak theitu awm hi kan duh lova, chuvang chuan he thutlukna hi khawngaihna leh hmangaihna nen, khilam a la awmte ngaihtuah chung leh itzkhak-a tan ngei pawh a that zawkna tura siam a ni.


Israel ram hi khawizu leh hnute tui luanna ram a ni tiin leshon hara chungchang ziaktu pakhatin a sawi a, Israel ram hi chutiang ram a nih avang chuan a chhunga cheng tlak nih a ngai.


A chunga sawi ang khian b’nei menahse-te hi israel rama cheng tlak an tihte zingah an tel ve em? (tel lo an awm!). a nih leh engatinge Israel rama cheng tlaklote hnawltute leh b’nei menahse-te sakhuana a an chak theihna tura hmala tute hi maksak tak mai a sawisel an nih tak mai?


Itzkhak-a thawnhaw hi P-thian hming ropui tih bawrhbanna (khilul hashem) em ni?

Social media-ah Bnei menashe thenkhatten itzkhak-a thawnhaw hi khilul hashem (חילול השם ) a ni anti ani awm a, khilul hashem zawng a ni lul love! Midangte diklo taka mawhchhiatna nasa tak a ni!. chutianga sawi an lo awm a nih tak zet chuan enge khilul hashem dik tak chu ka han hrilhfiah ang che u.


Rambam lehkhabu Halakhot Yesodei Torah, bung 10, halakha No.10 na-ah tihian a in ziak “Tupawh, ama mimal ngaihdan hmanga, torah thupek mitzvot-te ngai pawlawh emaw la zamtu chuan Pthian hming ropui a ti bawrhbang a ni”.


Khilul Hashem chu torah dan zawm loh hi a ni a, miin torah dan a ngaih pawlawh chuan chu mi chuan khilul hashem a ti tihna a ni.


Khilul Hashem hi torah dan bawhchhiatna nasa tak a ni a, miin a awmdan leh a chet danah a juda sakhua leh dan a ngai pawlawh hle a ni tih a lan chhuah tira chuti chung chuan midangte lakah sakhaw duh tak anga lang leh lawi si, a chet dan leh a lanchhuah danah erawh torah ropuina lang chhuak si lo mihringte hian P-thian hming an ti bawrhbang a ni. Entirnan: tawngtai ngailo, brakha pawh sawi ngailo, torah pawh zir ngailo, nu leh pate leh amah zirtir tute zahna chang hrelo, kipah khum leh lawi si angte hi, chutiang mi chu in giur paltlang tur zingah a tel ve a nih phei chuan, amah ngei chu a ni P-thian hming ti bawrhbangtu chu.


Hei hi torah-in khilul hashem a hrilhfiah dan chu a ni a, chuvangin itzkhak-a mizorama thawn haw hi khilul hashem (hashem hming tih bawrhbanna) ni lovin kidush Hashem (P-thian hming chawimawina leh tih thianghlimna) a ni zawk.


P-thian hming ti bawrhbangtu an tihte chu hengte hi an ni- Menashe mi, a lu chungah kipah awm, juda dan leh mitzvot zawm tura thu leh ziak ngeia dayanim leh chief rabinnate hmaa intiamkam a, a intiamkamna avang leh a tawngkam polite tak avang chauha pawm ni ta! Israel-a a lo kal theihna tura tha leh sum tam tak an sen hnuah, Israel ram a lo thlen hnuin a nuam sa lovang tih hlau a, a awmna in tur an buaipui sak, chu mai a la ni lo, a taksa chakna turin a ei leh in tur thleng an ngaihtuah sak zel a, chung zawng zawng an tih sakna chhan chu halakha dan dik taka juda mi (amah duh thlanna ngeiin) a nih ve theihna turin a ni. Chu mai bakah, a thlawna a thil dawnte pe let leh tura phut let a ni lova, mahse a letling hlauhvin ani chuan torah dante hmusitin, mitzvah-te a ngai pawimawh lova. Amah zirtir tute leh a Rav-te chenin a nuihsawh zui maw! Chumai a la ni lo, b’nei menashe community pumpui aliyah a awmzel theihna tur kawng ti khaihlak theitu a la ni zel a, hemi hi a ni Pthian hming ti bawrhbangtu dik tak chu.


Lawmna chang hriat lohna hi thil sual a ni

Kan torah chuan tihian a sawi Aigupta ramah khan hremna 10 a thleng a, hremna a rawn thlen hmain, mosia khan a tiang vanlamah pharin aigupta ram kha a vaw thin a, mahse mosia khan Aigupta ram kha vawi 8 chauh a vua a ni- tui thisena a chan tir dawn khan a tianga Nile lui a vuak a ngai a, hrik Aigupta rama a puan tir dawn khan lei (אדמה ) a tianga a vuak a ngai bawk a, mahse chu thil pahnih chu mosia khan a ti lo”. Hemi chungchang hi Rav ropui tak pakhat, Harav Mordechai Eliahu Ztz”L chuan ti hian a hrilhfiah.


“Mi tute pawhin, kan chunga thiltha tih tawh tute kan hriat reng a pawimawh, kan chunga thiltha ti tute kan tih hian thil nung, thaw thei chauh sawina a ni lova, thil nung emaw thil nunglo, chet pawh che thei lo (דומם ) te pawh a huam vek a ni. chutianga midangte thiltha tih sakte hriat rengna nei mihring chu kan rabbi ropui mosia kha a ni. Naute a nih laiin, Nile luiah thuhruk a ni a, nile tui fawnte kha a awmna bawm an lo thlenin, an fawn tawp thin a, tichuan a him phah a ni (midrash raba, shemot parasha 9, 10). chutiang bawkin, aigupta mi, a unaute tinatu a thah khan, lei laihna tur hmanrua a nei lo a, aigupta leite kha mitthi ruang a phum theihnan an ka an lo ang a (midrash raba shemot parasha 7, 10). chuvang chuan nile lui leh aigupta lei te kha nunna nei ni lo mahse mosia khan a vua in, kut a thlak duh lo a ni, a chhan chu lawmna chang hrelo leh a chunga thiltha thlentirtute theihnghilh thin mihring nih a duh loh vang a ni.


Hetiang zawhna hi a lo piang ngei ang - mosia khan nile lui leh aigupta lei te kha lo vuain lo vawlo ta pawh nise, eng nge chu chu ngaihpawimawh a ngaihna? Lui leh leite khan hriatna an nei ve reng em ni? a chhanna chu hei hi a ni. Lui leh leite khan hriatna an nei hranlo, mosia khan vuain vaw lo se, an tan awmzia a nei em em hranlo, amaherawh chu mosia erawhin a ngai pawimawh em em a, a chhan chu ani zawngin a laka thiltha lo titawh tute chu thilnung an ni emaw ni lo emaw, an hria emaw hrelo emaw a thliar hrang ve lova, a lawmna leh an ni avanga him taka a awm avangin zahngaihna a lan tir zawk a ni. Chuvang chuan kan torah chuan lawmna chang hria nih leh thiltha min tih saktute chunga thatna peklet ve ngei hi a hlut zia leh a ropuizia min zirtir.


Thiltha min tihsak tute chunga lawmna chang hriat loh chungchang hi kan parasha pakhat “Parashat Balak” (midbar/number 22) ah kan zir a.


Hemi parasha-a kan chhiar thin chu bilaam-a dawithiam (zawlnei der) a hun laia mi ropui leh mi dik anga ngaih khan ama sabengtung ngeia chuangin israel fate anchhe lawh turin a chhuak a, tihian a in ziak a,” Tin, sabengtung chuan lalpa vantirhkoh, khandaih kenga kawnga ding chu a hmu a, tichuan sabengtung chu kawng atang chuan a peng a, ram lakah a kal a, tin, bilaam-a chuan sabengtung chu kawnga lettir tumin a vua a, tin, lalpa vantirhkoh chu grep huan pal leh pal inkar khuarah a dinga. Sabengtung chuan lalpa vantirhkoh chu a hmu a, pal chu a va ngheng a, bilaam-a ke chu palah chuan a nghengbet a, tichuan, a vaw leh a, lalpa vangtirhkoh chu a piah deuhah a kal a, hmunchep lai tak, dinglam emaw veilam emaw pawha penna awm lohna lai takah a ding a. tin, sabengtung chuan lalpa vantirhkoh chu a hmu a, bilaam-a chu a bawhpui ta a, tichuan bilaam-a thin chu a lo alh ta a, a tiangin sabengtung chu a vua a. chutichuan lalpan sabengtung chu a tawngtir a, bilaam-a hnenah chuan “eng ka ti che nge, hetia vawi thum zet min vuak tak? a ti a, tin, bilaam-a chuan sabengtung hnenah chuan, “Min tihnawmnah vang a ni: khandaih phei chu lo keng ila, ka tihlum tawh hial ang che chu”, a ti a. tin, sabengtung chuan bilaam-a hnenah,”Tun thlenga I chuan fona I sabengtung ka ni lawm ni? hetiang hian ka ti ngai che em ni?” (I naupan lai atanga tun thlenga I chuanna ka ni a, engtik lain nge I chunga buaina ka siamsak tawh thin che? I chungah thiltha lo ka ti tawh ngai reng em? ka damlo pawh a ni thei a, perek rap palhin ka ke a na pawh a ni thei a, enga tinge min tina tur leh min hrem tura I hmanhmawh em em? ) a ti a, ani chuan “ ti ngai lo ve,” a ti a.


He parasha atanga hian thu tam tak zir chhuah a ni a, chung zinga mi chu masekhet avot bung 5, misna 9 a in ziak-

- Kan pa Abraham-a zirtirte atangin thil pathum a awm a.

- Misual Bilaam-a zirtirte atanga thil pathum a awm bawk a.

- Thil tha lam thlir thiamna, boruak zangkhai siamna, thlarau in ngaihtlawmna- heite hi kan pa Avraham-a zirtirte atanga kan zirchuah a ni.

- Thilchhe lai chhauh hmuhna, boruak so sang/thinrimna siamna, thlarau/rilru zau leh lutuk- heite hi misual bilaam-a zirtirte atanga zirchhuah a ni.


Thil chhe lai chauh hmuhna- Sabengtung khan bilaam-a hnenah “engtik lai pawhin ka chungah I chuang fova, thiltha hlir ka tih sak thin che a, hahdam leh thlamuang takin ka chungah ka chuan tir thin che a, I bungrua rit tak takte kha dawhthei takin ka phur thin a, engtik lai mah khan I chungah thiltha lo ka ti ngailo, mahse reilote chhung chauh harsatna a rawn thleng a, thilthleng awmzia I hriat loh vang zawk a ni. Tichuan chumi chhung reiloteah chuan I laka ka rinawm thinna zawng zawngte, I chunga ka thiltha tih ve zawng zawngte kha I theihnghilh nghal vek maw? Dik taka ka chunga rorelna hi ka phu ve lo em ni? I chunga ka thiltih that vete kha I hrechhuak ve eih dawn lo em ni?.


Bilaam-a chhan na erawh “khandaih phei chu lo keng ila, ka tihlum tawh hial ang che chu”, tiin.


In lakah tihian zawhna ka nei ve a

Sabengtung angin, keini “Shavei Israel” te hian intana kan thil tih hi hre reng turin kan phut lo che u, mahse thil lawmawm leh duhawm a ni lo em ni? a nih leh, keini shavei israel-te hian b’nei menashe mipuite hmasawnna tur hian, hmangaihna leh dawhtheihna nen kan kovah kan phur che u in, kan nghat lo che u em ni? b’nei menashe community chhungah hian misual bilaam-a ang an lo awm a ni. Bilaam-a anga, a hun laia miropui leh midik anga ngaih. Harsatna eng emaw a lo thlen avanga, a hmaa thiltha lo thleng tawh thin zawng zawngte theihnghilh ta vek thin mihring!.


Ni e, a intih mualpho theih, a in hmuhsit theih, lashon hara hmun tinah a theh darh theih, lawmna chang hre miah lo mihring pawh a nih theih e, mahse chutiang mite chu, hmanah shavei israel-in israel ram an kal theihna tur leh giur tha taka a paltlang theihna tura a lo puih thinte, anmahni hmasawnna tura sum leh pai an pek, chu chauh lo pawh tanpuina chi hrang hrang an pek tawhte ho kha an ni.


B’nei menashe community a awm zawng zawng hi chutiang mi chu in ni ka ti hauh lo, a tam zawk hi chutiang mi chu in ni lo, amaherawh chu “ngawih reng hi pawmpuina lan tirna chi khat a sin”. Hetiang thilthleng mipuiin an dawnsawn dan hi a NA a, hetiang dinhmun kan thleng hi (in thawnhawna) a NA tel hle bawk.


Social media hmanga bnei menashe mipui thenkhatin, shavei israel-a thawkte an tih mualpho leh an tih hmingchhiat hi a na ka tiin, a pawi ka ti hle.

- Michael Freund, a nun zawng zawng deuh thaw leh a sum tamtak bnei menashe-te tana hlantu, huat a nih rak thleng pawha bnei menahse-te tana in pumpe thin mi.

- Itzkhak Kawlni, chhun leh zan pawh thliar hrang thei lo khawpa b’nei menahse-te tana kum tam tak chhung hna lo thawk tawh, mawhphurna harsa tak kan phurh tir thin. hreawm leh nuamlo ti chung pawh a Itzkhak Raham airport-a thlahtu.

- Tzvi Khaute b’nei menahse-te tana a nun a hlanna leh a inpumpekna hian huam chin reng a nei lo.


Hetiang khawpa an tana hnathawktute chu an hming tichhiain, thu diklo an vai khum tak vak vak mai ni! kei thlengin min hmerh a, kei zawng, an ni lakah hian ka la te lua e.


He thil thleng hi a vawikhatna chauh a ni lova, mi thenkhat, mi sual, lawmna reng neilo leh anmahni tanpuitu kut sehsak hreh hauh lote avang hian vawi duailo mak tihna a khatin ka lo awm tawh thin. hetiang khawpa intihchhiatna thlen tir hreh lotute avang hian ka thinlung hian na a tuar a, ka mit atangin mittui a lo luang a, he in zahpahna tello leh diriam taka innghaisakna avanga na ka ni lo, he thil thlen tirtute, ti tak maia an lo tlakhniamna hian min tina zawk.


Parashat “Ba- Shlakh” tawp lamah khanah “Amelekh” chungchangin a rawn chhun zawma, chumi hma chiah cuan “Masa vemeriva” (Israel mipui pungkhawm phun nawi leh in hnial buaina hmun a nih avanga masa vemeriva tia, a hming an vuah) changah khan israel mipuite chuan ti hian an sawi a “kan zingah hian Lalpa chu a awm nge maw awm lo le?” tiin. (היש ה' בקרבתינו אם אין ) .


Rashi chuan tihian a hrilhfiah “Israel fate lawmna neih loh leh lawmna chang hriat loh avangin, Amelekh ho kha Lalpa in anmahni a hrem nan, israel fate ti chimit turin an rawn kal a ni” tiin.


Enge lawmna chang hrelo, lawmna neilo an tih chu? (כפיות טובות )

“Pa hian a fapa chu koki chhuan chungin kawngah a kalpui a, a fapa chuan thil a hmu a, he thil hi min pe rawh a ti a, a pa chuan chu thil chu a fapa a pe a, chutiang chuan thil vawi hnih, vawi thum a dil a, a pe zela, tichuan, an kal zelna ah chuan mi pakhat hi an tawk a, chupa hnenah chuan a fapa, a pa kokia chuang mek chuan ka pa I hmu em? tiin a zawt ta mai a, a pa chuan a fapa hnenah chuan “khawnge ka awm tih I hrelo em ni? tih leh leia nghah a rual a, ui a lo kal a, a seh ta a” (Midrash shmot raba 26, 2).


Israel fate kha aigupta atanga an chhuah khan Lalpa Pthian thil mak tihte kha an mit ngeiin an hmu a, chuti chung pawhin “kan zingah hian Lalpa chu a awm nge maw awm lo le?” an la ti thei a nia! Lalpa P-thianin engtik lai pawhin a awm puilo em ni? an chunga Lalpa’n thiltha a tih sakte kha an va theihnghilh hma em!


Shavei israel leh bnei menashe-te hi pafa in koki chhuan, midrash in a sawi ang kha kan ni. a fapa khan a dil emaw dil lo emaw, a pa khan engtiklai pawhin pek a duh a, India a awm lai atang tawhin a enkawl a, Israel-ah a hruai thleng a, a giur chungchangah a pui a, chenna bulfuk an neihna turin a tanpui leh a, hma a sawn theihna turin scholarships a pe a, a sum a puktir bawk a, chumai bakah tanpuina dang tamtak a la awm. Chung tanpuina zawng zawng a dawn hnuah pawh, a kokia thulai reng a fapa chuan khawnge a pa a awm pawh zawt mai lovin, a hming a han sawi chhia a, chil a chhak khum a, pa thalo, sual, bum hmangah a puh zui bawk a ni.


A tawp nan:

Itzkhak Raham chungchangah thuthlukna awlai lo tak siam a a ni a, kha thutlukna avanga mi thenkhat kan chunga an chet dante chu engpawh ni rawhse, keini tan ngei pawh itzkhak raham hi a hlu a, a in tuaithar lehna turin kawngkhar inhawng reng se, in tuaithar lehin juda sakhua a lak dan leh a nun kawng a zawh dan pawh a la inthlak danglam ang a, chumi hunah chuan, amah hruai kir leh hi kei tluka chak an awm bik lovang.


Kan pa Abraham-a zirtirte ang kan nih chhoh theih zel hi ka beiseina leh duhthusam a ni. (bilaam-a zirlaite ang ni lovin), an ni chuan thiltha an hmu thin a, chu thil tha chu a lo that leh zual theih nan an theihpa tawp an chhuah a, Pa Hashem chungah leh anmahni tanpui tute chungah an lawm thin a ni.


Rav Khanokh Avitzedek


Shaming

Posted by Moshe Ilan on June 7, 2017 at 5:30 PM Comments comments (0)

Shaming hi tunlai ah chuan a lar hle a, he thil avang hian mi tam tak ten a bik takin thalai leh naupang zing ah Shaming avanga mahni nunna hial tihlum an tam tawh a ni.


Shame (Zahna) hi a Ivrit chuan Busha tih ani a, chu chu a tuartu tana rilru nawm lohna em em niin, a mihring pui ten ama chungchang thu ualau taka an tlangzarh na avanga dan pangaia a awm dan zawng zawng pawh tihdanglam tir vek thei niin, atan vanpui chim ta hialin a inhriat phah thei a, hei hian ngaihtuahna thalo leh dan pangaia a thil tum loh leh tih duh loh thleng thleng tih puitlin tumin a rilru leh ngaihtuahna a siam phah thei a ni.


Shaming hi Ivrit chuan Biush tih ani a, chu chu intihzahna tihna a ni. He thumal hi tunlai ah chuan thu thehdarhna chitin reng hmanga mihring emaw, Brand (Mutag) emaw, pawl emaw, vantlang a tihzahna tura thil tih a ni.


A tlangpuiin hetianga Shaming tih hi an tih hmingchhiat a te rawn/zawt hmasa lo emaw, an duh dan leh rem tihna ang ni lova Social network lamah te post siama an hming leh chanchin emaw, an thlalak emaw, an video emaw ualau taka vantlang hriat leh hmuha pholan ani thin a, hei hi mi tam tak a sang tel hial hialin lo hmuin chung te chu lo thehdarh (Share) chhawng ve emaw, lo LIKE emaw, lo sawi chhungzawm (Comment) ve fo thin ani bawk a, hei hian alo tuartu tuarna chu atih sosan belh zel bakah a hleihluakin ati hluar belh ve zel bawk a ni.


Hetianga Network hmanga Shaming tih hi dan naran leh a tlangpuiin mi te rilru tih natna leh tihchhiatna lam a chhe zawnga vantlang se se chu titi phunglenga chantirna ni mahse, a tha zawnga inlumlet thei ani tho bawk, hetiangin, mi chaklo leh chanhai zawkte chanvo chu mi lian leh thil tithei te chaldelhna leh nek chepna ang chi thuhla ah te vantlang a thehdarhna hmanga mipui au aw (Hashpaa) hmanga sut tir leh emaw, siamthat tir na ah a chang ve fo bawk.


Ngaihdan lam thu a Shaming lam thu post reng reng ah hian a post tu hian ama awn lam chauh ngaihdan uar thei ang ber emaw, mite thinlung dek thei tur ang bera ama thlirna chu point deuhin a ziak ang a, chu chu a lo hmutu mipui te chuan chutiang ang thlur chuan uar tak takin an sawi zui bawk thin a ni. Hei hi a taka thil awmdan niin mihring psychological a thil awm dan ve reng a ni.


Itonut Chanchinbu lama chanchinbu mite thu chhuah dan ah chuan an awn lam deuh pawh uar deuhva an ziak duh anih pawhin a lehlam te thuchhuak (Tguva) chhe te tal an thiamthu sawina an zep tel thin a, amaherawhchu, tunlai khawvel inhawng huau ah hi chuan mi ten a lo dawngsawng tu te tawrh dan tur pawh chhut buai lo leh zawt hmasa lovin pawi tihna leh ngaihsakna pawh an dawn hmasa ngai lem lo niin a lang.


A buaithlak ber chu a post mualpho tu hian lehlam side chauh thu a pholang a, tichuan, a hmu tu leh chhiar tute ti vir tawk lekin, rang taka han finfiah theih ni tawh bawk thin si lo, chuvangin thu tam tak a leng ta nuai nuai mai thin a, hetianga thu a vir vel tawh hnu ah hi chuan thu kimchang puanzar rawn ni leh mahse chu chuan hun engemaw ti chhung lek chu boruak han rial tir ve bawk mahse, kar lovah mahse tih ah a chang leh zel tho a ni.


Hetianga intih mualphona hian mimal chungchang thu tam tak a hlei a hluakin a tlang than tirin a pholan phah a, chu chuan a tuartu hnenah rilrulam inhnuaichhiahna a thlen tir na sa thei em em a ni.


Israel ram ah hian School naupang te zingah an thil tih lai emaw, an thlalak emaw, an video emaw an chanchin hetianga Shaming tih nan hian Whatsapp leh facebook lamah te an thian ten an chanchin an lo thehdarh thu Chanchinthar lamah te kan lo hre fo tawh a, kum tinin hetiang avanga school naupang mahni intihlum hi sawi tur an awm reng thin a ni. Mizoram lamah pawh hetiang thu hi sawi tur a awm ve nual tawh bawk.


A tawp khar nan hei hi a Hebrew slang chuan "Sheiming Bareshet" tia koh a ni.

Tunlai kan buaina ka ral thlir dan

Posted by hakhokhma on June 5, 2017 at 8:30 PM Comments comments (0)

Shavei Israel hi an website a an ziah dan ah kum 2002 khan lo ding tanin (Sorkara Amuta an inziahluh kum erawh chu 2004 a ni)  an thupui ber ram pawna Juda awm te hruaikir leh chhawmdawl hna chu uar takin an thawk nitin thin a ni.


Hetia in hrang changa mahni puala an din hma hian an hotupa Michael Freund hi Rav Elyiahu Avichail zts"l hnuai ah a Amuta (Association) "Amishav" ah Director hna chelh thin ani a, tichuan, an ni inkarah intihthiamlohna a lo chhuah tak ah chuan mahni a inla hranga in hrang chang turin Amuta thar (Shavei Israel) chu a din ta a, tichuan, a hma lama Amishav hna pui ber ram pawna Juda darh te hruaikhawm leh an chanchin chhui hna chu he Amuta thar (Shavei Israel) hian a tive ta a ni.


Hetia Benei Menashe te buaipui tu puipa te ber an in tihhran tak si ah chuan Benei Menashe mipui te pawl siam ve BMC (Benei Menashe Council) hruaitu te chuan eng tiangin nge kan thawhpui chhoh ang, tiin vawi enge maw zat a tu lam lam pawh chu inhmuhkhawm puiin a tawpa an thutlukna ah chuan he pawl thar Shavei Israel te nen hian an thawk ho dawn lo tih ani ta a ni.


Hetiang nuaih kar ah hian, Shavei Israel te chuan an tum hlawhtling takin ram pawna Juda darh te hruaikhawm hna chu an thawk ta mup mup mai a, chung an Project zing ah chuan Benei Menashe te pawh an awmna rampawn India ram ata Ram thianghlima hruai hawn hna chu an hna pui ber ani lo thei lo a ni.


Tichuan, beiseina sang tak hmanga mipui te pawl siam BMC meuh pawh chuan hetia an buai hnu a an unau Mizoram leh Manipura la tangkhang te hruai tu te ber Shavei Israel te chu an thawhpui tak si loh avang chuan mipui te zing atangin kei inti leh rem hria thenkhat te chuan pawl deuh reuh te din in emaw, pawl thar siama bul tan tha leh tura bei turin mipui te ko khawm in vawi engemaw zat chu comittee te an ko thin a, amaherawhchu hetiang committee reng reng ah hian an thupui ber atan Shavei Israel chungchang thu khel chu ani lo thei thin ta lo a ni.


Hetiang nikhua a inhmuhkhawm hian kalkhawm mipui te zingah chuan ngaihdan a rawn phir chho tan ta a, Shavei hi i thlawp mai ang u tih emaw, Shavei kan thlawp chuan kan Pa ber Rav Avichial-a kan hlamchhiah ani dawn a tih emaw in. Hetiang nuaih ngaihdan a rawn pian chhoh tak ah chuan mipui te rilru put hmang chuan a hnampum huap ang thaw thangin mipui te thinlung a pawt auh zo ta a, mipui te chu hlawm hnih angin a pawt then ta ruah mai a ni.


Hetiang hi thil awmdan anih tak si avangin mipui te ta ni anga kan hriat thin mipui pawl ber BMC pawh chu a kal tluang tha thei ta meuh lo va, inthlan pawh inthlang tha hlei thei ta lovin mumal lo zetin tun thleng hian ala awh der der ani ber awm e.


A lehlama thlirin Shavei Israel chu Amuta ani a, Private Organization niin a hotu lawk te pawh Benei Menashe mite an ni lo bawk a ni. Chuvangin, kan hnam zinga mi thenkhat te pawh a chhungah ka lut ang a, a chhung atangin kan hnam duh dan angin hma ka han la teh ang tiin lut thin ve bawk mahse, a thu neitu leh rorel pha china an tel ve theih loh avangiin an duh ang leh an thil tih tum te chuan kori a su vak thei thin lo a ni.


Hetiang hi thil awmdan anih avangin kum tin deuh thaw hian mipui tan hma lak tum inti te zing atangin ngaihdan thar, rawtna dang a chhuak a chhuak ta mai a, chung zing atang chuan a Mizoram lam inlakhran mai duhna te pawh a rawn chhuak tan ta a, marawhchu, tanfung fing hmang lova han inlak hran ngawt lah chu kan thurin Torah dan kalha inpumkhatna duh lo tu nih changchawi tu nih an hlau thum vek si.


Tichuan le, kum 2009 bawr vel khan ro fing ruahtham loh zet rel chhuak in kan Mizo na hnam thil hmathehin i intikhawm ila, tichuan, kan unau Manipur lam chu an inkiltawih ang a, kan hnawh lovin min hran mai dawn ani tiin, thiam takin "Inpumkhat nan" tih thupuia changchawiin he ruahmanna dodal tu chu inpumkhatna duh lo tu ni anga lantir chho vin, hemi kum atang hian kum tinin a huhova kan Benei Menashe ho let letna thin chu alo awhrawp hret hret tan ta a, in tih "Mizo Isarel" na chu alo tiak tan ta a ni.


Hetia a Mizoram lam chhuak te inlakhran tumna lo chhuah tanna ber pakhat hi inhruaina kawnga a Mizoram lam aia Manipur lam te an hruai zin zawk anga a lan vang ani a, hei hi eng tin nge hma kan lak ang tiin Kiriat Arba khua ah ngei pawh mizoram lam chhuak te hemi chungchang thu ngaihtuah hian mizoram lam chhuak mipui te ko khawma sawi ho alo ni tawh bawk a ni.


Hetianga Benei Menashe mipui te koh khawm anih a Shavei Israel lam thu sawi ho anih reng reng te hi Shavei lam hotu te hian a kip a kawiin an hre leh vek zel thin a, tichuan, an ni lam ngaihdan ah chuan "Min do pawl kal khawm" tih ani ziah thin a, tichuan, hetianga a kokhawm tu te emaw, a ko khawm pawl te hi an hre reng thin a ni. Amaherawhchu, an ni chu Sap pachal te niin polite tak chungin mipui te an dawr reng zui thin tho va, an thiam thu emaw, an ngaihdan an rawn puanzar thu kan hre ngai lem lo. Tin, an thupui ber kan nih angin emaw, an ni tan keini chu pem thar ve mai kan nih avangin er leh chawtak khuk a khuk pui chi ah min ngai lo pawh ni va hmiang.


Tun hnaia thil thleng kan nau pakhat a in Giur hmaa Shavei Israel te criterion siama thla hnih chhung leka ding zo lo an tih an thawnhaw leh tak chungchang ah pawh "Mizo Israel Thalai Pawl" inti te chuan hma lak tumin mipui te an ko khawm a, hemi chungchang ah pawh hian a hma lama facebook lama thu an thantir vel leh mipui te comments na tea Shavei Israel leh a hnathawk leh a Giur tu tur Beit Din Rabbi te an diriam na zawng zawng pawh tunhma ang thovin an hotu te hian an hriat vek a rinawm a, hemi chungchang ah pawh hian an ngaihdan tur chu eng dang anih a rinawm hran loh. An sa viau a an rawn chhanglet ta anih chuan an chhang na khawp in a rinawm a, anih loh erawh chuan tham lo tak angin ok ok an ti liam leh mai mai in a rinawm.


Tin, kan thalai hruaitu tena Shavei Israel hotupa hemi chungchang thua lehkha kan thawn an tih a rawn chhanlet mai loh thu facebook lama heng kan hruaitu te kut ziak atanga kan hmuh danah pawh hian engemaw chen chu a rinthiam theih in ka hria a, a chhanchu, tunhma ang bawkin hetianga pawl deuh reuh lo ding tawh thin te tihdan ang thovin a hunlaia thil thleng kha hmang tangkaiin khami phen ah khan thawk ho tur lam emaw inhmelhriat pui tur a insawmna lam thu ziak an telh ve emaw ni chu aw, ka ti rilru a ni. A chhanchu, a hma lama kan thailan ang khian Shavei chungchang thua mipui ko khawm thin tute chu eng tiang angin nge an (Shavei) hotu te hian an ngaih thin kan tih ang khian, hetianga rindan hi dik nita ang se, eng vangin nge thawh ho emaw, inhmelhriat pui chu an tan hnemhnanna awm teh lul ang ni ka ti a ni.


Eng le khaw le, hetiang nuai nuaia kan hnam chhunga buaina a awm chang thin hian kei ka lo duh dan leh thlirdan ah chuan kan Sakhaw lam pu te kan Rav te ho hian pa chan changa mipui te min khap dai emaw, min chalrem tu emaw atan hma han la se hi ka ti thin, mahse an bibo daih zel thin a, nge ni, kan hriat pui ve lem loh hian hetiang hnam chhung buaina puanzar phen ah hian an mahni zawk hi an lo awm khiau zawk em ni. Ngaihtuahna a tithui khawp mai.


Eng le khaw le, kan remhriatna leh rawtna te chu kan unau Ramthianghlim ngai ngawih ngawih te lo kal ve thuai theihna tur dal thei tu ah chang lo se, kan rem hriatna te a tha zawnga a chan theih thin na turin Lalpa P-thian in kan hruaitute chungah finna pe se, tih hi ka duh thusam ni teh se.

Mizo Israel Thalai Pawl

Posted by hakhokhma on June 3, 2017 at 6:15 PM Comments comments (0)

Ni (23.3.2017) zan khan Afula khua ah Israel ram hmun hrang hrang (Afula, Natsrat Ilit, Beit El, Kiriat Arba, Jerusalem) a Mizoram atanga pem Benei Menashe thlalai thenkhat te chuan Chapchar Kut hmanna tur thu rel khawm turin an inhmukhawm a, hemi tum hian ni (12.4.2017) Pesakh Khol Hamoed laia Kiriat Arba khuaa Chapchar kut hi hmang turin an rel thlu a. Tin, an sum tuak nan Badge leh Lucky ticket vel an zawrh chhuah tur thu an rel tel bawk.


Hemi tuma an thutluk nemngheh nan hian "B'nei Menashe Thalai Chapchar Kut Organised Committee Israel" tih an hmang bawk a, tin, facebook lamah Page siamin a hming atan " Young Menashe Mizo Israel " tih an hmang bawk.


Tichuan, a hnu deuh June thla 2017 atang khan fb account neiin " Mizo Israel Thalai Pawl " tia koh niin, chuta tang chuan an Hriattirna vel thu an puang zar deuh ber.


Tichuan, he "B'nei Menashe Thalai Chapchar Kut Organised Committee Israel"  te hi ni (01.05.2017) khan Afula khua ah inhmukhawm lehin mumal zawka pawl thar ni turin an din/insiam rem leh a, he an pawl hming atan hian "Mizo Israel Thalai Pawl" in vuah in a hnuaia kan hmuh ang hian hriattirna an siam.

-----------

HRIATTIRNA


Shalom lekulam.

Kan hriat theuh angin Thalaite hmalakna in kumin 2017 Chapchar Kut chu hlim tak leh changtlung takin Thalaite hmalakna in kan lo hmang zo ta a, P-thian zarah Mizo B'nei Menashe fate Israel ramah engemaw zat kan awm ve tawh a, kan la awm belh zel dawn bawk a, kawng hrang hrangah hmasawnna leh hlawhtlinna chang zelin Israel ram timawi tu nithei turin tan kan la sauh sauh zel bawk dawn ani. Chutih mek laiin engtin nge hei aia chak leh zuala hmasawnna kan neih theih ang, engtiangin nge hei aia kanlo inpumkhata tun aia lungrual leh zual zawka zaikhat a kan luan za theih ang tih hi thalai te rilru luah tu ber ani a, inpumkhatna leh thawhhona tha kan neih siloh chuan hmasawnna tak tak hlawhchhuak zo lovin hnam dangte hmuhsit leh nuihzat kan ni mai ang tih hi kan hlau em em a ni, chutiang hun duhawmlo kan tawn lohna turah chuan inlungrualna hi thalai te chuan pawimawh hmasa ber a hriain rei tak chhung chu kan sawi ho tawh thin a, ngaihdan hrang hrangte bengsik a kan ngaihtuah hnuah, Pawl mumal tak din tha in kan hnam tana ding turin Thalai Pawl chu din ani ta ani.

Vawikhat na atan Dt 01.05.2017 khan Pu Marcus Hrahsel te chenna in Afula- ah inhmuhkhawmna neih ani a, chawhlui kil ho na te neih nghal ani bawk.


PAWL HMING : Mizo Israel Thalai Pawl.

A DIN CHHAN LEH TUM

1) Mizo Culture leh Custom chhawmnun leh vawnhim.

2) B'nei Menashe Zofate tana hmasawnna ngaihtuah.

3) Nghet leh zuala kan in laichinna leh inbiakpawhna ti tha tura hmalak.

4) Tanpui ngaite tanpui.



PAWL HRUAITU TUR A THLAN CHHUAH TE:

President : Rachel (Lc) Fanai - Beit El

Vice President : Marcus Hrahsel - Afula

General Secretary : Shmuel Boitlung - Beit El

Asst Secretary : Yafet Khawlhring - Kiriat Arba

Secretary Media/Info & Publicity : Jevulun David - Jerusalem

Asst.Secretary Media/Info & Publicity : Bat El Colney (Mafeli) - Afula

Treasurer : Esther David - Afula

Finance Secretary : Geula Kingbol - Afula

Secretary Sport & Culture : Elkhanan Fanai (Mawia) - Jerusalem

Asst.Secretary Sport & Culture : El Khayim Israel - Afula

General Secrectary President

Shamuel Boitlung Rachel (Lc) Fanai


Secretary Media/Info & Publicity

Jevulun David


Mizo, Israel Thlah Chungchanga Pi Zaithanchhungi Ngaihdan Hi

Posted by Moshe Ilan on May 8, 2017 at 4:35 PM Comments comments (0)

Tun hnaia Mizo zinga thiamna lama milar rual thahnem tawk tak Friends of Israel inti ten ‘Mizo-te hi Israel thlah kal zel (Lost Tribe) kha kan ni e’ tih champion-puitu Pi Zaithanchhungi hnenah Certificate of Appreciation an hlan a, he Certificate-a hming sign-tu 23 zingah Mizo zinga Historian ropui tak tak Prof Darchhawna , President Mizo History Association leh Dr Sangkima, Secretary, Mizo History Association te bakah kan Theologian ropui leh damrei Rev Dr HS Luaia te, kan chhuanvawr Dr HT Sangliana te pawh he Certificate a hming sign-tu zingah an lang.


Mizo-te hi Isarel Hnam Bo kan nih zia fiah nan Pi Zaii hian register-ah thil tam tak a chhiahchhiah thap a ni


Engvanga Certificate Hi Dawng Nge A Nih Rawk ? : Pi Zaithanchhungi w/o Pu LN Tluanga (Former CYMA President & MLA), ‘Hope Lodge’ Electric Veng, Aizawl hian Israel ram hi 1983 leh 1994-ah a lo zuk thlawh tawha,a thil hmuh leh hriat atangin research a bei ta ngar ngar a, a lehkhabu pakhat ‘Israel -Mizo Identity’ tih chu kum 1990 khan tihchhuah a ni a, English a ziak a ni bawk a, a ngaihven chin khawvel mi hrang hrangin an chhiar a, amah Pi Zaii ngei pawhin Israel ho chhiar theih turin Israel ram mipawimawhte chhiar theih turin a zuk thawn nghe nghe a nih kha.


Rev Dr Zairema pawh ‘Mizo-te hi Israel Hnam Bo kan ni em ?’ tih Documentary film siamtutu ten khun takin an kawm


1991 khan Israel khawpui pakhat Tel Aviv-ah ‘Lost Tribes Exibition’ tih chu thla hnih awh zet neih a ni a, he hunah hian Pi Zaii pawh hi zuk tel vein, a lehkhhabu buatsaih ‘Israel – Mizo Identity’ tih pawh thahnem tawk tak sem darh a ni nghe nghe a ni. Pi Zaii hmalakna avang hian Israel mipui zingah pawh keini Mizo India hmarchhak kila khawsa te hi he lam thilah an mahni lamin min rawn ngaihven ta zawk a, Mizoram-ah Israel lam hi an lo zin ta fo a ni. Kum 2004 August ni 6 khan Israel Rabi rual 6-in he lam ngaihven hian Mizoram an lo lut a, Pi Zaithanchhungi ngei pawh hmuin, Pi Zaii research atangin Mizo te leh Israel hnam inhnaih zia leh tunhma atanga inanna tam tak lo awm chu vawiin ni a Mizo leh Israel-te dinhmun an chhui ho ta a ni.


Kum 2005 March ni 30 khan Israel hnam bo zinga pakhat kan nih thu chu Shephardic Chief Rabbi Shalom Amar chuan khawvel pum hriatah ‘Mizo-te hi Israel Hnambo pakhat an ni’ tih a puang ta a ni. Israel Hnam bo zingah Manesia ( Bnei-Menashe – Chhinlung – Israel) thlahte kan ni tih an sawi fiah bawk.


He lam thu ngaihventute chu kha tih hun lai khan an lawm em em a nih kha, Pi Zaii hnathawh avanga Israel hnam zawkin min rawn chhui a, Israel hnam bo Manesia thlah kan nih thu keini Mizo te sawi mai ni lovin, an mahni ngeiin min rawn puang a, hnam khat, unau za kan nihna chu Israel lam hian an la thu tak hle a ni.


Hetih lai hian Mizo mipui zingah engah maha ngailo an tam zawk a, Israel hnam bo Manesia thlah kan nihna min rawn chhuichhuahnate chu Juda Sakhua-a inbarhluiha turah mi tam zawk ngaihdan a nih avangin hei hian awmzia a nei vak lo a ni. Chief Minister Pu Zoramthanga ngei pawh hrihfiah a ni a, a ni pawh hian a bengkhawn vak tlat lo.A chhan ni bera ngaihah chuan a ni politician a ni a, a vote bank pakhat Mizoram Synod mitmei a veng deuh niin ngaih a ni.


Thlahtu Chhuina Atangin Israel: BC 721 velah Asuria atangin Israel hnam thenkhatte chu sumdawnna thil avangin China-ah an luta, thlah kal zelah khawsa hlen tam tak awm ta a, Great Wall of China satu zingah pawh telin, a rama lo khawsa hmasa Buddist sakhua vuantu ten thisen hmanga inthawina te an khap avangin Israel Juda leh Muslim sakhua vuantute pawh an buaia, thisena inthawite pawh khap sak an ni hial a, serh tan te pawh an lo practice thei ta lo a, heng zingah hian vawiin ni a Mizote hi kan tel ve a ni tih a ni… hun a lo kal zela vawiin hi kan thleng a ni tih a ni. China ram-ah pawh keimahni ang Israel Lost Tribe hi an awm ve nual a, 1948 khan China ram atangin mi 5000 chuangin hnam bo an nihna hre rengin Israel ram an pan tih sawi a ni bawk.


Tute Hnam Nge Israel Chu:Khawvel ram pumah Israel Sawrkar-in hnam khat anga hnambo a a chhal chu Mizo te chauh hi kan nia, ram thenkhatah chuan eng hnam hnam emaw chu an awm ve pheuh pheuh a ni awm awm e tiin PiZaii hian a sawi.


Juda Sakhua Nen Hian ? : Israel thlah nih vangin Juda sakhua-ah inleh kher tur a ni em tia Lelte-in Pi Zaii a zawh chuan, hei hi chu hnam thil a ni a, sakhua a tel lo, Israel Hnam bo zinga pakhat Manese thlah a min chhui luh avangin Juda sakhua a kan in leh kher a ngai lo tih a sawi a, Israela Mizo eng emaw zah pem lutte erawh chu sakhaw thil a nih thu Pi Zaii hian a swi thung. Tun hnai-ah Israel Sawrkar chuan Mizo-Israel Juda sakhua vuantute tan chuah Israel rama pem luh phalna mi 7000 chuang hnenah seat a hawng leh tih pawh Pi Zaii hian Lelte a hrilh.


Hnam Bo Nih Fiahna : Pi Zaithanchhungi chuan Juda ho Pathian biak dawna an puan khum thin, an tawngtai puan ‘Sit Sit’ chu Mizo nau puakpuan nen inchen chiah a nih thu sawiin, Mizoram-a Isarel hnam lo zinte pawhin a inan thu leh mak an tih thu an sawi a, an ramah te an hawn thla a, thlate an lakpui a ni a ti. Hei lo pawh hi thil tam tak Israel hnam leh Mizo ten tunhma atanga inan-na kan lo neih tawhte chu sawi teuh a ni a, thlan laih leh mitthi sawngbawl dan thuah thlana kal ten mitthi ina kut an sil hma loh chuan an mahni in an thleng hmasa ngailo va, hetiang chiah hian Israel ho pawhin an lo tih dan a ni tih a sawi.


Tlangkawmna: ‘Mizo-te hi Israel hnam bo kan ni em ?’ tih thuah hian ngaihdan zau tak, sakhaw tan biknei lova ngaihtuah a ngai niin a lang a, keinin ‘kan ni e’ kan zuk tih aiin, an nin ‘in ni e’ min rawn tih siah hian eng emaw zawng Mizo te hian zir tur kan nei chiang a ni. Chuvangin kan mithiamte he lamah hian hawi zau se, a hmunah te kalin, zau zawka inchhui bingna te pawh hi han nei leh zual ta ila. Israel hnam Mizoram lo zin reng rengte hian Mizoram chhungah hian an ngam salh hlawm a, nuam an tiin, an ni chuan unau angin min en nghal a nih thu Pi Zaii hian a sawi a, heta tang ringawt pawh hian ngaihtuahna kan siam thiam a ngai e.


Source: Lelte.net

Shomron mi te chanchin

Posted by Moshe Ilan on May 2, 2017 at 4:45 AM Comments comments (0)

Aigupta ram Lal Yosefa fa Menashe leh Efraim hnam nia inchhal leh hnam bo ve lo inti te Shomronim ho te chanchin..


Shomronim te hi hmanlai atanga Sakhaw hnam chikhat an mahni insawi dana Israel thlah kal zel te an ni a, heng hnam te hi Israel ramah chauh awmin har Grizim leh Kholon khua ah an awm deuh ber a. Tawng chi hran neiin Ivrit nen a inzul hle a, tin, an nun dan leh zia hi an Torah ami ang zulin ani a, hei hi Juda te Torah hmanlai nen hian a in ang khat hle a, a ziak pawh hmanlai Juda te hawrawp chikhat hmanga ziak niin a chhung thu erawh tlem tlem a danglam a ni. History ah an ni Shomronim te leh Benei Israel te inkarah Sakhua na lam thu ah ngaihdan inan lohna a lo awm fo tawh thin a ni. Tin History ah heng hnam te hian Bizantim (Byzantines) te leh Tsalbanim (Crusaders) te lakah tihduhdahna leh suatna an lo tawng fo tawh bawk a. Kum AD zabi 4 na lai vel an hruaitupa Baba Rava hova an vanglai chuan heng hnam te hi Maktaduai aia tam mah an lo ni thin a, amaherawhchu, tihduhdahna hrang hrang an tawh hnu kum AD zabi 20 na tantirh lai vel erawh kha chuan mi 150 vel awrh chauh an ni tawh a ni.


An lo chawrchhuahna chungchang thu leh an sakhuana kalpui dan ah hian tunlaia Juda te kal dan phung nen thil tam takah inang lo a awm nual tawh a.


An mahni insawi dan chuan, an mahni te hi Israel hnam dik tak pawlh dal loh leh a ziktluak a kal chho zel niin an insawi a, an mahni te leh Israel dang te nena an lo hran tak nachhan hi "Makom Hanivkhar" Beit Hamikdash hmun thianghlim sak na chhungchanga ngaihdan inanlohna a awm tak avanga inthenhrang ta kan ni an ti a, an sawi dan chuan Moshe Rabeinu chuan hemi hmun tur atan hian Grizim tlang a ruat a, chumi anih avangin Yehoshua khan he tlang ah hian Mishkan (Biakbuk) chu a lo sa tawh a, chu chu "Givot Olam" tiin an ko va, tichuan, chutah chuan puithiam lal (Kohen Gadol) hna chelhin Pinkhasa, Eliezera fapa chumi chu Aharona fapa niin a thlah te zelin an lo chelh tawh thin a ni. He Grizim tlanga Mishkan sak leh awm thu hi Israel hnam pum te chuan hriain an pawm bawk a ni. Tin heng Kohen Gadol an tih Pinkhasa thla te ho hi Divrei Hayamim (Chronicles I bung 5 chang 28 a inziak angin "Levia fapa te chu Gershon, Kehat leh Merari te an ni a, tin, Kehat fate chu Amram, Itshar, leh Khevron leh Uziel te an ni a, Tin, Amram fate chu Aharon, Moshe leh Miriam te an ni a, tin, Aharon fate chu Nadav leh Avihu, Eliezer leh Itamar te an ni a, Eliezer chuan Pinkhas a hring a, Pinkhas chuan Avishua a hring a, tin Avishua chuan Buki a hring a, tin, Buki chuan Uzi a hring bawk a ni" tiin.


Heng inthlahchhawng tea Avishua kan hmuh ang hian tuna an Sefer Torah neih hi "Avishua Lehkhabu" tiin an ko kher a ni. Pinkhasa leh a fate thlan awmna "Givot Pinkhas" hi tunah chuan Arab khua Avrata ah a awm a, hemi hmun hi Shomronim ho te hian hmun thianghlim ah an nei a ni. Hetia Grizim tlanga Mishkan awm lai hun kha Shomronim te hian "Rakhuta" tiin an k ova , chu chu Yemei ratson (Pthian inhawn lai) tihna a ni.


An sawi danin heng Pinkhasa thlah kal zel zinga Uzi Hakohen hunlai hian Itamara thlah ami Eli Hakohen nen an inkarah intihthiamlohna a lo chhuak ta a, chuvangin Eli Hakohen hi inla hrang tain Shilo hmun ah Mishkan a lo siam ve ta a , Tichuan, Israel hman tam zawk te chuan Eli Hakohen hnung chu zuiin Israel hnam te zingah intihhranna a lo chhuak ta a, thupuia hmangin "Har Grizim hi P-thian hmun thlan ani lo" an ti a ni.


Tichuan, Uzi Hakohen hun tawp lam ah hian "Pnuta" (Hastarat Panim) hun a lo thleng ta a , chumi awmzia chu P-thian in Israel te lakah a hmel a khuhbo ta tihna a ni. Hei hi a chhanchu a hmun thianghlim Har Grizim chu Israel faten an hnawl tak avang ani an ti a, tichuan, an mahni (Shomronim) Yosefa fate Menashe leh Efraim hnam te leh Levi hnam an zinga cheng ve te chauh chuan Israel te kaldan Masoret dik tak chu vawng chhunzawm tain vawnghimtu "Shmerim" tiin an inko ta a, hei hi Moshe-a Torah dik tak vawnghim tu kan nih vang ani an ti a ni.


Tichuan, tunlai ah hian heng Shomronim te hian Israel hnam , an zinga tel ve Levi hnam tlem te te leh Menashe leh Efraim thlah te kum BC 722 na laia Ashur lalin Israel hnam sawm te ram pawna a hruai chhuah laia a hruai chhuah ve lohte kha kan ni an ti a, tichuan tunlai thleng hian Cohen Gadol te neiin an kaldan phung hian an la kal zel thin a, Pesakh (Kalhlen kut) lai te pawhin inthawina te an la nei mup mup thin a ni.

 

Tanakh (Bible) lam thlir na atang ve thungin, Lalte II bung 17 na chang 24 a kan hmuh angin, " Ashur lal chuan Bavel atang te, Kuta atang te, Ava atang te, Khamat atang te, Sfarvaim atang tein mi te a la khawm a, tichuan, Shomron ram khua ah te Israel fate hmun ah chuan a chentir a, tichuan, Shomron ram chu luah in an awm ta a ni" tih kan hmu a.


Tichuan, Ashurit lalram chuan hetiang hian Haglaia (Hruai chhuahna) dan policy hmangin a ram awpna hmun a piang te chu a ti thin a, hei hi hun lola kal zel a nakina an mahni ram avanga helna an la rawn chawh chhuah palh lohna tura a policy hman a ni. Chutiang tak chuan Israel lalram Shomron ami te chu Sankheriv chuan Ashur ah hruai chhuak a dahin, tin, Shomron hmun ah chuan Asarkhadon (Sankheriv fapa a hnua lal) chuan ram dang hnam dang mi Kutim hote leh hnam dang mite chu a dah thung a ni.


Eng tiangin nge heng Jentel hnam hote hian Israel te rinna chu an lo tawmpui ve tak mai le? Kan tih chuan, (Lalte II 17;25) khang hunlai khan heng hnam te hi Sakeibaknei in a seh palh fo mai ani awm a, tichuan, chu chu insawithaihin "Mishpat Elokei Haarets" he ram Pthian dan hi kan hriat loh vang leh kan zawm loh avang ani ang, an ti a, chu chu Ashur lal chuan hmang tangkaiin puih a duh ta a, tichuan, Ashur rama Israel lalram a hruai te zinga Kohen pakhat chu an hnen ah hian tirin Israel te dan chu a va zir tir ta a, tichuan, heta tang hian Torat Israel (Israel te Torah) chu an lo pawm tan ta a, tichuan Israel hnama in Giur in Sakeibaknei (Araiot) hlauhna avanga in Giur an nih avangin "Gerei Araiot" tia koh an nita a ni.


Temple pahnihna hunlaia Historion Yosef Ben Matitiahu (Yosefus Palebius) chuan heng Shomronim ho te chanchin hi a lo ziak a, hetiangin, "Antiokus chuan indona hmachhawnin Syria ram te chu a do va, tichuan, Shkhem ram te chu rawn la zel in, a khandaih hmang chuan Grizim tlang te chu beiin chumi hmuna Jerusalem khuaa Mikdash (Temple) anga siam Shomron mite Mikdash kianga awm Kutim ho te chu a rawn tlawm bawk a", tiin.


Yosef Ben Matitiahu chuan Temple pahnihna hunlaia heng Shomronim mite mizia hi hetiang hian a khaikhawm nan sawiin "An khawpui Grizim tlang bula awm Shkhem hmuna Shomron mite chuan Alexander an Juda te hnen ah Kavod (zahna) pein tha taka a tih thu an hmuh in hetih hunlai hian heng Shomronim te hi an inti Juda hle a, amaherawhchu, Juda te laka harsatna a thlen chang erawh chuan Juda an nih nasa taka pha leh siin an inti Shomronim leh em em thin si a, tin, Juda te laka thatna a thlen chang erawh chuan Israel hnam sawm leh pahnih zinga Menashe leh Efraim thlah te kha kan ni an inti leh duam duam thin si a ni…" tiin.



Chhunzawm zel tur...


JERUSALEM TIH HMING CERTIFICATE A INZIAHNA HLUI BER CHU HMUHCHHUAH A NI

Posted by Moshe Ilan on October 26, 2016 at 8:05 PM Comments comments (0)

Bible ah ni lo Jerusalem tih hming inziak chuanna hriat theih chinah chuan a hlui ber a ni. Hei hi vawiin (26.10.2016) lam ah khawvel tangrual pawl UNESCO chuan "Jerusalem leh Juda ten inkungkaihna an nei lo" tih thu an ban phar thluk ni ah chiah tlang zarh ani ve a ni.


 

He thil hi Papyrus phek a rawng duma kutziak ani a, Papyrus hi hnim chi khat (Guma) atanga paper an siam a ni a, hetiang hi hmanlai Egypt te khan an lo siam thiam tawh a, tichuan, an hunlai Technology ah chuan lar leh hlu tak ani ve a ni.


 

He lehkha phek hlui leh chhe tawh tak hek bang ah hian hmanlai Hebrew kutziak hawrawp tlar hnih tha taka inziak a awm a, chu chu Judea thlaler hmun khawimaw lai a puk pakhat chhunga thil hlui suamhmang te hmuhchhuah niin, an ni hian a rukin an zuar a, chu chu Israel Antiquities Authority ten an lo hriatin spy tirin lei duh ni awm takin an insawi a, tichuan, an man chhuak thei ta a ni.


 

He lehkha hi Carbon 14 hmanga an exam naah kum zabi 7 BC  chawhnu lam lai vela mi niin an hria a, chu chu Israel ram ah Israel lalram awm tawh loh lai, Temple 1na hunlai, Juda lalram chuah awm lai hun niin, Menashe-a emaw, Amon-a emaw, Yoshiahu lal lai hun vel kha a ni.


 

He lehkha ah hian "Miamat. Hamelekh. Minaarta. Navlaim. Yain. Yerushalema." tih a inziak a, chu chu a mizo tawng tak chuan (Lal chhiahhlawh nu, Naarta khua atangin, Wine tha mi bur hnih, Jerusalem a mi tur) tih a ni. Hei hi Lal hnena Original Certificate lehkha thawn them a ni a. Kha tih hunlaia Juda lalram Capital City Lal awmna hmun Kudam a thleng tura chhiah an khawn leh Lal tan bika Wine bur hnih an thawn tel na thu niin, a thawn chhuahna hmun hming Naarta hi Efraim ram a awm a ni a, tin, a thawn tu hi hmeichhia niin, heti lai hmun awptu nia rin niin, milian leh thil ti thei tak ani ngei ang. Tin, Lal Chhiahhlawh tih hi, an hunlai chuan Lal Minister te reng reng kha Lal chhiahhlawh tih an ni a ni.


 

He thil hi mithiam te rin dan ah chuan, He lehkha hian Jerusalem thleng ta lova Judea thlaler puk chhung daih a an hmuh chhuah nachhan hi, khatia Lal hnena thleng tur a ro sum tam tak phura kal chu Suamhmang ten lo lambunin an thil phurh chu an lo lak sak ta ang a, tichuan, puk chhung hi thleng ta ni ah an ring a ni.


 

A tawi zawngin, hmanlai suamhmang te leh tunlai suamhmang te zar ah, Juda ten an khawpui, an Lal khawpui, an P-thian chenna Temple awmna hmun chhe ta ngaia kum 2000 chuang an lo tah pui vawng vawng tawh chu Khawvel ram tangrual ten suah sual rawngbawlin sawi bo sak leh hnawl sak tumin IN KUNGKAIHNA AN NEI LO vawiin ah ti mahse, an ni suamhmang misualte thatna a zarah INKUNGKAIHNA Juda ten an neih zia a takin hailan a lo ni leh ta a ni.


A pic en duh tan


I HNAM NIHNA AH I CHIANG EM

Posted by Moshe Ilan on April 25, 2016 at 9:10 PM Comments comments (0)

I HNAM NIHNA AH I CHIANG EM?


 

 

Khawvel ah hian hnam tin chi tin kan awm a, tawng pawh chi hrang hrang kan neih mai bak ah kan tawng dan chi pawh chi hrang tam tak a awm a ni.


 

Entirnan, hnam thenkhat ho te chuan tawng thumal an ngah vak lo va, thumal khat theuh theuh a ki emaw a thluk emaw an tih san hran deuh emawin a awmzia a danglam thei a, tin hnam thenkhat te erawh chuan thil awmze hran sawi nan tawng thumal hran thliah an nei hlawm bawk a ni.


 

Tun tum ah chuan hnam tih thumal leh a awmzia tlem a zawng sawi kan tum ang a, Lusei tawng a hnam kan tih hian eng nge a kawh a, eng chin nge a huam tih hi kan zir chian a ngai hlein ka hria.


Hnam han tih hian thil hran hran kawh leh huam zau deuh anei a, chung te chu a thliar hran dan kan hriat hran leh si loh chuan kan buaina khua a tisei thei hle dawn a ni.


 

Sawi tur tam tak awm mahse, Article a sei lutuk loh nan hnam tia kan sawi thin chi thum te chungchang sawi kan tum ang a, chung te chu, Hnam (Am / Nation), Hnam (Shevet / Tribe), Hnam hming (Shem Mishpakha / Surname) te hi an ni ang a.


 

 

AM (NATION)

 

Bible a in Giur na thu kan hmuh lar tak mai "Nangmah phatsan a kir san leh tur chein Ka thinlung min tina lui suh, I kalna apiang ah ka kala ng a, I riahna a piang ah ka riak ang a, I hnam chu ka hnam ani ang a, I P-thian chu ka P-thian a ni ang", tia Ruthi tawngkam a, Hnam tih a sawi hi hei ngei mai hi AM (Hnam) chu niin, hei hian Juda hnam nih a sawina aniin, he hnam ah hian Juda nunphung, culture leh P-thian biak dan a awm kim a ni.


 

Chuvangin, Juda nihna Judaism a in Giur a Luanglut tur te chuan he Am Yehudi nihna ah hian an in Giur thin in, hei lo P-thian hnam thlan ni tura in Giur na a awm lo a ni.


A hmasa berah Hebrew a "Am" kan tih hi sawi fiah kan tum phawtang a, hei hi hnam tia sawina thumal hman ah chuan a lian berin a fun kim ber awm e, Am tih chhung ah hian chi tin ze tin chhungkaw tin leh community hrang hrang te an lengin hetiang Am (Hnam) pakhat chhung ah hian an vaiin an tel vek thei a ni. Ram khat chhunga mi chengte sawi khawm nan te, Sakhaw khat vuan tlang sawi khawm nan te, ram hrang hrang Lal pakhat awp khawm naa mipui te sawi nan te a hman theih a ni.


 

Israel te pawh Avarahama hunlai chuan Am an ni ngai lo va, amaherawhchu, Mitsraim (Aigupta) rama an awm lai an rawn pun tak thur thur ah chuan Aigupta mite chuan Hnam (Khabaru / Hebrai) tiin an rawn ko ta mai a ni.


Chutah Israel te chu Aigupta atangin chhuakin an inlak hran hnu ah chuan "Israel-a fa te" (Benei Israel) tia koh an ni leh ta a, hetah hian Shvatim (Hnam) hrang hrang tea inkulh hrang zelin hmun khat ah Shvatim 12 te chu an awm ta zel a, Chutah Kanan ram a an rawn luh hnuin a chhunga hnam hote chu an rawn hnehlak vek hnu ah Kanan ram chu Israel ram tia koh alo ni ta a, Lal te an siam ta a, a tirah Shaul-a Lal in, a hnu ah David-a a Lal leh a, a hnu leh ah Shlomo-a a Lal leh a. An ni pathum te hi Israel hnam pum a Lal te an niin "Malkhei Am Israel" tih an ni a ni.


 

Tichuan, Shlomo-a fapa Rekhovam-a Lal tirh veleh hian Juda hnam leh Binyamin hnam nilo Israel hnam dang zawng te chu inla hrang tain Lal hran an siam ta a, tichuan, lal ram chu chi hnih in a lo piang ta a, Israel Lalram ni thin kha "Juda Lalram" (Mamlehkhet Yehuda) tih alo nita a, tin, Lalram thar rawn piang thar chu "Israel Lalram" (Mamlekhet Israel) tih alo ni ta a ni.


 

Tichuan, hun alo kal zel a, Israel Lalram ami mi cheng te chu Israel hnam mi (Israeli) tia koh an niin, Juda Lalram a cheng te pawh chu Juda hnam mi (Yehudai) tia koh an ni ta a ni. Amaherawhchu, heta Israel hnam kan sawi leh Juda hnam kan sawi hi (Shevet ni lovin 'Am' = Hnam) sawina kha a ni.


 

He Lalram pahnih te hi a tirah P-thian rawngbawl na hmun khat vuan ve ve a inthen nisi te kha Politics avangin Israel hnam lam ho Lal te chuan Moshe Rabeinu zirtirna dan chu zawi zawia hlat hret hretin milem biakna ah an tluk san ta a ni.


 

Hnam thlan leh Hnam te laka tihhran kan nih angin, Khawvel hnam dang te ang lo takin Judaism ah chuan Hnam (Am) nihna leh Sakhuana hi inbelhbawm tlat a ni a, an hunlai pawh khan Juda lalram hnam te leh Israel lalram hnam te chu khawvel hnam dangte mit hmuh ah thuhmun angin lang mah se la, an mahni leh mahni inkar ah chuan hrang tak niin Juda hote (Yehudim) chuan Israel te thil siam pawh an ei thiang lo a, an wine khawih hnu pawh an in thiang lo a ni.


 

Galut rampawna an awm lai Purim thawnthu ah pawh Binyamin hnam mi Mordechai-a chu "Ish Yehudi" (Juda mi) tia koh ani a, hei hi Hamana hmaa a kun duh loh avanga huai taka Mitsvah a zawm ngamna (Milem leh Mihring hmaa kun ngai lo) avanga Israel mi (an hunlai chuan Israel mi tih chu milem be mi tihna ang tluk) ti lova Juda mi tih hlawh ngat ani a ni.


Tichuan, Israel hnam hote Galut rampawna hnawh darh an nih hnu ah Juda Lalram chu la ding zelin a ram chhunga hnam (Shvatim) hrang hrang awm te chu Yehudim (Juda hnam mi) tih an ni ta vek a, tichuan, Mamlekhet Yehuda chu a hnu khar tu leh nakina kan nghah mashiakh pawh Juda Lal ala nih dawn avangin Am Yehudi (Juda hnam) niha chu tun thleng pawh hian kan la chhunzawm ta zel a ni.


 

Tin, an hunlai khan tunlai ang lo hian Sakhua na hian hming hran a nei ve lem lo a, Pathian biak dan tih ani mai a, chumi Pathian biak dan, chumi khami Pathian chu tih a ni thin a, (Sawi zau duah rih lo mai I la).


 

Hun alo kal zel a, khawvel ah mi chi hrang hrang ten Sakhuana thar an rawn din chhuak ta zel a, tichuan, khawvel mil ang chuan Juda hnam ah pawh chuan hriat hranna rawn siam chhuah angai ta a, amaherawhchu, Siam chawp sakhua ni lovin, Avrahama'n a zawn chhuah P-thian ngei chuan Thlaler ah a (Avrahama) thlahte hnen ah zawm tur dan thu a rawn pek ang chuan Juda hnam te chu an nung ta a, tichuan, chumi mila an nitin nun ze hman chu Sakhuana ang deuha sawi ta in chu chu Yehadut (Judaism) tih alo ni ta a, hei hi anihna tak ah chuan Sakhua na ani lo va, Juda hnam nihna ti chiang / nemnghet tu ani zawk a ni. (entirnan; Sofer mitasek basifrut, Oman mitasek baomanut, Yehudi mitasek bayehadut…;)


 

Tunlai thleng pawh hian Juda mi dik tak Israel ram khua leh tui ni bawk chu Yehudi (Juda mi) tih an ni a, amaherawhchu, Israel ram khua leh tui nihna nei ve tho sakhaw hran vuan hnam dang ho te chu Israeli (Israel mi) ti chuahin an ko thin a ni.


 

SHEVET (TRIBE)

 

Shevet hi pawl hung khat sawina ani ber a, tunlai ah pawh school ah emaw, thalai pawl din ah te a chhunga peng zar pawl sawi nan te pawh an la hmang. (Entir nan Benei Akiva ah te pawh chumi veng ah chuan Shvatim 4 awmin Snif (Branch) khat an siam a ni).


 

Amaherawhchu, a lo chhuahna bul ber chu hmanlai pawl thuang khat emaw, chhung khat emaw, tih dan ze phung khat nei ho emaw koh leh sawi nan an hmang thin a, chutiang ang chuan Israel te zing ah pawh Jakob-a fapa te zing atangin Shvatim (Hnam) hrang hrang an lo chhuak a, chutiang zing ah chuan keini pawh hi Shevet Menashe (Menashe hnam) kan lo ni ta a ni.


He hnam sawina (Shevet) ang ah hian Mizo te zing ah pawh hnam hrang hrang a awm ve a, hetiangin; Tochhawng, Vanchhawng, Pachuau, Chhakchhuak leh a dang dang te..


 

Amaherawhchu, Mizoram pum mipui te pawh hi India ram citizen nihna ah chuan Nation (Am) tih tur ni awm tak ni mahse, Official a chutianga dah ala ni lo a, Tribe (Shevet) tia koh an ni a ni. Hei hi a rampum huapa Lal pakhat lalna hnuaia rampum ala awm loh vang nge, hmanlai Lal te ho kha King (Ram Lal) nihna title nei an awm lo a, Chief (Hnam Lal) chauh an nih hlawm anih vang pawh ani maithei a ni.


 

 

SHEM MISHPAKHA (SURNAME)

 

Hei hi hnam hming tiin kan sawi liam mai thin a, hnam hming ni lovin Chhungkaw hming tihna ani a, hnam hming ani tur ani tia ngai tlat an awm thin a, ram dang a an awm hun in an buai phah thin. Mizoram chhung ah chuan hei vang hian buaina kan tawng ngai lem lo vang, amaherawhchu, khawvel ram dang zawng ah chuan chhung tin hian chhungkaw hming neih theuh tur ani a, chu an chhungkaw hming chu an mahni hming bik (Private name) khan a zawm tur a ni a, chu chu an identity card hrang hrang ah chutiang chuan a chuang tur a ni. Hei hi hming inhriat pawlh emaw lohna tur atana tih ani deuh ber awm e.


Mizoram ah pawh chhungkaw thenkhat chuan hei hi thil hran anih zia an hrethiam ve tan nual tawh a, chhungkaw awmthei deuh te chuan an pa (pasal) te hming chu an chhungkaw hming ah an hmang ve mai thin a, hetiangin; Lal Riliani Hawla… ti te in.


 

Mizoram ah chuan mizo te chuan an chhungkaw hming (Surname) atan hian an hnam hming (Tribe) kha an hmang ta thin a, chuvangin, chhungkaw hming tih pawh hi Mizoram chhung ah chuan a awmzia hria an tam viau lo maithei a ni. Mahni Hming leh hnam hming an ziak kawp ta thin a, chu chu an tihdan phung anih avangin keini Benei Menashe te zing ah pawh chutiang anga hnam hming la pu zui chu an awm nual bawk.


Hei hi theih ni tho mahse kan awmna ram tawng leh leili azir hian kan bona rama kan hnam hming thin tih dalna a ngai an awm nual bawk. A chhan chu, naupang te deuh chhuan khat na leh chhuan hnihna pang atang pawhin lam hlei thei lo leh ziak hlei thei lo an tam ta hle a, hetiangin; Pachuau – Patsau tia lam leh ziak, Kawlni – Kolani tia lam leh ziak, Chhakchhuak – Tsaktsuk tia lam leh ziak, Lhungdim – Lungadim tia lam leh ziak, Hmar – Hamar tia ziak leh lam te leh a dang tam tak sawi tur a awm nual ta mai a, kan duh emaw duh lo emaw, chhuan khatna atang pang pawha mizo hnam hming an lam dik lo ta anih chuan chhuan thumna leh li na vel atang chuan loh theih lohvin a ki a mak tawh viau dawn a ni, tin thil lo awm tawh te a zira hetianga hming dangdai put vanga nakina kan naute la inkiltawih theihna leh enhran an la tawh theih palhna lak ah hnam hming kher ni lova chhungkaw hming siam thar hi a tih chi zawk ang em? Tih chu zawhna awm thei tak a ni.


 

Hetah hian chhungkaw hming ah chuan Tawng thianghlim ngei mai, Lalpa P-thian in a Zawlnei te a biakna tawng hmang emaw, Israel fa ten Aigupta rama an sal tanna hmun ah pawh Hebrai tawng ngei maia an hming inphuah luih tlat avanga Lalpa P-thian in a chhanchhuahna chhan tawng ang khera phuah chu thil tha leh duhawm ni mahse, tawng dang Mizo tawng pawhin a phuah thian tho va, (entirnan; Zoram, Vohbik, Mawi…etc'), amaherawhchu, Lam leh ziah theih ngei nise a tha viau awm e, tih thu mai ani in, Shem Mishpakha hi Hnam hming ani lo va, Mahni chhungkaw hming bik sawina mai a ni.


 

Hmanlai pi leh pu te khan chhungkaw hming an nei ngai lem lo va, amaherawhchu, hriat hran an nih theihna tur erawh chuan pate hming an sawi tel thin a ni, hetiangin; Rabi Shimon Bar Yokhai (Yokhai-a fapa Rabi Shimon-a) ti te in.


Tin, Juda ho te pawh chuan hnawhdarh an nihna ram ah ram dang mite angin, chhungkaw hming te chu an rawn pu tan ve ta a, a then chuan an pa an pu te hming ang te hetiangin; Avraham, David, etc'.. . A then chuan an hnathawhna hming ang te, hetiangin; Zaltsman (chi khur a thawk), Goldman (Rangkachak chher naa thawk)… A then te chu an nihna ang zia a zira phuah te, hetiangin; Saadia (mi rethei te chaw pe thin), tin an awmna hmun a zir tein hetiangin; Mizrakhi (Middle east a cheng te), Tsarfati (French ram mi) etc'…


 

Tin, Juda mi thenkhat a bikin Cohen mi te, Levi hnam te leh Menashe hnam te hian an hnam (Tribe / Shevet) hming ang hi Surname atan an pu nual bawk.


 

Eng le khaw le Mizo tawng hi a thumal a tlem em avang hian hetiang hnam sawina hrang hrang te hian awmze hrang nei vek hlawm mahse HNAM tia thumal pakhat a kan bur bun vek avang hian kan buaiin kan hnam nihna ah chiang ta lo fe fe kan awm ta nual niin a lang a, Juda hnam nihna te (Am hayehudi), Menashe hnam nihna te (Shevet Menashe), Mizo hnam nihna te hi thil hran leh awmze hran nei vek an ni tih hi hriat a thain a finthlak hle a ni.


 

Tichuan, keini chu rampawn ah hnawhdarha hruai chhuah kan niin, kan nihna pawh hre tawh lovin kum sang hnih chuang mi ram ah vak vaiin kan lo khawsa ve tawh thin a, kan bona ram ah chuan tu hnam te pawhin eng tiang pawhin an duh duh danin min lo kovin, min lo ruat pawh ni mahse, tun ah chuan kan bo hmaa kan awmna ram kan pi leh pu te hnena Lalpa P-thian in a lo pek ngei mai ram ah inhre chhuakin kan kir leh tawh a, bo kan ni tawh lo va, kan bona rama kan buaina ah khan buai buai a tul tawh lo va, kan hnam nihna Menashe hnam (Shevet Menashe) kan nih kan inhre chhuak tawh a, kan hnam nihna Juda hnam (Am Hayehudi) ah Safek (rinhlehna) zawng zawng laka fihlim nan in Giur in, Hnam hming (Shem Mishpakha) thar te pu in thlamuang takin Khawvel pum a rorel tu tur Juda te Lal Mashiakh chu nghak diai diaiin i leng za zawk ang u.


 

 

*Sikum (Khaikhawmna):


 

~ Yehudi = Am Yehudi, Juda hnam P-thian thupek zul zui Torah dana nung tih na, (miin Shevet Yehuda a tih kher loh chuan AM/Nation sawina ani tih hriat tur).


 

~ Menashe hnam = Shevet Menashe, kan inhriatchhuah hnu leh kan bo hmaa kan hnam.


 

~ Mizo Hnam – Kan bo lai leh kan bona ram hmuna hnam hrang hrang te sawi khawmna hnam hming.


 

~ Sailo, Ralte etc'.. = kan bo laia kan hnam hming ho te.


 

~ Mishpakhat Menashe, Ilan, David, Sela, Rei, etc'.. = Juda hnam kan nih kan in hriatchhuah hnua kan chhungkaw hming thar.

---------

 

 

* Tisha Beav zana Juda te Beit Kneset chhunga Kinot bu chhiara an lo tap a hmuhin Nepoleon-a chuan "Hetianga mahni hnam nunphung culture ngaisang a, hre reng a, kum sang hnih hnu ah pawh la tahpui thei hnam chu hnam fing niin in zung bul in culture anga nung leh turin in la ding chhuak ngei ang" alo tih ang in, tun ah bo nihna ata kan inhre chhuak tawh a, kan nun phung leh hnam nihna dik tak kan Culture chu Juda Hnam (Am Hayehudi) kan nihna chu ani a ni. Ka lawm e..

CHERAW KAN LEH BENEI MENASHE

Posted by hakhokhma on April 15, 2016 at 10:55 AM Comments comments (0)

Kum tam tak bova Jentel mi rama lo awm tawh kan ni a kan bona ram ah chuan chung hnam dang te tih dan ang bawk chuan tihdan phung eng eng emaw chher chhuak vein hnam tihdan phung Culture atana lakluh pawh tam tak kan nei ve a ni.


 

Chutianga kan zung pui kan Shoresh theihnghilh a kan bona ram ah chuan P-thian in Moshe-a hnena Israel hnam te tana dan leh dun a thupek te pawh chu hre zui lem ta lo na na na chu Halakha leh Mitsvah lam nen a inmil leh mil loh lam pawh thluk theih ni ta hek lo bo kan ni a, kan hnam (Israel) dan kan hloh tawh avang chuan khatih laia kan chheh vela hnam dang te tihdan ang chuan Culture te pawh chu kan bona rama kan pi leh pu te chuan an lo phuah chhuak ve ta nawk nawk a ni.


 

Thil tam tak sawi zui leh sawi zau tur awm thluah mahse, tuntum atan chuan bona rama kan lo neih hnam lam anga kan lo neih CHERAW KAN hi han thlur bing ta ila. A hmasain hetiang ang Cheraw kan ang hi Bamboo dance tia hriat larin Asia rama hnam tin mai hian an mahni tihdan phungin an nei ve vek hlawm a ni.


 

Israel hnam bo kan nih kan inhriatchhuah ram pawna kan awm lai atang khan theihpa tawp chhuahin thangkhat lian chuang kum tam tak kan theih ang tawkin P-thian thuthlung hi kan hriat ang angin kan lo vahvaih pui tawh a, tichuan, a tawpa tawp ah kan chhehvela mite hmuhsitna tinreng kan paltlang hnu ah Lalpa P-thian kut chak tak hmangin a ram thianghlim ah ngei mai chuan bo ni tawh lo tur leh a duh dan anga a thupek te mila nun phung hmang chho ve tawh tura hruaikir leh tan kan ni ta a ni.


 

Tichuan, kum 2012 bawr vel atang khan Israel ramah Cheraw kan leh kan unau Manipur te lam pawhin an hnam lam ang chi chu mipui hmaa show a pho langin kan lo ualau pui tan ta a ni.


 

A hma zawng pawh khan tih tumna leh rawtna a awm fo tawh thin a, amaherawhchu, kil tin atanga zawhna eng eng emaw thawh khawm a nih hnu ah ti ngam lova pamtul pui thin ani a, hei hi eng vang nge? kan tih chuan, bo kan ni tawh lova, hei hi Judaism dan Halakha in a Metir (Phal) em? tih chung chang ah Siman Sheela (Zawhna chhinchhiahna) daha pamtul pui thin ani a ni.


 

Hetiang zawhna rawn irhchhuah na chhan hi Cheraw kan leh Manipur lam ah hian Hmeichhia te an lam thin avang ani ber a, a entu tur mipui te chu hmeichhe hlang an ni bawk si lova, tin, heng lam ah hian Hmeichhe hlang a lam ani bawk si lo va, tichuan, Halakha lamah chuan mipui hma emaw, Meorav (a inpawlh) a mipa te nena lam chu Asur (Thiang lo) alo nih tak si avang chuan, hnam lam ti mah ila Juda dan kalh a han puitlin pui em chu kan ngam lo thin ani ber a, chuvanga tih leh tak loh thin a ni.


 

Kum 2009 khan Kiriat Arba mipui te chuan Rav hnenah zawhna an lo thlen tawh a, tichuan, Rav chuan a chanchin zir chian nan leh ama zirna Rav lian te hnena zawhna hun leh zir chian nan hun amamawh thu sawiin a zirchian hnu ah mipui te ko khawm in hemi Cheraw kan chungchanga thutlukna a siam khawm te chu hrilhin Shiur puina alo nei tawh a. Tichuan mipui te chuan ui tak chung leh P-thian dan kalh anih si avang chuan rilru dam takin an lo hrethiam ta em em a ni.


 

Tichuan, kum a vei zel a, kum 2012 vel atang khan function hrang hrang ah Cheraw kan leh manipur lam (hei hi a hming ka hre chiah lo) chu show fo ani ta a ni.


 

Hemi chungchang ah hian kum 2015 khan kan hnam Rav pakkhat chu heti hian ka zawt a "Rav Cheraw kan leh Manipur lam hi Halakha dan ah thiang ani em?" tiin. A ni chuan, "Halakha dana min zawt anih chuan tunge thiang tia sawi ngam ang?" tiin min chhang a, tun hnua an show tak fo chungchang thu ah eng eng emaw kan sawi zui nual bawk.


 

Tichuan, ni 23/3/2016 khan Bar-Ilan University ah Benei Menashe te chungchang thu sawia Kenes (in hmuhkhawmna) neih ani a, hemi tuma Show tur atan hian Natsrat lam unau te chu Cheraw kan tura Shavei hruai tu te hnen atanga sawm an ni a, tin, Manipur lam unau te pawh an lam rawn show tura sawm an ni bawk a ni.


 

Amaherawhchu, an awmna khaw Rav ten an thil show tur chu an lo hriatin an mahni chunga mawhphur tu Beit Din Rav hnen ah zawhna thlenin hetianga an lam hi thiang ani em, tiin an zawt a, ani chuan a lo hriat veleh mak ati kher mai a, tichuan, lam tura sawm tu Shavei lam hruaitu te hnenah chuan chawp leh chilha sut nghal turin thu a pe a, tichuan, an ni pawh chuan lam tur te hnenah chuan sut leh anih thu an hriattir nghal ta bawk a ni. Tichuan, he Kenes ah hian Manipur mipa zaipawl ho chauh an zai ta a ni.


 

Kan hriat theuh angiin Aliya dang ang lo takin Natsrat khaw ho chu Aliya leh zel te tana Dugma (entirna) ni tura duan an ni a, chuvangin a bika enkawlna pawh neih pui niin, Beit Din Rav lian hialin an mahni chungah mawhphurhna lain tihtak zetin a enkawl a, an fakawmin a enkawl tute pawh an fak awm em em a ni.


 

Heng hi Cheraw kan chungchanga Judaism dan nena a inmil leh mil loh chungchang thu vela zawhna leh thil hrang hrang lo awm tawh ani hlawm a, a thutlukna chu mipui te theuh chhia leh tha hriatna ah innghat teh se.

Jerusalem ah Greek ho kulh bang hmuhchhuah a ni

Posted by Moshe Ilan on November 4, 2015 at 4:20 PM Comments comments (0)

Khashmonai lehkhabu pakhatna bung 1;30-39 a kan hmuh ang leh Historion Yosef (Josefus) Ben Matityahu ziak atanga kan hmuh angin kum 167 BC hun lai in Jerusalem hmar lam Temple atanga chhim thlang lam Jerusalem tlang pawng lai ah Greek Selevki (Seleukid) Lal Antiokus Palina Apipanes chuan Khakra (Akra) a sa a, hei hi a mizo tawng chuan Kulh te ti mai ila, chutah chuan a sipai te dahin Juda te Temple (Beit Hamikdash) hmun chu an awp a, tin, he Khakra chhung ah hian Greek sipai te mai bak ah Juda mi inti Greek (Mityavnim) kan tih ho te pawh an awm ve bawk a, chung hote chuan Jerusalem khuaa Juda te chu an ti duhdah em em a, tin, Temple tlawh a lo kal Juda te chu an lo that thin bawk a ni. Tichuan, Juda te chuan Temple te chu tlawh ngam ta lovin heng Jentel Greek ho kut ah hian hun engemaw ti chhung chu lo awm tain tihbawrhban alo ni ta a ni.


Kum 164 BC hun lai khan Juda Macabi hova Temple chu lak let leh ni tain, Temple te chu tihthianghlim a lo ni chhunzawm leh ta a, tichuan, Juda te chuan Temple chu an luah lum leh ta a, hei hi tunlai thlenga Khanukah (Mei eng kut) kut kan lo hman chhan na chu a ni.


Amaherawhchu, he Khakra kulh hi lian lem lo mahse, a rinawmin a kulh bing te a sang em em a, Khashmonai ho te pawh hian an la let mai thei lem lo a ni, chuvangin, Juda ten Temple an luahlum leh hnu ah pawh hian he Khakra chhung ah hian Greek ho te leh Juda inti Greek ho te chu an awm chhunzawm reng a, tin, Juda hote pawh in he kulh hi lak tum ve reng bawkin an inkapin an inralsai reng a ni.


He kulh hi a kulh bang hi chhah tak mai a ni a, tin, a kulh vel hual hian Khalaklaka (Awih pang) siam ani bawk a, hei hi an hmelma ten leihlawn emaw, hmanraw dang hmanga kulh an rawn hnaih theih lohna tura an hunlai Technology zira an siam a ni. Tin, a kulh bang hi a rinawm em em a, lei chu 10m vel laia thuk lai khuarin a faundation atan lung lianpui pui remin an sa tan a, tichuan, lei rual atangin 40m vela sang a sak ani bawk a, a kulh bang chhah lam hi 4m laia chhah a sak ani hlawm bawk a ni. Tin, a Kulh len zawng hi a dung zawng 190m vela sei leh a zau zawng 60m vela zau ani bawk a ni. A lian lem lo hle a ni.


Sawi tak ang khian he kulh Khakra hi Juda Makabi khan a hun laiin lak tumin theih tawp a lo chhuah tawh a, mahse, a hlawh tling ta lo va, tichuan, a hnu ah Yonathan-an lak a tum ve leh a, ani pawh chu a hlawhchham thak a, tichuan, a hnu leh ah Yokhanan-an a tum ve leh a, ani pawh chuan a thei bik lova, a tawp a tawp ah kum 141 BC ah Shimon-an a rawn la thei ta hram a ni. Ani pawh hian indo na hmang chuan ala mai thei bik lo va, kum thum chhung zet ei tur la thei lovin he kulh chhunga awm te chu a hrek a, a tawp a tawp ah ril tama lo tlawm tain a gate chu an hawn sak thei ta hram a ni.


He Kulh KHAKRA hi History bu a chiang taka chuang anih avang hian kum 100 vel bawr Archaeologists ho ten lo zawng tawhin an lo bei nasa tawh thin a, amaherawhchu, a hnuhma eng mah hmu lovin an hlawhchham thin a ni. A chhan pakhat pawh Jerusalem khua kum 3000 vel laia upa chu hnam hrang hrang ten chhuan hrang hrang ah lo awp tawh thinin an hunlai mil leh an duh danin khaw thar design thar hmangin an lo siam hnan zel a, an hunlai hmanrawh neih zira hetianga khua an lo siam dawn hian an mahni hun hmaa khua lo din te chu thiah leh tihchima paih fai mai ai chuan, khaw pawn atanga lei leh lung laa vur hnana chumi chung ah chuan khaw thar sak hnan chu an ni tan a awlsam zawk a, chuvangin chutiang ang chuan an lo ti thin a ni, hei hi Archaeologists te tan thil tam tak ah a awlsam phah hle a, a chhan chu an sulhnu te a ngai ngaiin a hai chhuah leh theih phah thin vang a ni.


Tichuan, he Khakra kulh bang hi meter 20 vel zeta sei chu kum chanve kalta vel khan hai chhuah a lo ni tawh a, amaherawhchu, chiang taka zir chian a nih phawt theih nan an tlang zarh mai lova, tichuan, tunah chuan chiang kelh kawlh a hei hi ani tih an lo hriat tak ah chuan ni (3.11.2015) khan khawvel ram hrang hrang a chanchinbu mite ko khawmin mipui hriata puan zar alo ni ta a ni. Hetia puan zar anih takah chuan he hmun laihna a an hotu Dr Doron Ben Ami leh Yana Chaknovits te chu TV leh News hrang hrang ah interview tir na neiin an thil hmuhchhuah thar te chu zawt vela sawifiah tir an ni ta a ni.


He thil hmuhchhuah thar hian Jerusalem chu Juda te ta ngei ani tih a tichiang thar leh hlein tunlai Politics indona Arab Palestinian leh Juda te inkara inhnialna awm reng ah pawh hian thil tam takah kawng ro a sut phah mahna. Tin, he thil hmuhchhuah hian Juda te Kut pawimawh tak Khanukah (mei eng kut) kum tin Kislev thla ni 25 atanga ni 8 chhung an hman thin chu thawnthu mai ani lo, a taka hmuh theih leh zir theih in a pholang ta a ni.


Tunhma deuh khan tuna Jerusalem Old City Temple mount thlang a awm "Ir David" (City of David) hmun chhak lama an lo hai chhuah tawh Temple pakhatna hunlai vela mi ni ngeia an rin Lal Solomona lal in a ni ang tia an lo rin tawh te pawh tun ah chuan he thil hmuhchhuah thar avang hian tihrual rem thar leh siksawi rem thar a ngai dawn a, a chhanchu, Lal in sakna foundation emaw tia an lo rin thin Olive tlang lam hnaih a awm te chu he Khakra kulh bang lehlam hi a lo ni zawk tih te pawh hriat thar a ni ta zel a ni.


He kulh bang hai chhuah lai hian kulh bang hrula Khalaklaka (awih pang) vel ah hian Thal mu kibar te, Virvawm mu suan atanga siam te, Perhpui mu (Balistra - Catapults) leh Darsen atanga siam pawisa tam tak te, Amphora wine bur vawn bana Greek hawrawpa thu ziak hrang hrang te hai chhuah tel ani a, virvawm mu ah hian thu ziak te, sign chi hran hran te a chuang bawk a, thu ziak ah hian a tlangpuiin anchhia an ziak deuh ber a, mu khat ah chuan nuihzat thlak ang rengin Greek tawngin 'Ouch' tih a in ziak bawk.


He hmun hi kum 9 chhung laih alo ni tawh a, kei pawh he thil hlui hai chhuahna ah hian Juda te History mahni kut ngei hmanga hai chhuah ve chu ka thil chak ber thin anih avangin, tuna ka hna neih lai Computer zirtir chu zanlam hna anih avangin ka hun remchang chu chance ah lain chhun lamah hemi hmun ah hian Israel Antiquities Authority hnuai ah kum khat chuang mah tawh chu ka thawk ve ta a, tin, abik takin inchhuang rilru takin he kulh hi keima hai chhuah hmasak ber ani ka ti lo thei lo a, a credit lakna ah a hotu te kan nih loh avangin kan hming lang ve lem lo mahse, chhungril tak ah ka intithei rilru ve em em a ni.


He kulh hi a tirah chuan kulh ani tih tuman kan hre lo a, kulh zawnga hai pawh kan ni hran lem lo, Byzantines hunlai an laih chhuah lai velin ka zawm tan ve a, tichuan, a hnu ah Rome hunlai kan thleng thla leh a, hetih hunlai hian Rome ho building hnuai ah ka hai laiin Juda te inchiah thinghlimna tui khuah (Mikveh) sak na cement bang chu tlem ka hai lang a, tichuan, kan hotu te pawh an phur hlawm khawp mai a, chutah chuan thla enge maw zat min dah nghetin chuti lai chu nitin ka hai thin a, ka hai zau zel a Mikveh chu a pumin ka hai lang ta a, he Mikveh chhung ah hian Darsen atanga siam Khashmonai ho pawisa thir chu a lo berah 700 bawr vel chu ka hai chhuak a ni, tin, Lung atanga siam bungbel te leh Sa ruh atanga siam hmanraw chi hrang hrang te, hlum atanga siam bungbel leh bati te, buk lung te leh thil dang dang nitin mai ka hai chhuak thin a, kei aia thawk rei tawh te pawhin an thawh hun chhung zawng zawngin hetiang pawisa thir ang hi 3 pawh la hai chhuak lo an tam a, chuvangin mak hi min ti thei em em a, duhsakna pawh ka dawng nasa reng a ni.


Tichuan, hetia Mikveh ka hai chhuah lai hian Mikveh bang sir tuak tuak a lung lian pui pui mumal taka inrem chu a mak dangdai em avangin Archaeologists lian tak tak in an rawn enfiah fo mai a, kei chuan hei hi Kulh bang ani ang, tiin ka lo sawipui ve thin a, an ni chuan Jerusalem khaw laili laiah Kulhbang a awm nachhan tur a awm lo an ti tlat si a, chuvangin, hai hniam zel anih theih nan, chutianga lung lian pui pui awmze nei taka inrem thenkhat te chu kan chhu keh zel a, tunhnu ah hian a lo uihawm zia a hriat thar leh theih a ni.


Jerusalem hi Lung lianpui chunga awm a ni a, chuvangin, he Mikveh pawh hi khatia Juda ten Khakra hmun an chhuhsak tak ah chuan a lei rual thleng chuan an kulh sak te chu an nam chim a, tichuan, khawpui thar siamin in te an sak hnan ta a, tichuan, Mikveh atan lung lian chu ker a siam thar ai chuan Greek ho kulh bang kara a hnawh phuina lung an vawm luh te chu la chhuakin a karah chuan Mikveh chu an lo siam alo ni zawk tih kan hrethiam leh ta zel a ni. he kan thawhna ah hian hetiang Mikveh hi 3 lai ka hai chhuak ve a, hmun hrang hrang ah Mikveh hi kan hai chhuak nual a, heng Mikveh te hi Juda ten Temple tlawh a an lo kal hunin Temple an luh hmaa an in chiah thianghlimna atana mipui sang tam tak te lo dawng sawng tur anih avangin heti lai Temple hnai ah hian hetiang hian Mikveh tam tak an lo siam thin a lo ni a ni.


Tichuan, Kulh bang a nia nge tia an rinhlelh leh deuh hnu ah chuan a kulh bang lung niawm taka an rin pawn lam chu hai turin min dah leh ta a, ka Mikveh hai lai ah chuan ka thian te an dah ta zawk a, tichuan, kan han hai leh ta zel a, Kulh bang hrul ah chuan a lung te deuh zawka sak, in emaw room emaw ni awm tak chu ka hai chhuak leh ta a, chutah, kan thawhna inchung hliap zar chu hlipin Drone hmangin chunglam atangin fiah fai takin thla an la a, chuta an hriat thiam thar leh a chu, chu in ni awm tak chu Kulh bang hrula ral ven in sang ani ang e, tih an ring leh ta a, chumi hnu ah chuan a tihfiah nan thil pakhat ala ngai a, an hunlai khan kulh bang run nan Tawlailir sang taka siam, a bang savuna siam (hei hi meiin a kang kai mai lohna tura tih vang a ni) chumi chhung ah chuan sipai an awm ang a, sipai te chu thlal kap mi te leh thing bung, a hmawr thira siam kulh chhut chimna tura an siam te an awm bawk ang a, chumi hmang chuan kulh bang hrulh ah an in nawr hnai ang a, chu chhut chimna hmang chuan kulh bang chu an chhu an chhu ang a, tichuan, thal kap mite chuan an lo veng reng bawk ang a, an chhut chim veleh chuta tang chuan kailawn dahin kulh ah chuan an lut mai dawn a ni, chutiang ang hmanrua ina a hnaih theih lohna tur chuan kulh bang hrul ah chuan "Khalaklaka" (Awih pang) an siam thin a, chu awih pang chu rawra te, hlum bel keh them te, lung te, lei te leh lung chhut dip inthuah thip hmang te a siam leh mumal taka rem ani thin a, chu chu zawng chhuak turin min thlang chhuak leh a, he thil hi rual rem zawl a hai tur a ni lo va, a awih tur ang teh pah chunga dim taka hai chhuah tur a ni a, chumi anih avang chuan, dim tak maia, karandi leh brush hmanga hai chhuah tur a ni, chu chu ka zawng ta a, a tawp a tawp ah chuan hmun lian lo te ah hian ka hai chhuak ta a ni.


Dan narana kan hai thin dana a hmun dang ho te hi rual zawl anga thian ten an lo hai thin tawh avangin, hriat chhuah theih lohvin an lo hai thuk zel alo ni a, mahse, Archaeologists ho hmanrua hmanga an han teh dan anga hmun tlem an la hai loh lai min hai tir ah chuan, hman hmawh lo taka hai ani bawk a, chu an lo rin lawk dang ang Khalaklaka chu ka hai chhuak ta a, kan lawmin kan dim khawp mai a, nakin zela University a zir tura dahthat anih theih nan uluk takin thla an rawn la nitin reng bawk a ni. Ka hai lan hnu ah hian Hebrew University atangin nitin mithiam hetiang lam thiam hi rawn kalin hmul pawhna ang tak hmanrua in lei leh lung te, rawng inang lo deuh te chu exam turin an hmanraw mak pui pui nen an rawn inchhawp ve ziah bawk a, a nuam ve thei thin ania aw.


Eng pawh nise, chutia kil tin atanga an thiamna te hmanga an han hriat chian tak ah chuan puanzar alo nita a ni. Heng thu hi hman atangin ziah hi ka chak thei thin em em a, mahse, phal ani si lo va, ka insum hram hram a, ka thawh hma khan heti lai hmun ah hian thlalak an phal ngai miah lova, mahse, thlalak ka duh tlat si a, finrawl chhuahin facebook ah a hnathawk ho te secret group ka siam ta a, chu chu kan hotu lam te pawhin information pek nan tak an hmang tangkai ta phian a, chu chu remchang ah lain chuta mi tur chuan thla lak ka tan an phal ta a, haha… tichuan, kan thil hmuh chhuah thar te, hai chhuah thar te chu thla ka la thei ta zel a, bungraw engemaw thil kan hai chhuah milim te, bati te, pawisa te, fei kibar te leh thil dang dang te chu tlang zarh min la phal sak chuang lo a ni.


Eng le khaw le, tuna ka han sawi hi Greek ho hunlai a an kulh bang kha a ni a, hei hi kum 100 chuang Archaeologists ten an lo zawn tawh anih avangin tun ah an sawi uar ani mai a, tin, hei hian kan hma lawka lo awm tur Khanukah kut lai hian Tourist ho a ko hle dawn tih an hriat avangin tun ah an puangzarin an tilar ani mai a, hei aia ngaihnawm ka tih mah zawk leh a chanchin ka zir chian zawk Rome ho hunlaia an indo na thu te, Temple leh Jerusalem chhiat thu te ala ngaihnawm zawk a nia, eng tik ah emaw ziah leh kan la tum dawn nia.

 


Rss_feed